မတ်မလီု၊ အံက်တဝ်ပါ ၂၁
ပ္ဍဲကဵုပေါဲရုဲမာဲကဝ်မယှေန်ပၞာန် ကၠောန်အာဏံမ္ဂး အပ္ဍဲကဵု အလံၚ်အမာတ် ဗော်ညဳသၟဟ်မန် ၃၈ တၠတံဂှ် ညးကေၚ်ပြိုၚ်လဝ်ပေါဲရုဲမာဲကၠာတေံ ၁၀ တၠတံ ပါလုပ်မံၚ်ရောၚ် ညးအခေါၚ်ဟီုဂးနွံ နာဲတာန်ယှိုဲ ဟီုကဵုဌာန်ပရိုၚ်သြၚ်လောန်တိုင်မ်ရ။
နူကဵုကဝ်မယှေန်ပေါဲရုဲမာဲကၟိန်ဍုၚ် သၟဝ်တဲကဝ်မယှေန်ပၞာန်တံဂှ်တှ်ေ ယၟုအလံၚ်အမာတ် ညးလုပ်ပြိုၚ်မာဲတံဂှ် နကဵုဗီုပြၚ် (၁၀)၊ ဗီုပြၚ်(၁၀-က) ကေုာံ ဗီုပြၚ် (၁၀-ခ) တံ စနူကဵုဂိတုအံက်တဝ်ပါ ၁၉ ဂှ်တုဲ ဗာန်စွံလဝ် ပ္ဍဲကဵု ဒၞာဲရုၚ်ကဝ်မယှေန်ပါ် ရးဒေသဇၞော်၊ တွဵုရး၊ ခရိုၚ်၊ ပွိုၚ်ဍုၚ်တံသၟးဟွံက ပ္ဍဲကဵုရုၚ်ပရေၚ်အုပ်ဓုပ်အရာပ်/ ကွာန် မဆေၚ်စပ်တံရောၚ် လလောၚ်တြးလဝ်ရ။
နကဵုဗော်ညဳသၟဟ်မန် အတိုၚ်ပတိုန်လဝ်စရၚ် ယၟုအလံၚ်ညးစၞးအမာတ် သီုကဵု ၃၈ တၠ သီုဖအိုတ်တံ ယၟုကလေၚ်စှ်ေကၠုၚ်လဝ်တုဲ အပ္ဍဲဏံ ညးကေၚ်လုပ်ပြိုၚ်လဝ်မာဲ ပေါဲရုဲမာဲကၠာကၠာတေံ ညးစၞး အလံၚ်အမာတ်တြေံ ဒံက်တာဗညာအံၚ်မဵု၊ နာဲလျးတၟး၊ မာံအံၚ်ထူတံ ယၟုကလေၚ်ပါကၠုၚ် ဂွံဆဵုရ။
ကဵုလဝ်ဖျုန်ကဵု ညးစၞးအလံၚ်အမာတ်တြေံတံ ရုဲစှ်လဝ်မဒှ်တုဲ ပ္ဍဲကဵုပွိုၚ်ဍုၚ်ဂမၠိုၚ်မ္ဂး ညးစၞးအလံၚ်အမာတ်တြေံ ၁၀ တၠ ပါလုပ်ကၠုၚ်ရောၚ် ညးအခေါၚ်ဟီုဂးနွံ ဗော်ညဳသၟဟ်မန် နာဲတာန်ယှိုဲ ဟီုကဵုဌာန်ပရိုၚ်သြၚ်လောန်တိုင်မ်ရ။
“ဗီုပြၚ်ရုဲစှ်ဟီုဂှ်တှ်ေ ပိုဲကဵုလဝ်ဖျုန်ကဵု အလံၚ်အမာတ်ညးစၞးတြေံတံ ညးလဵုလုပ်ပေါဲရုဲမာဲရော နူကဵုဗော်အာတ်စရၚ်ညးတံကၠာ၊ တုဲပၠန် ညးလဵုတံ စိုတ်လုပ်စရော ပ္ဍဲ CEC ပိုဲ ကဵုစရၚ်ကဵုဗော်ညိ။ ဍာ်ဒကေဝ် အစောန်စရာဲခုတ်စၟတ်လဝ်တံနွံမံၚ် ပိုဲစၟဳစၟတ်တုဲ ပတိုန်ထ္ၜးကဵုဏာ။ ပ္ဍဲပွိုၚ်ဍုၚ်ရေဝ် မၞိဟ်တြေံပါ ၃ တၠ။ပ္ဍဲဇြပ်ဗု ပါ ၂ တၠ။ မုဟ်ဍၚ်ပါ ၂ ၊ ကျာ်မြဟ်ပါ ၂ သီုဖအိုတ် ၁၀ တၠပြၚ် ကလေၚ်ပါမံၚ်” သာ်ဝွံ သ္ဂးရ။
