မတ်မလီု၊ အံက်တဝ်ဗာ (၉)
ပ္ဍဲတွဵုရးဍုၚ်မန် ကံၚ်ဇြဳပၞာန်သီအဝဵု ကော်ဆဵုဂဗကဵု သ္ကိုပ်အုပ်ဓုပ်ကွာန်အရာပ်တံတုဲ သွက်ဂွံဒက်ဂကောံ ပရေၚ်ဂီုကၠီုညးဍုၚ်ကွာန်တံ ဗွဲမပြဟ်အိုတ်ဂှ် ကဵုကၠုၚ်ဇြဟတ်ဂရိုဟ်ရောၚ် သ္ကိုပ်အုပ်ဓုပ်ကွာန်အရာပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် နူဂိတုအံက်တဝ်ဗာ (၆) တေံဂှ် ပ္ဍဲပေါဲဆဵုဂဗသဳကၠဳ မကၠောန်ဗဒှ် ပ္ဍဲၝောံခန်တွဵုရး ဍုၚ်မတ်မလီုဂှ် ကြဴနူသ္ကိုပ်ဝန်ဇၞော်တွဵုရးဍုၚ်မန် ကော်ဆဵုဂဗကဵု သ္ကိုပ်အုပ်ဓုပ် ကွာန်အရာပ်တံတုဲ ကဵုကၠုၚ်ဇြဟတ်ဂရိုဟ်ရ။
ပ္ဍဲပေါဲဆဵုဂဗဏံဂှ် ပရေၚ်ဂီုကၠီုတိဍာ်၊ ပရေၚ်ညိၚ်ဝတ်တံ ကေုာံ ပရေၚ်သၞောဝ်ဥပဒေအုပ်လဒံတံဂှ်ဝွံ ပၟိက်ဇၞော်တုဲ နကဵုသ္ကိုပ်အုပ်ဓုပ်ကွာန်အရာပ်တံ သွက်ဂွံထ္မံက်ရုပ်ရဴ ရေၚ်တၠုၚ်ကဵု သၞောဝ်ပရေၚ်ဂီုကၠီုတံ ဗွဲမပြဟ်အိုတ်ဂှ် ဟီုဂးလဝ် အဓိကရောၚ် သ္ကိုပ်ပရေၚ်အုပ်ဓုပ် ကွာန်အရာပ် မတိုန်စိုပ်လဝ် ပေါဲဆဵုဂဗမွဲတၠ ဟီုရ။
ဂကောံဒပ်စဵုဒၞါညးဍုၚ်ကွာန် PDF တံကဵု ဂကောံဒပ်ပံၚ်ကောံတံဝွံ မ္ၚးနူပၞာန်ညးဍုၚ်ကွာန်၊ ပျူသဝ်ထဳ၊ သ္ကိုပ်အုပ်ဓုပ် ကွာန်အရာပ်တံ ကေုာံ ညးထံက်ဂလာန်ဒပ်ပၞာန် ညးမကဵုပရိုၚ်တံဂှ် သီုညးမပံၚ်တောဲပူဗိုၚ်ဒၟံၚ်ကဵု ကံၚ်ဇြဳပၞာန်တံ ဒၟါနူအကာဲအရာ ဒးဒုၚ်ပန်ပသောၚ်ထောံ နွံဒၟံၚ်ဂှ်ရ သွက်ဂွံဒက်ဂကောံ ပရေၚ်ဂီုကၠီုညးဍုၚ်ကွာန် ညးဍုၚ်ကွာန်တံ သ္ဂောံပါလုပ်အိုတ်ဂှ် နတဲဏံ ဒှ်ဟွံမာန်ပုဟ် သာ်ဝွံ သ္ဂးရ။
အတိုၚ်အကာဲအရာလၟုဟ်မ္ဂး သွက်ဂွံဒက်ဂကောံ ပရေၚ်ဂီုကၠီုညးဍုၚ်ကွာန်တံဂှ် ဒဒှ်ရဟွံပြေပြံၚ်ဂှ် ၜိုန်ရပ္တိုန်ထ္ၜး ဟီုဂးလဝ်ကီုလေဝ် ကံၚ်ဇြဳပၞာန်ဂှ် ဟွံဒေါအ်ဟွံဂွံ ဗက်စန်ဒက်တုဲ သွက်ဂွံဒက်ကဵုဂကောံဂှ်ဟေၚ် ကလေၚ်ဟီုဂးလဝ် ဂၠိုၚ်ၚ်ကဵုဝါဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ် ဇၞော်သ္ကိုပ်သၞာဲဒဴ နူဌာနမဆေၚ်စပ် ကဆံၚ်ပွိုၚ်ဍုၚ် (၂၁) ဌာနတံ မပါလုပ် သီုကဵုဂကောံမကဵုလဝ်ယၟု ကရောၚ်ပၞာန်ဇၞော် (၅) ကရောၚ် သ္ဂောံကၠောန်ကဵု ပရေၚ်ဒေသဖောအ်ဗြေဝ်တံဝွံ နကဵုတၚ်ထ္ၜးဟိုတ် သွက်ဂွံပံၚ်တောဲကဵု ဒပ်ပၞာန်ဂှ်ကီု၊ သွက်ဂွံကဵုပရိုၚ်တိဍာ်တံဂှ်ကီု၊ သွက်ဂွံဒက်ကဵုဂကောံ ဂကောံပရေၚ်ဂီုကၠီုညးဍုၚ်ကွာန်တံ ဗွဲမပြဟ်မာန် ဂးတုဲ ဗက်စန်ဒက်ဒၟံၚ် ညးဒေသတံ နူကဵုဂိတုသေပ်တေမ်ဗာ သတ္တာဟဒုတိယတုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)