တၞၚ်သဳ၊ အံက်တဝ်ဗာ (၆)
ပ္ဍဲရးတၞၚ်သဳဂှ် ဟိုတ်နူပေါဲဗ္တိုက်ၜါလ္ပာ်တံတုဲ ညးဒဒိုက်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံဝွံ မ္ၚးနူဇွောံမ ကေုာံ ဂဥုဲဇဗတံဂှ် နွံပၟိက်ဒၟံၚ်ကဵု အရီုဗၚ် စပ်ကဵုပရေၚ်ဗ္စာရဏာမၞိဟ်တံရောၚ်ဂှ် ဂကောံရီုဗၚ်ထံက်ပၚ်ကဵုဒၟံၚ် ညးဒဒိုက်ပါဲဒဴဘဲပၞာန် ဒဝ်ဏတၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူဒပ်ပၞာန်သီအဝဵုတုဲ အပ္ဍဲရးတၞၚ်သဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ စဵုဒၞါဒေသတံ ဆက်က္တဵုဒှ်ဒၟံၚ် ပေါဲဗ္တိုက်ဇီုမုက်တံရ။
ဟိုတ်နူပေါဲဗ္တိုက်တံဏံတုဲ ညးဍုၚ်ကွာန်ဒေသ (၇၀၀၀) ပြၚ် နူပွိုၚ်ဍုၚ်တၞၚ်သဳ၊ ဍာ်ဗု၊ ပဠဝ်၊ ထဝါဲ၊ ကြုၚ်ကြုက်တံ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ်အိုတ်ရ။
ညးဍုၚ်ကွာန် ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ်တံဝွံ တန်တဴကဵု လ္တူဒၞါဲဒေသ မဒးဂြိပ်ဒဴပါဲဒလေတ်ဒၟံၚ်တံတုဲ နွံပၟိက်ကၠုၚ်ဒၟံၚ် စပ်ကဵုပရေၚ်စသုၚ်မံၚ်စံၚ်ဗိုက်လ္တက်တံ ကေုာံ ဂဥုဲဇဗတံရဂှ် ညးတာလျိုၚ် ဂကောံပရေၚ်ရီုဗၚ်ထံက်ပၚ် ပါဲဒဴဘဲပၞာန် ဒဝ်ဏတၞၚ်သဳမွဲတၠ ဟီုရ။
သ္အာၚ်နူဂှ်ပၠန် ဂၠံၚ်တရဴဗ္ဒါဲသီုဖအိုတ် မပလံၚ်ဏာနၚ်ဒၟံၚ် ဂဥုဲဇဗ ကေုာံ ဇွောံမစၞစ သွက်ညးဍုၚ်ကွာန်ပါဲဒဴဘဲပၞာန်တံဂှ် နူဒပ်ကံၚ်ဇြဳပၞာန်တံ ကၠောန်သ္ပဒၟံၚ် ပရေၚ်ဂၠိုက်ဂၠါဲကၟာတ်ဆိုအ်တံဂှ်ရ ဒးဂဗဒၟံၚ်ကဵု အခက်အခုဲယိုက်ပလံၚ်ဏာနၚ်တံရောၚ်ဂှ် သ္ဂးရ။
အခိၚ်လၟုဟ် ညးဒေသတံဝွံ ဒးဗ္ဒဗ္ဒါဲဒၟံၚ် စၞစမပါကၠုၚ် အဃောမဂြိပ်ဒဴတံကဵု ဇွောံမ ဒစးဒုၚ် မပကောံပကေဝ်လဝ်ဂှ်တုဲ ဒးခၞေံစဒၟံၚ်အိုတ်ရ။
ညးဍုၚ်ကွာန်ပါဲဒဴဘဲပၞာန် နူရးတၞၚ်သဳတံဝွံ ဒးပါဲဒလေတ်ဒၟံၚ် ပ္ဍဲဒဵုဂြိုပ်တံကီု၊ သ္ၚိဒၟံၚ် မသကလောကောဒေံ မစုက်တံကီု၊ ဘာလကျာ်၊ တိဍာ်ဗၠးၜး ကေုာံ ဗ္ဒိုပ်ပါဲဒဴဘဲပၞာန်တံရဂှ် ဂွံတီကေတ် နူကဵုဂကောံပရေၚ်ရီုဗၚ်ထံက်ပၚ် ညးပါဲဒဴဘဲပၞာန် ဒဝ်ဏတၞၚ်သဳတံရ။
ပရိုၚ်−သြၚ်လောန်တိုၚ်(မ်)