(လောင်းလုံး)၊ မေ (၁)
ပ္ဍဲကွာန်(သောကြာပြင်) ၊ ပွိုင်ဍုင်(လောင်းလုံး)၊ ရးတၞၚ်သဳ ပ္ဍဲပွမဖံက်ဗ္တိုဟ်ဗုမ် သ္ၚိဒၟံၚ်သ္ကိုပ်အုပ်ဓုပ်ဂှ် နကဵုတၚ်စောတ်စောဲ ပါလုပ်လဝ်ဂးတုဲ ညးဍုၚ်ကွာန် ဒးဒုၚ်ရပ်လဝ် (၂) တၠဂှ် ကံၚ်ဇြဳပၞာန် ဖျေံစၟတ်အမိၚ်ဒဏ်ထံၚ်လ္အိတ်အာယုက်ရဂှ် ဇာဇၞိက်ကောန်ထံၚ်ပရေၚ်ဍုၚ်ကွာန်ထဝါဲ ( DPPN) လလောၚ်ပ္တိတ်လဝ်ရ။
ညးဒးဒုၚ်ဖျေံအမိၚ် ဒဏ်ထံၚ်လ္အိတ်အာယုက်တံဂှ်ဝွံ ဒှ်ဥူသဝ်ယှိုဲ ကေုာံ ကိုဝ်သဵုမေန်ထိုဲ နူကွာန် (သောကြာပြင်) တံတုဲ ပ္ဍဲဂိတုဨပရဴ (၂၆) ဂှ် ကံၚ်ဇြဳပၞာန် ဖျေံလဝ်အမိၚ် နူကဵုရုၚ်သၞောဝ်ဓဝ်အပ္ဍဲဍုၚ် ထံၚ်ထဝါဲဂှ်ရ။
ကုဥူသဝ်ယှိုဲ ကေုာံ ကိုဝ်သဵုမေန်ထိုဲ ညးတံၜါတၠဂှ် နကဵုၝောံပိုဒ် ဖံက်ဗ္တိုဟ် (၃) ၊ ၝောံပိုဒ် ပကီုပရာပ် (၅၄) ဒဏ်ထံၚ်သၠုၚ်အိုတ်တံဂှ် ဖျေံလဝ်အမိၚ် နူရုၚ်သၞောဝ်ဓဝ် အပ္ဍဲထံၚ်ရ။
တုဲကၠုၚ် ဂိတုသေပ်တေမ်ဗာ (၂၁) ဂှ် ပ္ဍဲသ္ၚိဒၟံၚ် ဥူထောန်မေန် သ္ကိုပ်အုပ်ဓုပ် ကံၚ်ဇြဳပၞာန်ခါန်ကၞက် ကွာန် (သောကြာပြင်) ဂှ် ဗုမ်ဗ္တိုဟ်က္တဵုဒှ်လဝ်တုဲ သမ္ဘာဥူထောန်မေန် ဂွံဝပ်သ္ကာတ်မြဟ်တုဲ ကောန်ကၟိန်ဗြဴညး ချိုတ်အာလဝ်ရ။
ဗွဲကြဴ ဗုမ်ဗ္တိုဟ်တုဲ ကံၚ်ဇြဳပၞာန်ဂှ် ညးဒေသဥူသဝ်ယှိုဲ ကေုာံ ကိုဝ်သဵုမေန်ထိုဲတံ နကဵုတၚ်စောတ်စောဲ ပါလုပ် ပ္ဍဲအရာ ဖံက်ဗ္တိုဟ်ဗုမ်ဂှ်ဂးတုဲ ရပ်ဒက်စောဲလဝ်အမှုရ။
ပ္ဍဲရးတၞၚ်သဳ အပ္ဍဲကာလပၞာန်သီအဝဵုဂှ် ဥူသဝ်ယှိုဲ ကေုာံ ကိုဝ်သဵုမေန်ထိုဲ ညးဒးဒုၚ်ရပ် (၂) တၠတံဝွံ ပၞောဝ်ကဵုညးဒးဒုၚ်ရပ်ဖျေံထံၚ်တံဂှ် ဒးဒုၚ်ဖျေံစၟတ်လဝ် ဒဏ်ထံၚ်သၠုၚ်အိုတ်ရ။
ပရိုၚ်−သြၚ်လောန်တိုၚ်(မ်)