ကြုၚ်ဒဵု၊ ဂျောန် ၂၂
ဒပ်ကံၚ်ဇြဳပၞာန် ကၠုၚ်နူကဵုဍုၚ်ကြုၚ်ဒဵု တွဵုရးကရေၚ် မကၠုၚ်ကဵုအရီုဗၚ်ပၞာန် ဇရေၚ်ကရောၚ်ပၞာန်အံၚ်ဇေယျဂှ် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ဟွံအောန်နူ ၃၀ တၠ ချိုတ်အာလဝ်ရောၚ် ဒပ်ပၞာန်ဗၠးၜးဍုၚ်မန် MLA လလောၚ်ပ္တိတ်လဝ်ပရိုၚ်ရ။
အပ္ဍဲပရေၚ်ပြုပြေၚ်ပၞာန် မန်−ကရေၚ် ပ္ဍဲဂိတုဂျောန် ၁၉ တုဲကၠုၚ်တေံ ဒပ်မန်ရာမည RMA ကေုာံ ဒပ်ပံၚ်ကောံဂမၠိုၚ် သၟဝ်သ္ကိုသ္က KNLA ဂှ်ကဵု ဒပ်ကံၚ်ဇြဳပၞာန် ၝောံဒပ် (၄၄) ၊ ၝောံဒပ် (၅၅) မထ္ပက်ကၠုၚ်ကရောၚ်ပၞာန် သ္ဂောံကဵုအရီုဗၚ် ကုကရောၚ်ပၞာန်အံၚ်ဇေယျဂှ် ဒှ်လဝ်ပေါဲဗ္တိုက်ဇၞော် ပွိုၚ် ၇ နာဍဳပြၚ်ရ။
အပ္ဍဲပေါဲဗ္တိုက်ဏံ ကောန်ဒပ်ကံၚ်ဇြဳပၞာန် ဟွံအောန်နူ ၃၀ တၠ ဒးချိုတ်အာလဝ်တုဲ ပါလုပ်သီုသ္ကိုပ်တမ်ဒပ်ဂှ် ဗ္ဒါဲ ၁၀ တၠ ဇီုကပိုက်ကလိဂွံလဝ်ဝပ်တုဲ သီဂွံလဝ် မကမ်လွဟ်လက်နက်ညိညဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ ထ္ပက်ဒၟံၚ်ကရောၚ်ပၞာန် လ္ပာ်ဍုၚ်ကြုၚ်ဒဵုဂှ်တုဲ နကဵုညးဍုၚ်ကွာန်ဒေသ နွံမွဲဒမြိပ်ကွာန်ဂှ်ဂမၠိုၚ် အာကၠုၚ်ပသတိတုဲ သွက်ဂွံကလၚ်ရမျာၚ် လွဟ်ဇၞော်၊ က္ၜၚ်ကျာတံဂှ်လေဝ် MLA ဖတိုက်ဖ္အောဝ်လဝ်ရ။
စပ်ကဵုအကာဲအရာ ဒပ်ကံၚ်ဇြဳပၞာန်ကၠုၚ်ကဵုအရီုဗၚ်ပၞာန် ဇရေၚ်ကရောၚ်ပၞာန်အံၚ်ဇေယျ မဒးဒုၚ်ဗ္တိုက်လဝ်ဂှ်တုဲ ဒဵုကဵုအခိၚ်လၟုဟ် လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်ပရိုၚ်ဂှ် ဟွံဂွံဆဵုကေတ်ဏီရ။
ပရိုၚ်− သြၚ်လောန်တိုၚ်(မ်)
ဗီုရုပ်−MLA