လ္ဂုၚ်၊ အံက်တဝ်ဗာ (၉)
အလုံမွဲကၟိန်ဍုၚ် နူစဒပ်ပၞာန်သီအဝဵု တုဲကၠုၚ် ဂိတုဖေဖဝ်ဝါရဳ (၁) တေံ စဵုကဵုဂိတုသေပ်တေမ်ဗာအိုတ် သၞာံဏံဂှ် ညးဗြဴမ္ဒးချိုတ်အာ နွံကၠုၚ် (၃၀၀) ပြၚ်ရဂှ် သမဂ္ဂညးဗြဴကၟိန်ဍုၚ်ဗၟာ (BWU) လလောၚ်ပ္တိတ်လဝ် ပ္ဍဲဂိတုအံက်တဝ်ဗာ (၇) တေံရ။
ပ္ဍဲကဵုဂှ် တုဲကၠုၚ်ဂိတုသေပ်တေမ်ဗာ မွဲဂိတုဓဝ်ဂှ် ညးဗြဴ (၂၃) တၠ ဒးချိုတ်အာလဝ်တုဲ နူကဵုကံၚ်ဇြဳပၞာန်ဂှ် ရပ်ဒက်ဏာလဝ် ညးဗြဴ (၃၁) တၠ ဟွံဗဗွဲကဵုသၞောဝ်ရ။
အပ္ဍဲအခိၚ်ကာလ သီအဝဵုဂှ် ညးဗြဴအပံၚ်ဖအိုတ် (၂၄၀၀) တၠ ဒးဒုၚ်ရပ်ဒက်ထိၚ်ဒဝ်လဝ်တုဲ ပ္ဍဲကဵုဂှ် ညးဗြဴ (၂၀၀) ပြၚ်ဝွံ ဒးဒုၚ်ဖျေံစၟတ်လဝ် ဒုဟ်ဒဏ် နာနာသာ်တံရ။
ပၞောဝ်ကဵု ညးဗြဴ (၂၀၀) ပြၚ် ဒးဒုၚ်ဖျေံစၟတ်လဝ်ဒုဟ်ဒဏ်တံဂှ် (၉) တၠဝွံ ဒှ်ညးဒးဒုၚ်ဖျေံစၟတ်လဝ်ဒဏ်ဂစိုတ်တုဲ ညးဗြဴ (၁၀) တၠပၠန်ဂှ် ဒးဒုၚ်ဖျေံစၟတ်လဝ် ဒဏ်ထံၚ်မွဲအာယုက်တုဲ မၞိဟ်ဒးဒုၚ်ဖျေံစၟတ်လဝ် ဒဏ်ထံၚ် (၉) သၞာံ လ္ပာ်လ္တူဂှ် (၅၀) ပြၚ် ပါလုပ်ဒၟံၚ်ရ။
စရၚ်ဏံဝွံ ဒှ်တၚ်နၚ်မကံက်ကေတ်လဝ် နူကဵုဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) ကဵု သမဂ္ဂညးဗြဴကၟိန်ဍုၚ်ဗၟာ (BWU) တံဂှ်တုဲ ပ္ဍဲဗလးတိဏံ ဂၠိုၚ်နူလၟုဟ်မာန်ရောၚ်ဂှ် သ္ဂးလဝ်ရ။
သဒၚ်ဂြာ ညးဒုၚ်တာလျိုၚ် ဌာနပရိုၚ် ကေုာံ သ္ပစၟတ်သမ္တီ ဂကောံသမဂ္ဂညးဗြဴ ကၟိန်ဍုၚ်ဗၟာ (BWU) ဂှ် ညးဗြဴ မဒးဒုၚ်ရပ်လဝ် အပ္ဍဲဂိတုသေပ်တေမ်ဗာတံဂှ်ဝွံ ဒၟါနူစရၚ်ကၟုဲကီု၊ ဒၟါနူဟီုဂးချူတြးပါ်ပရအ် နူကဵုမုက်လိက်ဇာဇၞိက်ပရေၚ်မၞိဟ်တံကီုဂှ်ရ ဒးဒုၚ်ရပ်ဒက်လဝ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် ဟိုတ်နူဒပ်ပၞာန်သီအဝဵုတုဲ အကြာအကာဲအရာပရေၚ်ဍုၚ်ကွာန် ဟွံညိၚ်ဝတ်ဂှ်ကဵု အခိၚ်ပရေၚ်ဂီုကၠီု သၞောဝ်ဥပဒေတံ ဂြုဲဂြဟ်စှ်ေကၠုၚ်ဒၟံၚ်ဂှ် ဒၟါနူပရေၚ်ကၠတ်ဂၠံက်ပၠံၚ်ၜး၊ ဒမၠမတာတံဂှ်တုဲ ညးဗြဴတံ ဒးဒုၚ်ဂစိုတ်လဝ်လေဝ် နွံဂှ် ညးဆက်ဟီုလဝ်ရ။
မွဲလ္ပာ်ပၠန်ဂှ် ညးဗြဴတံဝွံ အကြာကံၚ်ဇြဳပၞာန် ပ္ဍဵုပ္ဍိုက်ကၟာတ်ဒၞါဒၟံၚ်ဂှ် ပါလုပ်ဒၟံၚ် ပ္ဍဲပေါဲဗ္တိုက် ဗကပ်ဗဗေၚ် ဒစဵုဒစးသၞောတ်တၠအဝဵုပၞာန်ဂှ်ဖိုဟ်တုဲ ပ္ဍဲပၠန်ဂတးရပ်လွဟ်တံဂှ်လေဝ် နဒဒှ်သ္ဂံၚ်ညးဗြဴကီု၊ ကောန်ဒပ်ထံက်ပၚ်ဖာလက္ကရဴတံကီုဂှ် လုပ်ဒၟံၚ်ပေါဲဗ္တိုက်ဖိုဟ်ရ။
ပရိုၚ်−သြၚ်လောန်တိုၚ်(မ်)