ကြုက် ထ္ၜးပျးကၠုၚ် ကမ်လှောဝ်နျူကလဳယျာ ပလီုက္ၜၚ်ကျာတုဲ ကဵုသတိ ကုအမေရိကာန်

ပေကျေန်၊ အံက်တဝ်ဗာ (၅)

အလဵုအသဳကြုက် သွက်ကဵုသတိ ကုအမေရိကာန်တုဲ ဗလးထ္ၜးကၠုၚ် ကမ်လှောဝ် ကေုာံ က္ၜၚ်ဖ္ဍိုက်က္ၜၚ်ကျာ ကမ်လှောဝ်နျူကလဳယျာ မဂွံဒုၚ်ဂိုၚ်ကေတ် လွဟ်လက်နက် မၞုံကဵုဍာ်အစောံစရာဲနျူကလဳယျာ ဍုၚ်ကြုက်သၠုၚ်အိုတ် ပ္ဍဲတ္ၚဲစၟတ်သမ္တီ တ္ၚဲကောန်ဂကူရ။

ကမ်လှောဝ် Dongfeng အစောံစရာဲသၠုၚ် ၜါဖ္ဍိုက်ဂှ်ဝွံ သွက်ဂကောံပရေၚ်ဗ္တိုက် က္ၜၚ်ဖ္ဍိုက်က္ၜၚ်ကျာ အမေရိကာန်ဂှ် ဒှ်အရာဘပဠ ဇၞော်ဇၞော်မွဲမာန် ချိၚ်ခယျဂွံဂှ်တုဲ ပရေၚ်ကြံၚ်မ္ၚိုဟ် အကြာကၟိန်ဍုၚ်ဇြဟတ်ဇၞော်ၜါဍုၚ်ဂှ် သၠုၚ်တိုန်ကၠုၚ်ဒၟံၚ်ရ။

ကမ်လှောဝ်ပလီုက္ၜၚ် ၜါဖ္ဍိုက် DF-21D ကဵု DF-26B တံဝွံ သွက်က္ၜၚ်ဖ္ဍိုက်က္ၜၚ်ကျာ အမေရိကာန်ဂှ် ဒှ်အရာဘပဠ ပြာကတ်မွဲတုဲ ကမ်လှောဝ်ပန်ပှော်အကြာတိုက် တၞောဝ်တၟိ DF-41 တံဂှ် စဵုကဵု ဇမ္ၚောဲ (၁၂၀၀၀) ကဳလောမဳတာပြၚ် အစောံမဖ္ဍိုက်ဏာ မကမ် (ထိပ်ဖူး) နျူကလဳယျာ ဗွဲမဂၠိုၚ် နွံရ။

ကမ်လှောဝ်တံဏံဝွံ ပွန်မၞုံဒၟံၚ် ပ္ဍဲၝောံဍုၚ်အမေရိကာန် သာ်လဵုဟွံဟီု ညံၚ်ဂွံဒး ပန်ပှော်မာန်ဂှ် ညးစိုန်သ္ကီု ပရေၚ်စဵုဒၞါတံ ဟီုရ။

နဒဒှ်စၟတ်သမ္တီ တ္ၚဲဒက်ပ္တန်ကၟိန်ဍုၚ်သမ္မတညးဍုၚ်ကွာန်ကြုက် မရနုက်ကဵု (၇၃) သၞာံ ပ္ဍဲစၟတ်သမ္တီရုပ်ဂမျိုၚ် ဌာန်ပရိုၚ် CCTV မဗလးလဝ် ပ္ဍဲသတ္တာဟ မလောန်ကၠုၚ်လဝ်တေံဂှ် ထ္ၜးပျးလဝ် ကမ်လှောဝ်ပလီုက္ၜၚ် အောန်အိုတ် ဗၞတ်မွဲဒါဇြိန်တုဲ ပမာဏဏံဝွံ သၟဟ်ဒၟံၚ်ကဵု ဒပ်ကမ်လှောဝ်မွဲဒပ်ရောၚ်ဂှ် ညးစိုန်သ္ကီုတံ သ္ဂးရ။

အတိုၚ်ဌာန်ပရိုၚ်ကၟိန်ဍုၚ်ကြုက်ပိုၚ် South China Morning Post မထ္မံက်ထ္ၜးလဝ်ဂှ်မ္ဂး ဒဒှ်မထ္ၜးပျး သာ်ဏံဂှ်ဝွံ ဒှ်အရာမလုတ်ဒကုတ်ဒးအာ ဟွံသေၚ်ရောၚ်ဂှ် ညးထ္ၜးနဲကဲတြေံ ဒပ်ပၞာန်ဗၠးၜး ညးဍုၚ်ကွာန် သံၚ်ဂျုၚ်ဖေန် ထံက်ဂလာန်ဟီုဂးလဝ်ရ။

