တၞၚ်သဳ၊ ဂျောန် ၂၀
သွက်ဂွံကလေၚ်ထိၚ်ကေတ် ဂၠံၚ်ပယျဵု (မောတောင်−ထုံခါ) အပ္ဍဲပွိုၚ်ဍုၚ်တၞၚ်သဳ ရးတၞၚ်သဳဂှ်တုဲ ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ဝွံ ဟိုတ်နူဒပ်ပံၚ်ကောံပၠန်ဂတးတအ် ဒုၚ်ဗတိုက်ကၠုၚ်တုဲ ဂွံကၠုၚ်စဵုကဵုတြဴဂိတုကီုလေဝ် ဆက်အာဂတဟွံဂွံ နွံဒၟံၚ်ဗ္ဒါဲကွာန်တုၚ်ခေါန်ရောၚ် ဂွံတီကေတ် ဇရေၚ်တမ်ဒပ်လၟိဟ် ၁၁ ဒပ်ပၞာန်ဗၠးၜးကောန်ဂကူကရေၚ် KNLA ရ။
သွက်ဂွံကလေၚ်ထိၚ် ဂၠံၚ်ပယျဵု (မောတောင်−ထုံခါ) မၞုံပ္ဍဲပွိုၚ်ဍုၚ်တၞၚ်သဳဂှ် စနူကၞောတ်သၞာံတုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ဒၟံၚ်ပၞာန် နကဵုဇြဟတ်လၟိဟ်မဂၠိုၚ်ဂၠေၚ်ရ။
သွက်ဂွံသ္ပအပြံၚ်အလှာဲ ပ္ဍဲကဵုဗ္ဒိုပ်ဒပ်ပယျဵု မၞုံအပ္ဍဲပွိုၚ်ဍုၚ်(မောတောင်)ဂှ်ကီု၊ သွက်ဂွံကလေၚ်ထိၚ်ကေတ် ဂၠံၚ်ပယျဵုဂှ်ကီု၊ သီုသ္ဂောံဗဂပ်ကဵုလွဟ် ကုပၞာန်မၚ်ကွာန် မၞုံပ္ဍဲဍုင်(မောတောင်)တံဂှ်တုဲ ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲတိဍာ် KNU ရ။
ဟိုတ်နူဒပ်ပံၚ်ကောံပၠန်ဂတးတအ် ဒုၚ်ဗ္တိုက်ကၠုၚ် ကုဒပ်ကံၚ်ဇြဳပၞာန် မထ္ပက်ဒၟံၚ်ကရောၚ်ပၞာန် အပ္ဍဲတိဍာ် ဒပ်ပၞာန်ဗၠးၜးကောန်ဂကူကရေၚ် KNU/KNLA ဂှ်တုဲ ဒပ်ကံၚ်ဇြဳပၞာန် ဒးဇီုကပိုက်ပြဟ်လလုဲအာ နွံဒၟံၚ်တၟာဂလိုၚ်တုဲ နူကဵုဗ္ဒါဲကွာန်တုၚ်ခေါန်ဂှ် ဆက်အာဂတဟွံဂွံ ဒှ်ဒၟံၚ်ရောၚ် တမ်ဒပ်လၟိဟ် ၁၁ KNLA သ္ဂးလဝ်ရ။
ဟိုတ်နူကံၚ်ဇြဳပၞာန် ထ္ပက်ပၞာန်ဗ္တိုက်ကၠုၚ်ဂှ်တုဲ ပ္ဍဲကဵုကွာန် မွဲဒမြိပ်ဂၠံၚ်ပယျဵုကဵု ကွာန်ဗ္ဒါဲဗ္ဒါဲတအ်ဂှ် ပန်ခြောဟ်ဒၟံၚ်ကဵုလွဟ်ဇၞော်ကီု၊ ထောံဂြာတ်ကၠုၚ်မံၚ်မခတိုဟ် နူကဵုပၞာန်ကျာကီုဂှ်တုဲ ညးဒေသဗွဲမဂၠိုၚ် ဒးပါဲမံၚ်ဘဲပၞာန်ဂှ်ဝွံ ဂွံကၠုၚ် ၆ ဂိတုပေၚ်ၚ်ရ။
မွဲလ္ပာ်ဂှ်ပၠန် ပ္ဍဲဂိတုဂျောန် ၁၇ ကဵု ၁၈ တေံဂှ်လေဝ် ပ္ဍဲဒၞါဲပေါဲဗ္တိုက်ဟၟဲကီု သီုကဵုဒၞါဲဒပ်ပၠန်ဂတးတအ်ဟၟဲဂှ်လေဝ် ဒပ်ကံၚ်ဇြဳပၞာန် ထောံဂြာတ်မခတိုဟ် ဗ္တိုက်ကၠုၚ်ဒၟံၚ်တုဲ နကဵုညးဍုၚ်ကွာန်ဂမၠိုၚ် သွက်ဂွံဖန်ဇန်စွံလဝ်သ္ဂောံဗၠးဘဲဂှ် တမ်ဒပ်လၟိဟ် ၁၁ KNLA, Black Cobra Column ကဵုလဝ်သမ္တီရ။
ပ္ဍဲပွိုၚ် ၆ ဂိတု နူကဵုဒပ်ကံၚ်ဇြဳပၞာန် ထ္ပက်ပၞာန်ဗ္တိုက်ကၠုၚ်ဂှ် ကွာန်တုၚ်ခေါန်ကဵု ကွာန်(ချောင်းနှစ်ပေါက်)ဝွံ ဒးမံၚ်ဘဲပၞာန်တုဲ ပ္ဍဲစမြိုၚ်၊ ဘာဗ္တောန်လိက်၊ ဘာလကျာ် အပ္ဍဲကွာန်တအ်ဂှ် ဖျေံလဝ်ဒပ် နဒဒှ်ဗ္ဒိုပ်ဒပ်ယာယဳတုဲ မံၚ်တဴဒၟံၚ်ဂှ် သ္ဂးရ။
အပ္ဍဲဂိတုမေတုဲကၠုၚ်တေံဂှ်လေဝ် ပ္ဍဲပွိုၚ်ဍုၚ်တၞၚ်သဳ မၞုံအပ္ဍဲခရိုၚ်ဗိက်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကီု၊ ဟိုတ်နူပေါဲဗ္တိုက်ၜါလ္ပာ်တအ်ကီု သီုကဵုပရေၚ်ပန်ပှော်ဗ္တိုက် နကဵုလွဟ်ဇၞော် ကေုာံ နကဵုပၞာန်ကျာတံဂှ်တုဲ ညးဍုၚ်ကွာန်ဒေသ ဗၞတ် ၁၇၅၀၀ ဒးပါဲမံၚ်ဘဲပၞာန် အလုံကွာန်မွဲဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီုရုပ်− PDF