တၞၚ်သဳ၊ ဂျောန် ၂၂
ပ္ဍဲရးတၞၚ်သဳ ပရေၚ်ပၞာန်သ္ကာတ်မြဟ်ကၠုၚ်မံၚ်ဂှ် အပ္ဍဲဂိတုမေတုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ကေုာံ ဂကောံဇြဟတ်ပၠန်ဂတးရပ်လွဟ်တအ် ရပ်ဒက်ပြိုက်ဂစိုတ်ကၠုၚ်ဂှ်တုဲ ကောန်အရာပ် ၁၃ တၠ ချိုတ်အာလဝ်ရောၚ် ဂွံတီကေတ် ဇရေၚ်ဂကောံသုတေသနအပ္ဍဲဒေသ FE5 Thanintharyi ရ။
အပ္ဍဲဂိတုမေတုဲကၠုၚ်တေံ ဒၟါနူဟိုတ်နာနာသာ်တုဲ ပ္ဍဲရးတၞၚ်သဳဂှ် ကောန်အရာပ်ချိုတ်အာလဝ် ၁၃ တၠ နွံတုဲ ပ္ဍဲကဵုဏံ ဟိုတ်နူမၞိဟ်လ္ပာ်ကံၚ်ဇြဳပၞာန်တအ်တုဲ ညးမဒးချိုတ်အာ ၈ တၠ၊ ဟိုတ်နူဂကောံပၠန်ဂတးတအ် ၚးတးပသောၚ်ကၠေံရဲကဵုပရိုၚ်တံဂှ်တုဲ ၄ တၠ ချိုတ်အာလဝ်ရ။
မွဲလ္ပာ်ဂှ်ပၠန်လေဝ် ဒၟါနူမာၚ်တိုပ်တိ ဂကောံရပ်လွဟ်ယၟုဟွံမံက်တအ် မပစူလဝ်ဂှ်တုဲ ဥူကျဳလှ အာယုက် ၆၀ သၞာံ လိုန်ဒးမာၚ် ပ္ဍဲဒၞါဲဂၠံၚ်အာကၠအ် ဗ္ဒါဲကွာန်(သစ်တိုထောင့်) ပွိုၚ်ဍုၚ်ဍာ်ဗုတုဲ ဒးချိုတ်အာလဝ်ရ။
ညးမဒးချိုတ်အာဗွဲမဂၠိုၚ် ဟိုတ်နူကံၚ်ဇြဳပၞာန်တအ်ဂှ်ဝွံ ဒးကဝေက်မကမ်လွဟ်ဇၞော် နူကဵုဒပ်ပၞာန် မပန်ကၠုၚ်ဂှ်တုဲ ချိုတ်အာလဝ်တုဲ ပ္ဍဲကဵုဏံ ကောန်ၚာ်သၟတ် အာယုက်သၟဝ် ၁၈ သၞာံ ပိတၠ ပါလုပ်ဂှ် ညးတာလျိုၚ် ဂကောံ FE 5 Thanintharyi ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူလၟေၚ်ကမၠောန်ဂကောံပၠန်ဂတးတအ် မၚးတးပသောၚ်ကၠေံရဲကဵုပရိုၚ်ဂှ်တုဲ ဒပ်စဵုဒၞါညးဍုၚ်ကွာန်တအ် လုပ်စိုပ်ပန်ပှော်လဝ်ပျူသဝ်ထဳ မတက်ဝိုၚ်သုၚ်ဒၟံၚ် ပ္ဍဲဆေၚ်အရက်လ္တူဍုၚ်ပဠဝ်ဂှ်တုဲ ပိတၠ ချိုတ်အာလဝ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် အပ္ဍဲဂိတုမေတေံ ဒပ်ကံၚ်ဇြဳပၞာန် ထ္ၜးကၠုၚ်ဟိုတ်နာနာသာ်တုဲ ရပ်ဒက်လဝ်ညးဍုၚ်ကွာန်ကောန်အရာပ်ဂမၠိုၚ် ဟွံအောန်နူကဵု ၁၃၇ တၠ နွံတုဲ ၆၇ တၠဂှ်ဝွံ ကလေၚ်ဗၠးကၠုၚ်လဝ်ရောၚ် သ္ဂးရ။
အပ္ဍဲဂိတုဨပရဴတုဲကၠုၚ်တေံဂှ်လေဝ် ပ္ဍဲရးတၞၚ်သဳဂှ် ဟိုတ်နူဒပ်ကံၚ်ဇြဳပၞာန် ကေုာံ ဂကောံပၞာန်မၚ်ကွာန်သၟဝ်တဲဂမၠိုၚ် ရပ်ဒက်ဂစိုတ်ကၠုၚ်ဂှ်တုဲ ညးဒးချိုတ်အာ ၆ တၠ နွံတုဲ ဒၟါနူဂကောံရပ်လွဟ်ယၟုဟွံမံက်တံဂှ်တုဲ ကောန်အရာပ် ၂ တၠ ဒးချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