ပေါဲပၞာန်ယူကရုၚ် မသ္ကာတ်မြဟ်ဂှ်ဝွံ သ္ကဵုကၟိန်ဍုၚ်ကြုက် ကြေပ်ဂြတ်ကၠေံတုဲ သွက်ဂွံကဵုဇြဟတ်ဂရိုဟ် ကုဍုၚ်တၞဟ်ဟ်တံ စပ်ကဵုပရေၚ်ထိုၚ်ဝါန်ဂှ်တုဲ ဒဒှ်ရထ္ၜးပျးကၠုၚ်လဝ် လွဟ်လက်နက် Dongfeng series ဂှ်တုဲ သွက်အမေရိကာန်တံဂှ် ဒှ်အရာတၚ်ကဵုသတိ မဍိုန်ဍောတ်ဇိပ်ဂၠိပ်မွဲရောၚ်ဂှ် ညးဆက်ဟီုရ။

လွဟ်လက်နက်ဗျူဟာ ဒပ်ကမ်လှောဝ် PLA တံဂှ် သွက်ဂွံထ္ၜးပျး ပ္ဍဲအခန်ကၞာပၠဒပ် တ္ၚဲကောန်ဂကူဂှ် ရန်တၟံလဝ်ကီုလေဝ် ကၟိန်ဍုၚ်ကြုက်ဝွံ စှ်သၞာံမွဲဝါ ဟွံသေၚ်မ္ဂး အပ္ဍဲမသုန်သၞာံမွဲဝါဟေၚ် လေပ်ကၠောန်ဗဒှ်ကၠေံ သ္ဘၚ်တံဏံရ။

ပ္ဍဲအရာပ္တဝ်မုက်ကဵု က္ၜၚ်ပၞာန်အမေရိကာန်တံဂှ် မကမ် (ထိပ်ဖူး) ဓမ္မတာ မၞုံပ္ဍဲ DF-21D ကေုာံ DF-26 တံဂှ်ဝွံ ဟိုတ်နူဍာ်အစောံစရာဲ ပရေၚ်ဗ္တိုက်ဍေံတံ မချိုတ်ပၠိုတ်ဂှ်တုဲ စဵုကဵုတာဒၞါကၠေံမာန် အစောံထတ်သ္ကာတ်မာန်ဂှ် ဂွံတီကေတ်ရ။

ဒပ်ကမ်လှောဝ် PLA တံဝွံ ပ္ဍဲသၞာံ ၂၀၂၀ ဂိတုအဝ်ဂါတ်ဂှ် ပန်ကၠဟ်လဝ် ကမ်လှောဝ်ပရေၚ်ဗ္တိုက် က္ၜၚ်ဖ္ဍိုက်က္ၜၚ်ကျာ မၞုံၜဳကြုက်သၠုၚ်ကျာ ၜါဖ္ဍိုက်ဂှ်တုဲ ဒးအာလဝ် က္ၜၚ်မချဳဒရာၚ်အာကၠုၚ် မစၟတ်သမ္တီလဝ် မွဲဖ္ဍိုက်ဂှ်ရ။

ပ္ဍဲပရၚ်သြၚ်ဂၚ်သၟဝ်ကျာ ကၟိန်ဍုၚ်ဂှ် ကဵုလဝ်အခေါၚ်ဟွံမွဲမွဲသာ် က္ၜက်ကျာကၠတ်ပရိုၚ် U-2 မွဲဖ္ဍိုက် လုပ်စိုပ်လဝ် အပ္ဍဲပွပ္ကတ်ပ္ကေၚ်ပရေၚ်ပၞာန် ဒပ်ဍာ်ကြုက်ရောၚ် ကြဴနူပေကျေန် စောတ်စောဲကၠုၚ် ဂွံမွဲတ္ၚဲတုဲဂှ် က္တဵုဒှ်လဝ် ဗီုဏံရ။

ပ္ဍဲသၞာံ ၂၀၂၂ စဵုကဵု ဂိတုအဝ်ဂါတ်ဂှ် အရာဟွံကေၚ်ဂဗမွဲလှ်ေ မွဲဒမြိပ်ထိုၚ်ဝါန်ဂှ် ပွမပ္ကတ်ပ္ကေၚ် ပရေၚ်ပၞာန် ပန်ကၠဟ်နတဲတံ၊ ပရေၚ်ကြံၚ်မ္ၚိုဟ် မြက်က်ဇက်က်တံ ဂၠိုၚ်ကၠုၚ်ဂှ် ဂွံညာတ်ကေတ်တုဲ ကြဴနူလၟေၚ်တရဴတိုၚ်ပေ ဥက္ကဌကၠတ်ထဝ်သၟဝ် အမေရိကာန် နာန်ဇြဳပဠဝ်ဇြဳ မံက်တိတ်ကၠုၚ်တုဲဂှ် သ္ဇက်ဂွံဒှ်ဂယျာန်ဓဝါန်သာ်ဏံ မံက်တိတ်ကၠုၚ်လဝ်ရ။

Ref: Thaiger