တုဲပၠန် ယၟုအလံၚ်အမာတ်ညးစၞးစှ်ေကၠုၚ်တုဲ မွဲလပါ်တေံ မွဲတ္ၚဲတုဲမွဲတ္ၚဲ ကြပ်ကၠုၚ်မံၚ်ကဵု တ္ၚဲရုဲမာဲကီုလေဝ် ကမၠောန်သွက်ညးစၞး အလံၚ်အမာတ်တံ ဂွံစန်ဒက်မာဲမာန်ဂှ် စပ်ကဵုပရေၚ်ဂီုကၠီု နူလပါ် ကဝ်မယှေန်ပေါဲရုဲမာဲ မုအရာမွဲသာ်မှ ဟီုဂးကၠုၚ်ဟၟဲဏီတုဲ သွက်ဂွံစန်ဒက်မာဲဂှ် ဒှ်မံၚ်အခက်အခုဲဖိုအ်ဏီ ညးဆက်ဟီုရ။
ပ္ဍဲကဵုပေါဲရုဲမာဲ ကဝ်မယှေန်ပၞာန်ကၠောန်အာဏံ နူကဵုဗော်ညဳသၟဟ်မန် သွက်စၠတ်ထဝ်ညးဍုၚ်ကွာန် ၇ တၠ၊ သွက်စၠတ်ထဝ်ကောန်ဂကူ သၞောတ်သ္ပစၞး PR ၆ တၠ၊ သွက်သၞောတ်မာဲဂၠိုၚ်ဇၞး FPTP ၆ တၠ၊ သွက်စၠတ်ထဝ်တွဵုရးမန် သၞောတ်သ္ပစၞး PR ၁၀ တၠကဵု သွက်သၞောတ်မာဲဂၠိုၚ်ဇၞး FPTP ၉ တၠတံ လုပ်ပြိုၚ်အာရောၚ် သ္ဂးရ။
မွဲလပါ်ပၠန် ကဝ်မယှေန်ပေါဲရုဲမာဲသၟဝ်တဲ ကဝ်မယှေန်ပေါဲရုဲမာဲဂှ်တှ်ေ ပ္ဍဲကဵုတွဵုရးမန် သီုအလုံ ၁၀ ပွိုၚ်ဍုၚ်ဂှ် ခုတ်စၟတ်လဝ် နဒဒှ်ဒၞာဲတိဍာ်ပေါဲရုဲမာဲမဒှ်တုဲ ဒဳဇြမ်ပါ ၂၈ ဏံ ပ္ဍဲကဵုကၠောန်အာပေါဲရုဲမာဲ သ္ကုတ် ၁ ဂှ်တှ်ေ ပ္ဍဲကဵုပွိုၚ်ဍုၚ် ကျိုက်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံ ကၠောန်ဗ္ဒျ်အာရောၚ် လလောၚ်တြးလဝ်ရ။
ပ္ဍဲကဵုပေါဲရုဲမာဲ ၂၀၂၀ တေံကီုလေဝ် ဗော်ညဳသၟဟ်မန်လုပ်ပြိုၚ်လဝ် ဒၞာဲဆန္ဒမာဲ ၄၅ နွံကၠုၚ်တုဲ ဂွံလဝ်ဇၞး ပ္ဍဲကဵုဒၞာဲဆန္ဒမာဲ ၁၂ ဒၞာဲ မဒှ်ကီုရ။
ပရိုၚ်-သြၚ်လောန်တိုၚ်မ်
Photo – MUP