ဍာ်ဗု၊ အံက်တဝ်ဗာ (၁၅)
ပ္ဍဲသၞေဟ်ကၚ်စၟဳစၟတ် ကံၚ်ဇြဳပၞာန် မၞုံဒဒန်ကလိန်အံၚ်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳ ဒးဒုၚ်ဗ္တိုက်ဂှ် ကောန်ဒပ်ကံၚ်ဇြဳပၞာန် (၄) တၠ ချိုတ်တုဲ ဟွံအောန်နူကဵု (၂) တၠ ဂွံဝပ်ဂှ် လျိုၚ်ဂကောံဒပ်စဵုဒၞါညးဍုၚ်ကွာန်ဒေသတံ ဟီုရ။
တုဲကၠုၚ် ပ္ဍဲဂိတုအံက်တဝ်ဗာ (၁၄) ပယျာံဂယး (၃) နာဍဳဂှ် ဂကောံဒပ်စဵုဒၞါညးဍုၚ်ကွာန်တံ အာစိုပ်ကၠတ်ဗ္တိုက်လဝ် သၞေဟ်ကၚ်စၟဳစၟတ် ကောန်ဒပ်ကံၚ်ဇြဳပၞာန် ဇြဟတ်ၜိုတ် (၁၅) တၠမၞုံ မကေတ်လဝ်ပရေၚ်ဂီုကၠီု ပ္ဍဲဒၞါဲဂှ်ရ။
အပ္ဍဲပရေၚ်ဗ္တိုက်ဏံဂှ် မွဲလ္ပာ်ကုမွဲလ္ပာ် က္တဵုဒှ်လဝ် ပရေၚ်ပန်ပှော် လလအ်ပွိုၚ်မွဲနာဍဳကဝက်တုဲ လ္ပာ်ဂကောံဒပ်စဵုဒၞါညးဍုၚ်ကွာန်တံဂှ် ပွမဇီုကပိုက်ဒးမွဲမွဲသာ် ဟွံမွဲတုဲ ဆုတ်ကလေၚ်တိတ်အာလဝ် ဗွဲမအံၚ်ဇၞးမာန်ရ။
ဇွ ကောန်ဒပ်ကံၚ်ဇြဳပၞာန် မချိုတ်အာလဝ် အပ္ဍဲပရေၚ်ပန်ပှော်ဂှ်ကဵု ညးမဇီုကပိုက်ကလိဂွံလဝ်ဝပ်တံဂှ် နူကောန်ဒပ်ကံၚ်ဇြဳပၞာန် မကၠုၚ်ကဵုအရီုဗၚ်ပၞာန်တံ ကလေၚ်ယိုက်ဏာလဝ် ဇရေၚ်တမ်ဒပ် လၟိဟ် (၄၀၆) ဂှ် ဂွံတီကေတ်ရ။
ကြဴနူက္တဵုဒှ်ပရေၚ်ပန်ပှော်တုဲဂှ် ဇြဟတ်ဒပ်ကံၚ်ဇြဳပၞာန် (၃၀) ပြၚ်ဝွံ မွဲဒမြိပ်ဇိုၚ်ၜဳဂှ် ဗက်ဂၠါဲဒၟံၚ် ဂကောံဒပ်စဵုဒၞါညးဍုၚ်ကွာန်တံ စေအ်အ်တုဲ ကၟာတ်ဆိုအ်ဗစၟဳစၟတ်ကၠုၚ်ဒၟံၚ် ကုညးဍုၚ်ကွာန်အာကၠုၚ်တံဂှ် နွံရ။
သၞေဟ်ကၚ်စၟဳစၟတ်ကံၚ်ဇြဳပၞာန် မၞုံဒဒန်ကလိန်အံၚ်ဂှ် ကောန်ဒပ်ကံၚ်ဇြဳပၞာန်တံဝွံ မ္ၚးနူကွဳစက်အာတရဴတံကဵု ညးအာတရဴတံဂှ် သီုကဵုကွဳလိုန်ဓာတ် အာကၠုၚ်ဒၟံၚ်တံကဵု ရဲသွံဖျာတံဂှ်လေဝ် ရပ်ဒက်တုဲ အာတ်မိက်သြန်တံ မွဲဏှမွဲဏှ လေပ်ကၠောန်သ္ပရဂှ် ညးဒေသတံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)