နေပျဳတဝ် ၊ အံက်တဝ်ပါ ၂၇
ပ္ဍဲကဵုဍုၚ်ဗမာ ဒပ်ကဝ်မယှေန်ပၞာန်သီအဝဵုသ္ကိုပ်သ္က ဘိုအ်ဂွံကၠောန်အာပေါဲရုဲမာဲသ္ကုတ်ကဵုသ္ကုတ် အခိၚ်သှ်ေမံၚ်ၜိုတ် ၆၀ တ္ၚဲပြၚ်ဏံ နကဵုအာသဳယာန် ဂွံတာဒၞာဒှ်အာဟွံမာန်ပုဟ်ဂှ် ဝန်ဇၞော်ဍုၚ်သ္အာၚ်မလေဝ်ယှာ စှ်ေအလန်ဥက္ကဌ ဟီုပတိတ်နၚ်ရ။
ပေါဲရုဲမာဲဍုၚ်ဗမာ သွက်ဂွံကၠောန်အာ ပ္ဍဲကၞောတ်ဂိတုဒဳဇြမ်ပါဏံ နကဵုအာသဳယာန် ၜိုန်ရစဵုဒၞာဟွံမာန်ကီုလေဝ် မိက်ဂွံကဵု သီုညးဖအိုတ်တံပါလုပ်တုဲ ပေါဲရုဲမာဲပရေၚ်သၠးပွးဓရ်ယာနွံနွံရောၚ် ဥက္ကဌအာသဳယာန် မိုဟာမက် ဟာသေန် ဟီုလဝ်ကဵုအစာလိက်ပရိုၚ်တံ ပ္ဍဲကဵုအံက်တဝ်ပါ ၂၄ ရ။
ပ္ဍဲကဵုပေါဲရုဲမာဲ ဍုၚ်ဗမာဏံ ညးလ္ၚဵုရ အခေါင်ပါလုပ်နွံတုဲ ပါဲပတိတ်လဝ်ညးတၞဟ်လ္ၚဵုလ္ၚဵု ပေါဲရုဲမာဲဗီုပြၚ်တံဏံ ဟၟဲပၟိက်ကီု စပ်ကဵုပရူဏံတုဲ ပ္ဍဲကဵုကောံဓရီုအာသဳယာန် က္ဍိုပ်သ္ကိုပ်အဆံၚ်သၠုၚ်ပတိုန်ထ္ၜးအာရောၚ် ညးဟီုလဝ်ရ။
ပေါဲရုဲမာဲအလီဏံဂှ် ပဵုနူကဵု ဇြဟတ်ဟရိုဟ်ဂကောံဂၠးကဝ်တုဲ နကဵုဂကောံဇြဟတ်ပၠန်ဂတးတံဂှ် ဆက်တုဲ ၜိုတ်ဆစဵုစးစဵုဒၞာအာရနွံဂှ် ညးနွံအခေါၚ်ဟီုဂး မုက်ဒပ်ပၠတရဴ ကောန်ဂကူချေၚ် CNF သလိုၚ်ထက်နဳ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လ္တူပေါဲရုဲမာဲအလီ ကဝ်မယှေန်ပၞာန်ဏံ နူကဵုအာသဳယာန် ဗဒေါအ်ကဵုဟွံမာန် ဟီုကီုလေဝ် ဟွံထံက်ဂလာန်ပုဟ်ဂှ် ချိုတ်ပၠိုတ်။ အာသဳယာန်ဒှ်ဒှ် UN ဒှ်ဒှ် ဂကောံဂၠးကဝ်လဵုဒှ်ဒှ် ပဵုနူကဵုရမျှာၚ်ညးတံတုဲ နူကဵုပိုဲတံဂှ်တှ်ေ ပရေၚ်ဒုၚ်ဂိုၚ်ကေတ် လ္တူပေါဲရုဲမာဲအလီဏံ ဆက်ဒတူလိုၚ်အာခိုၚ်ခိုၚ်ဗိုန်တုဲ ဘိုအ်ဂွံဒစဵုဒစးအာရနွံ။ သွက်ဂွံရုဲစှ်ဂၠံၚ်တၞဟ် ဟၟဲပုဟ်” သာ်ဝွံ သ္ဂးရ။
ပ္ဍဲပရေၚ်သီအဝဵုဏံ ပရေၚ်ဒုၚ်ဒဝ်တဝ်စၞေဟ် ဂကောံဇြဟတ်ပၠန်ဂတးရပ်လွဟ်တံ စိုပ်ကၠုၚ်လဝ်သၞောတ်ထ္ၜတ်မွဲကီုတုဲ ဒဵုစိုပ်ဒၞာဲဌာန်ဂအုပ်ရးပၞာန်ဗမာတံ ကေၚ်လုပ်သီဗတိုက်ကၠုၚ်လဝ်နွံရ။
