နျူဒေလဳ၊ မေ (၈)
ပ္ဍဲတွဵုရးမဟာရာတ်(ယှ်)ထရာ (Maharashtra) ပလိုတ်ဍုၚ်အိန္ဒိယဂှ် ပပ္တံနူကၞောတ်ဂိတုမာတ်အိုတ်တုဲ ဟိုတ်နူဘဲဒဏ်ဓာတ်ကမ္တဴလောန်ကာဲတုဲ မၞိဟ် မဒးချိုတ်အာ (၂၅) တၠနွံတုဲ ဒှ်ပရေၚ်ချိုတ်ဂျိုၚ်သၠုၚ်အိုတ် အပ္ဍဲပွိုၚ် (၅) သၞာံလောန်ကၠုၚ်ဏံဂှ်ရ။
ဒၞါဲဒေသတၞဟ်သ္အာၚ် ဗ္ၜတ်ကမ္တဴ သၠုၚ်နူ (၄၀) ဒဳဂရဳသေဲသဳယာတ်တံဂှ်လေဝ် ပရေၚ်ချိုတ်ဂျိုၚ် သာဂၠိုၚ်မာန်ဂှ် သ္ဂးရ။
တၠပညာသိပ္ပံဂမၠိုၚ်ဂှ် ပ္ဍဲတမ်ရာသဳဥတုက္ညၚ်ဂှ် ဆက်စပ်ဒၟံၚ်ကဵု ရာသဳဥတုပြံၚ်သၠာဲတုဲ သတီုမၞိဟ် မၞုံပ္ဍဲအိန္ဒိယ ကေုာံ ဍုၚ်ဇိုၚ်ဝုတ်ဒိုဟ်ပါကေဿတာန် မွဲဗဳလျာန်ပြၚ်ဝွံ အယောၚ်အလာဒးဒုၚ်ဘဲဒဏ်ဓာတ်ကမ္တဴ ပရေံပရေံ မွဲနဲဟွံသေၚ်မွဲနဲ နွံဂှ် သ္ဂးလဝ်ရ။
ပ္ဍဲဂိတုကၠုၚ်စိုပ်ဏံမ္ဂး စၟဳလဝ် ဗြဲမုဟ်သုန် မၜိုဟ်ဂံက်တံတုဲ ဒၞါဲဒေသအိန္ဒိယလ္ၚဵုတံဂှ် ဟိုတ်နူဇြဟတ်ဓာတ် ပိုတ်ပၠိုတ် မွဲဏှမွဲဏှဂှ်ရ သ္ၚိကၟိန်မစုတ်စက်ဗလးကဵုကျာဗၜိုဟ် (air con) မာန်တံလေဝ် အပ္ဍဲသတ္တာဟမကၠုၚ်စိုပ်ဂတတံဏံမ္ဂး ညိညဓဝ်ဟေၚ် ဂွံအာရောၚ်။
ပ္ဍဲကွာန်ရး နူတွဵုရးသိုက်အိုတ် မၞုံပ္ဍဲအိန္ဒိယ မချိုတ်ဂျိုၚ်ဂၠိုၚ်တံဂှ် က္တဵုဒှ်လဝ်တုဲ “ဟိုတ်နူဘဲဒဏ်ဓာတ်ကမ္တဴတံတုဲ ချိုတ်အာလဝ်ဂှ် သံသယနွံ” သာ်ဝွံ သၞာဲဒဴပရေၚ်ထတ်ယုက် မဟာရာတ်(ယှ်)ထရာ ဟီုကဵု ဌာန်ပရိုၚ်ရိုက်တာရ။
အိန္ဒိယဝွံ ပ္ဍဲဂၠးတိဏံ ဒှ်ကၟိန်ဍုၚ် ကၠောန်ပ္တိတ်သြောံ၊ဂျုၚ် ဒုတိယဂၠိုၚ်အိုတ်မွဲကီုလေဝ် ဟိုတ်နူဘဲဒဏ်ဓာတ်ကမ္တဴတုဲ ဒမြိပ်သြောံတိတ် သၞာံဏံ အောန်စှ်ေအာလဝ်ရ။
အိန္ဒိယဝွံ စၟတ်သမ္တီလဝ် နဒဒှ်ဂိတုမာတ်ကမ္တဴအိုတ် အပ္ဍဲပွိုၚ်ကၠံသၞာံပြၚ်တုဲ အလုံမွဲကၟိန်ဍုၚ် ဗ္ၜတ်ကမ္တဴသၠုၚ်အိုတ် စဵုကဵု ၃၃ ဒဿမ ၁ ဒဳဂရဳသေဲသဳယာတ် သၠုၚ်တိုန်ကၠုၚ်လဝ်တုဲ လ္တူနူဓမ္မတာဂှ် ဗ္ဒါဲ ၁ ဒဿမ ၈၆ ဒဳဂရဳ နွံရောၚ် နူဌာန ဗြဲကျာအိန္ဒိယ လလောၚ်ပ္တိတ်လဝ်ရ။
ဒေသသၟဝ်ကျာ၊ ပလိုတ် ကေုာံ ဗၟံက် အိန္ဒိယ ဗွဲမဂၠိုၚ်ဂၠေၚ် ပ္ဍဲဂိတုတုဲကၠုၚ်တေံ ဗ္ၜတ်ဂမ္တဴ သၠုၚ်တိုန်ကၠုၚ် စဵုကဵု ၄၀ ဒဳဂရဳသေဲသဳယာတ် ရ။
ပ္ဍဲတွဵုရးအိုဝ်ဒဳယှာ သ္ကုတ်ဗၟံက်ဂှ် ပ္ဍဲဂိတုဨပရဴ (၂၅) ဂှ် ဟိုတ်နူဘဲဒဏ်ဓာတ်ကမ္တဴတုဲ မၞိဟ်တြုံအာယုက် (၆၄) မွဲတၠ ချိုတ်အာလဝ်တုဲ ဂၠိုၚ်ကဵုကၠံ ဒးဒုၚ်လွဳလွတ်လဝ်ဂဥုဲရဂှ် သၟိၚ်တၠအဝဵုတံ ဟီုဂးလဝ်ရ။
Ref: CNA