ဒဳမအ်သဵု၊ အံက်တဝ်ဗာ (၁၁)
ဒပ်ကံၚ်ဇြဳပၞာန် ပန်ပှော်ဗ္တိုက်ဒၟံၚ် ကုဗ္ဒိုပ်ပါဲဒဴဘဲပၞာန် လ္ပာ်ပလိုတ်ဒဳမအ်သဵု၊ တွဵုရးကရေၚ်ဍာဲ နကဵုလွဟ်လက်နက်ဇၞော် ဟွံပိုတ်သ္ကုတ်ဂှ်ရ ညးဍုၚ်ကွာန်ပါဲဒဴဘဲပၞာန်တံဝွံ ဒးအောပ်မာဒၟံၚ် ပ္ဍဲဂဒုက်တံ ကၠိုဟ်အခိၚ်ရဂှ် ဂကောံဒပ်စဵုဒၞါညးဍုၚ်ကွာန်ဒဳမအ်သဵု ဟီုကဵု ဌာန်ပရိုၚ်သြၚ်လောန်တိုၚ်(မ်) ဂရ။
တုဲကၠုၚ် ဂိတုအံက်တဝ်ဗာ (၈) ဇိုၚ်သဝ်တ္ၚဲတေံဂှ် လွဟ်လက်နက်ဇၞော် နူဗ္ဒိုပ်ဗၠာဲသၟိၚ် ဒဳမအ်သဵုတံ ပန်ပှော်လဝ်ဂှ်ဝွံ ဒတုံစှ်ေဗ္တိုဟ်ထ္ကးအာလဝ် ပ္ဍဲဗ္ဒိုပ်ပါဲဒဴဘဲပၞာန်တံတုဲ ညးဗြဴၜါတၠ ကလိဂွံလဝ် ဝပ်ဇီုကပိုက် ဒးလဝ်တုဲ ပ္ဍဲကဵုဂှ် သၟတ်ဗြဴမွဲတၠ ဒးဂွိၚ်ဒၟံၚ် အန္တရာယ်လမျီုဂှ်ရ ဒးဒုၚ်ဝဳဒၟံၚ် ကာမံက်တိုန်ရ။
ညးဍုၚ်ကွာန်ပါဲဒဴဘဲပၞာန် ဒးဒုၚ်ပန်ပှော်ဒၟံၚ် နကဵုလွဟ်လက်နက်ဇၞော် ကံၚ်ဇြဳပၞာန်တံဂှ် သွက်ဂွံမံၚ်အာ နကဵုသတိဝဳရိယ ဇၟာပ်ပ်အခိၚ်ဂှ် ဖ္တိုက်ဖ္အောဝ်ကဵုလဝ်သမ္တီဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ဒဳမအ်သဵုမွဲတၠ ဟီုရ။
ပ္ဍဲကဵုဗ္ဒိုပ်ပါဲဒဴဘဲပၞာန် လ္ပာ်ပလိုတ်ဒဳမအ်သဵုတံဂှ် ညးပါဲဒဴဘဲပၞာန်မွဲကိုဋ်ပြၚ် နွံဒၟံၚ်တုဲ ဒၞါဲတံဏံ ဟိုတ်နူဒးအာလဝ်လွဟ်ဇၞော်တုဲ ညးဍုၚ်ကွာန် ဇီုကပိုက်ပြဟ်လလုဲ နွံဒၟံၚ်ဗွဲမဂၠိုၚ်ဂၠေၚ်ရ။
အတိုၚ်စရၚ် ဂကောံရီုဗၚ်ပရေၚ်မၞိဟ် ကရေၚ်ဍာဲတံဂှ်မ္ဂး ပ္ဍဲတွဵုရးကရေၚ်ဍာဲဂှ် ကောန်အရာပ် လ္ပာ်ကံၚ်ဇြဳပၞာန်တံ ပန်ပှော်လဝ် နကဵုတၚ်ရန်တၟံနွံနွံဂှ် နွံဒၟံၚ် (၂၇၅) တၠရောၚ် ဂွံတီကေတ်ရ။
ကြဴနူဒပ်ပၞာန်သီအဝဵု ကၟိန်ဍုၚ်ဗၟာတုဲ ညးဍုၚ်ကွာန်ထောံလသာဌာန်ဒၟံၚ်တံ နွံဒၟံၚ် ဂၠိုၚ်ကဵုပြကောဋိကိုဋ်တုဲ နွံပၟိက်ဒၟံၚ်ကဵု အရီုဗၚ်စပ်ကဵုပရေၚ်ဗ္စာရဏာမၞိဟ် ကာမံက်တိုန် သွက်ညးတံဂှ်လေဝ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)