ဆဂးဂှ် နူကဵုအလဵုအသဳကြုက် ကဵုကၠုၚ်ဇြဟတ်ဟရိုဟ် လ္တူဂကောံရပ်လွဟ်ဒေသသၟဝ်ကျာတံ ကေုာံ လုပ်ကၠုၚ်အကြာပရေၚ်ဍုၚ်ဗမာကီုတုဲ စနူလဝေၚ်ပၞာန် ၁၀၂၇ သ္ကုတ်ဒုတိယ တုဲအာဂှ် ပါဲနူတွဵုရးရခေၚ်မ္ဂး ပ္ဍဲဒေသတၞဟ်ဟ် ပရေၚ်ချဳဒရာၚ်ပၞာန် ဇြဟတ်ယအ်စှ်ေအာရ။
လ္တူအကာဲအရာဏံ ကဝ်မယှေန်ပၞာန် ကေတ်အခေါၚ်အရာခိုဟ်တုဲ ပ္ဍဲဒၞာဲဒေသထိၚ်ချုက်မာန်လဝ်ပေၚ်ၚ်တံဂှ် ပလေဝ်ပလေတ်စလဝ် သွက်ဂွံကၠောန်အာပေါဲရုဲမာဲကီု ဒၞာဲဒေသဒးဗလးတဲလ္ၚဵုတံပၠန် ဍုၚ်ကိစ္စဇၞော်တံဂှ် နကဵုဇြဟဟ်ကောန်ပၞာန်တၟိ ယိုက်ဝန်ပၞာန်တံ ထပေၚ်ဇြဟတ်ကလေၚ်ပလန်ထပက်ပၞာန်မာန်ကၠုၚ်ရ။
စိုပ်ဒဳဇြမ်ပါ ၂၈ ဏံ ပေါဲရုဲမာဲသ္ကုတ် ၁ ဂှ် အလုံမွဲဍုၚ် ပ္ဍဲကဵု ၁၀၂ ပွိုၚ်ဍုၚ် စကၠောန်အာတုဲ သှ်ေမံၚ် ၁၀၀ ပွိုၚ်ဍုၚ်တံဂှ် အလန်ဒုတိယ သ္ကုတ် ၂ သွက်ဂွံဆက်ကၠောန်အာ ပ္ဍဲကဵုဂိတု ဂျာန်နဝါရဳ ဂိတုဂတးတံပၠန်ရောၚ်။
တုဲပၠန် လလောၚ်တြးလဝ် ဒၞာဲကၠောန်ပေါဲရုဲမာဲဟွံမာန် ၅၆ ပွိုၚ်ဍုၚ် နွံမံၚ်တုဲ နကဵုအလဵုအသဳတိုန်ကၠုၚ်တၟိတေံ သွက်ဂွံဆက်ကၠောန်အာ ကဵုပေါဲရုဲအကြာ ချပ်လဝ်နွံ က္ဍိုပ်သ္ကိုပ်ပၞာန် ဟီုလဝ်ရ။
ပေါဲရုဲမာဲကဝ်မယှေန်ဂှ် တက်ပေါဲအလီရောၚ် စၟတ်လဝ်တုဲ ပ္ဍဲကဵုဒၞာဲဒေသ ညးတံထိၚ်ချုက်လဝ်ဂှ် ဟွံကဵုအခေါၚ်ကၠောန်ဗဒှ်ကီု ဒစဵုဒစးဗတိုက်သၠေက်အာရောၚ် ဂကောံဇြဟတ်ပၠန်ဂတးတံ ဟီုပတိတ်လဝ်ရ။
ဂကောံဇြဟတ်ပၠန်ဂတးတံ ဗီုလဵုပလီုပလီု ဒၞာဲတိဍာ်ဒေသ ဍေံတံကၠောန်ဏာဂွံဂှ် ဍံက်ကၠောန်အာရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“ပေါဲရုဲမာဲ ဍေံတံ(စကမ) ဘိုအ်ဂွံဒှ်ဟွံမာန် ပရူပရာဟၟဲပုဟ်။ မုဒှ်ရောတှ် ညံၚ်ဂွံဒှ် ဍေံတံကၠောၚ်တွဵုဏောၚ်။ လက်ကြဴအိုတ် ဍေံတံကၠောန်အပ္ဍဲဗွိုၚ် ဒပ်ပၞာန်ဍေံသၟးဂှ် ပေါဲရုဲမာဲတုဲအာယျ ဟီုဏောၚ်။ နကဵုဂကောံပၞာန်ဍေံဂှ် ညးလဵုဒုၚ်တဲဒှ်ဒှ် ဟွံဒုၚ်တဲဒှ်ဒှ် ဍေံတံစိုတ်ဟွံလုပ်စပုဟ်။ ပြဟ်ဟ်ဏံ မူဍေံတံဂှ် ညးဂှ်ဟီုဟီုလက်လက်မံၚ် (ပေါဲရုဲမာဲသ္ကုတ် ၁) မွဲပေါဲညံၚ်ဂွံတုဲအာရ ဍေံတံစွံလဝ်အရီု။ ဟိုတ်ဂှ်တှ်ေ မွဲပေါဲဏံညံၚ်ဂွံတုဲဒှ် ကၠောန်အာဏော” သာ်ဝွံ သ္ဂးရ။
အလဵုအသဳတၟိ မံက်တိုန်ကၠုၚ် နူကဵုပေါဲရုဲမာဲဏံကဵု က္ဍိုပ်သ္ကိုပ်ပၠန် ပြံၚ်လှာဲကေတ်အဝဵုတံဂှ် ဆက်ထပက်အာပၞာန် ပ္ဍဲကဵုဒၞာဲတိဍာ် ဒးဗလတဲတံတုဲ သဘဴဍေံတံ သွက်ဂွံဆက်ကၠောန်အာ ပေါဲရုဲမာဲအကြာပၠန် ညးဆက်ဟီုရ။
လၟုဟ် ပ္ဍဲကာလဒစးဒုၚ်ပေါဲရုဲမာဲဏံ စရၚ်အလံၚ်အမာတ် ညးလုပ်ပြိုၚ်ပေါဲရုဲမာဲတံဂှ် နူကဵုကဝ်မယှေန်ပၞာန်တံ ဗါန်စွံလဝ်ပ္ဍဲကဵုဒၞါဲ ဂကောံပါ် ရုၚ်ကဝ်မယှေန်ပွိုၚ်ဍုၚ်ကဵု ရုၚ်ပရေၚ်အုပ်ဓုပ် အရာပ်/ကွာန်ဆေၚ်စပ်တံတုဲတုဲ မဒှ်ရ။
မွဲလပါ်ပၠန် သွက်ပေါဲရုဲမာဲ ပရေၚ်ကဵုပညာ စက်ကဵုမာဲအဳလက်ထရဝ်နေတ်ကီု သွက်အလံၚ်အမာတ်တံ ပကောံမၞိဟ်ကၠောန်အာပေါဲဟီုတွံတံကီု အခေါၚ်စန်ဒက်မာဲတံကီု အကြာတ္ၚဲတံဏံစကဵုအာအခေါၚ်ရောၚ် ဂွံတီရ။
သွက်ဂွံသောၚ်ကလးပရေၚ်ပြဿနာဍုၚ်ဗမာဂှ် ပေါဲရုဲမာဲဍုၚ်ဗမာဏံ သွဟ်ဟွံသေၚ်ပုဟ် အာသဳယာန်ဟီုလဝ်ကီုလေဝ် ဖျေံသ္ဂုတ်သွာတ် ပိုတ်ပိုတ်တုဲ တးပါဲဒစဵုဒစးလဝ် ဟၟဲဏီရ။
နကဵုအာသဳယာန်ပါလုပ်ဆေၚ်စပ်မံၚ်ကဵု အမှုရာဇဝတ်ဂၠးကဝ် ဒပ်ပၞာန်ဗမာ မွဲကသပ်မွဲဂၞန်ကီုဂှ် ညံၚ်ဂွံဒေါအ်ထောံတုဲ ထေက်ကဵု ဒးဒစဵုဒစးအာ ပေါဲရုဲမာဲရောၚ် Justice for Myanmar အာတ်မိက်လဝ် ပ္ဍဲအံက်တဝ်ပါ ၂၄ တေံရ။
ပ္ဍဲကဵုဍုၚ်မလေဝ်ယှာ စှ်ေအလန်ဥက္ကဌအာသဳယာန် ပ္ဍဲကဵုကွာလာလာမ်ပူ စနူအံက်တဝ်ပါ ၂၆ ဒဵု ၂၈ ကၠောန်ဗ္ဒျ်အာ ကောံဓရီု က္ဍိုပ်သ္ကိုပ်အာသဳယာန်အဆံၚ်သၠုၚ် မရနုက်ကဵု ၄၇ ဝါ ကၠာဟွံစိုပ်ဂှ် Justice for Myanmar ပတိတ်လိက်လလောၚ်တြး အာတ်မိက်လဝ်ရ။
ပရိုၚ်-သြၚ်လောန်တိုၚ်မ်
Photo – MOI