မတ်မလီု၊ အံက်တဝ်ဗာ (၉)
ၜဲတိတ်နူတွဵုရးဍုၚ်မန်တံဂှ် ဟိုတ်နူဍုၚ်သ္အာၚ်ဂမၠိုၚ် မပ္တံကဵု ဍုၚ်အိန္ဒိယ ကေုာံ ဍုၚ်ကြုက်တံ ရာန်ကၠုၚ်ဂၠိုၚ်တိုန်ဂှ်ရ ပ္ဍဲဗွဝ်ဖျာၜဲအပ္ဍဲဍုၚ်ဂှ် ၜဲသှ်ေတံ အောန်စှ်ေကၠုၚ်ရဂှ် တၠကမၠောန်ၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၜဲဇၞော် မတိတ်နူဒေသတံကဵု ၜဲဂကူနာနာတံဝွံ အခိၚ်ပ္ဍဲတဲသၟာဂူဗ္ၚတံ ကေုာံ သၟာဗၞိက်တံ ၜဲသှ်ေအောန်ဒၟံၚ်ဂှ် ဒၟါနူဍုၚ်အိန္ဒိယ ကဵု ဍုၚ်ကြုက်တံ ရာန်ဂၠိုၚ်ဒၟံၚ်ဂှ်ရ အပ္ဍဲဗွဝ်ဖျာ ၜဲသှ်ေ သာအောန်စှ်ေကၠုၚ်ရ။
ၜဲနာနာ မတိတ်နူဒေသတံဂှ် ဍုၚ်ကြုက်ကဵု ဍုၚ်အိန္ဒိယတံ ပ္ဍဲဍုၚ်ညးတံဂှ် ရာသဳဥတု ပရေံတုဲ ပွမပလီုပလာ်ဇီုကပိုက်တံ နွံဒၟံၚ်ဂှ်ရ ပရေၚ်ရာန်ကၠုၚ်ၜဲတံ သၠုၚ်တိုန်ကၠုၚ်လဝ်ရ။
တၠကမၠောန်ၜဲမွဲတၠဂှ် ယဝ်ရဍုၚ်ကြုက် ကဵု ဍုၚ်အိန္ဒိယတံ ဆက်ရာန်အာဒၟံၚ် စဵုကဵုဂိတုနဝ်ဝေမ်ဗာတေံမ္ဂး ပ္ဍဲဗွဝ်ဖျာၜဲအပ္ဍဲဍုၚ်ဂှ် ၜဲသၟေဟ်စဵုကဵုဟွံမွဲ ဒှ်အာမာန်ဂှ် ဟီုရ။
“ဇြဟတ်ရာန်ဂှ် ခိုဟ်ဒၟံၚ်ရ၊ အိန္ဒိယတံ မုတံဂှ်တှ်ေ ရာသဳဥတု ပရေံတုဲ ရာန်ဒၟံၚ်ၜဲဗၟာပိုယ်တံ ဗွဲမဂၠိုၚ်ဂၠေၚ်ရ၊ ကြုက်ဟီုမ္ဂးလေဝ် ရာသဳဥတုဂှ်တှ်ေ ဗြဲဝၚ်ဒၟံၚ်ရောၚ် ဟီုဂွံရ၊ ဇြဟတ်ရာန်ဂှ်တှ်ေ နွံ၊ ဍုၚ်သွံရာန်ဒၟံၚ်အဓိကဂှ်တှ်ေ ကြုက်ကဵု အိန္ဒိယရ၊ လျိုၚ်တာန်ၜဲသှ်ေ အပ္ဍဲဍုၚ်ဂှ် အောန်ဒၟံၚ်ယျ၊ ဆ္ဂး အကာဲအရာလၟုဟ်ဂှ်တှ်ေ ပ္တိုန်က္ၜၚ်မာန်ဒၟံၚ်ဏီ၊ ၜိုတ်ဍေံတံရာန်ဂှ် ကဵုမာန်ဒၟံၚ်ဏီ၊ ဆ္ဂး ပ္ဍဲဂိတု (၁၁) ဏံ လ္ပာ်ဍေံတံ ထပ်ရာန်ဟီုမ္ဂး ၜဲမသှ်ေအပ္ဍဲဍုၚ်တံဂှ် အောန်အာယျ၊ စဵုကဵုဟွံမွဲ ဒှ်အာဏောၚ်၊ အောန်အာကွေံကွေံရောၚ်” ဂှ် သ္ဂးရ။
သ္အာၚ်နူဂှ်ပၠန် ၜဲမတိတ်ဒၟံၚ် အပ္ဍဲဍုၚ်တံဝွံ ဒၟါနူဇြဟတ်ရာန် နူဍုၚ်သ္အာၚ် ဂၠိုၚ်ဒၟံၚ်ဂှ်ရ သၟာဗၞိက်တံ သာရာန်ဒၟံၚ်တုဲ ညးမရပ်စပ်စကာ အပ္ဍဲဍုၚ်တံလေဝ် ဟိုတ်နူဒှ်အခိၚ် သ္ဘၚ်ဂှ်ရ ဇြဟတ်ရာန်တံ ဂၠိုၚ်ဒၟံၚ်ရောၚ်။
ၜဲနာနာ မတိတ်နူ အပ္ဍဲဍုၚ်တံဂှ် ၜိုန်ရဍုၚ်သ္အာၚ်တံ ရာန်ဂၠိုၚ်ဒၟံၚ်ကီုလေဝ် ဟိုတ်နူၚုဟ်ဒဝ်ဠာ ကလေၚ်စှ်ေကၠုၚ်ဂှ်ရ ၚုဟ်ၜဲတံလေဝ် ကလေၚ်စှ်ေဒၟံၚ်ညိညကီုရ။
အခိၚ်လၟုဟ်ဂှ် ၜဲ (ပဲတီစိမ်း) မွဲန ၜါစှော်ပသာဂှ် (၄၈၀၀၀) ဒ္ကေဝ်မၞုံတုဲ ၜဲဇၞော် မွဲနဂှ် ဗ္ဒါဲ (၆၀၀၀၀) ဒ္ကေဝ်၊ ၜဲတလတ် မွဲနဂှ် စဵုကဵု (၆၂၀၀၀) ဒ္ကေဝ် ဂွံဒၟံၚ်ၚုဟ်ရ။
ပ္ဍဲတွဵုရးဍုၚ်မန်ဂှ် ၜဲနာနာသာ် မပ္တံကဵု ၜဲဇၞော်၊ ၜဲတလတ် ဒှ်တမ် ဂကူၜဲဗွဲမဂၠိုၚ်တံဂှ် တဵုပၠောမ်ဒၟံၚ် အဓိကတုဲ ၜဲမတိတ်ကၠုၚ်တံဂှ် ဍုၚ်ကြုက်ကဵု ဍုၚ်အိန္ဒိယတံ ရာန်ကေတ်ဒၟံၚ် အဓိကတုဲ ဍုၚ်ပါကေဿတာန် ၊ နဳပဝ်၊ သေန်ကာပေါဝ် ကေုာံ ဍုၚ်သေံတံလေဝ် ဗ္ကန်တုဲ ပၠောပ်ပ္တိုန်ဒၟံၚ်တံ နွံရ။
ပရိုၚ်−သြၚ်လောန်တိုၚ်(မ်)