ကျာ်ထဝ်၊ အံက်တဝ်ဗာ (၁၅)
ညးဍုၚ်ကွာန် အာလ္ၚောဝ်ကျာ် မဒးဇီုကပိုက်ချိုတ်အာ အပ္ဍဲပရေၚ်ပန်ပှော် သၞေဟ်ကာတိုန်ဒဵု ကျာ်ဣသိယဵု၊ တွဵုရးဍုၚ်မန်ဂှ်ဝွံ ဟိုတ်ဒၟါနူကောန်ဒပ်ကံၚ်ဇြဳပၞာန်တံ ပန်ပှော်လဝ်ကြာန်ကြာန်ရဂှ် ဗော်သွးကောန်ဂကူကရေၚ် (KNU) လလောၚ်ပ္တိတ်လဝ် ပ္ဍဲဂိတုအံက်တဝ်ဗာ (၁၄) ဂှ်ရ။
တုဲကၠုၚ် ဂိတုအံက်တဝ်ဗာ (၁၂) တေံဂှ် ဂကောံဇြဟတ်ပၠန်ဂတး မဟာမိတ်တံ အာစိုပ်ဗ္တိုက်လဝ် ဂကောံဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲသၞေဟ်ကာတိုန်ဒဵု ကျာ်ဣသိယဵုဂှ်ရ။
အပ္ဍဲပရေၚ်ပၞာန်ဏံဂှ် လ္ပာ်ကံၚ်ဇြဳပၞာန် ဟိုတ်နူပန်ပှော်လဝ် လွဟ်လက်နက်ဇၞော်ဍောတ်တံ ကြာန်န်ဂှ်ရ ကၟုဲလ္ၚောဝ်ကျာ် ညးဗြဴ (၃) တၠ ဒးမကမ်သေနာတ် ချိုတ်အာလဝ်တုဲ (၁၃) တၠ ကလိဂွံလဝ်ဝပ်ရောၚ်ဂှ် KNU သ္ဂးလဝ်ရ။
အပ္ဍဲပရေၚ်ဗ္တိုက်ဂှ် နူကဵုကုန်ဗ္ဒိုပ်ဗၠာဲသၟိၚ် ဂြိုပ်ကပေါဝ်ဂှ် ဘိုၚ်ပန်ကဵုလဝ် နကဵုလွဟ်လက်နက်ဇၞော်တံဂှ်ရ လွဟ်လက်နက်ဇၞော်တံဝွံ ဒတုံဗ္တိုဟ်ထ္ကးလဝ် လ္တူကၟဳသ္ၚိ ဒဝ်လှယှိုဲ သ္ကုတ် (ကျောၚ်းစု) ကွာန်ဂြိုပ်ကပေါဝ်ဂှ်တုဲ ကောန်ဗၠာဲဥူတာန်ဨ သဝ်နာန်ဝေန်ဝွံလေဝ် ဒးအာလဝ် ကဝေက်လွဟ်ဇၞော် ပ္ဍဲကဵုတဲလ္ပာ်ပုၚ်ဂှ် သ္ဂးရ။
သ္အာၚ်နူဂှ်ပၠန် ဂတမုက်ဆေၚ်ဖျေအ်ဖျောန် (အောၚ်အောၚ်) ဂှ်လေဝ် လွဟ်လက်နက်ဇၞော် ဒတုံဗ္တိုဟ်ထ္ကးအာတုဲ လက္ကရဴစး ဒဝ်ဂျာန်ဗီု အာယုက်မၞုံ ပွဳပွူ (၄၀) ဂှ်ကဵု တဲလ္ပာ်ပါဲ ကောန်ဝုတ်ညး အာယုက် (၅) သၞာံ မၞုံယၟု (မဝက်မလေး) ဂှ်လေဝ် ဒးကဝေက်လွဟ်ဇၞော်တုဲ ဒးဒုၚ်ဝဳဝတ်ဒၟံၚ် ပ္ဍဲရုၚ်ဂဥုဲညးဍုၚ်ကွာန်ကျာ်ထဝ်ဂှ် လလောၚ်ပ္တိတ်လဝ်ရ။
လ္ပာ်ကံၚ်ဇြဳပၞာန်ဂှ် ပရေၚ်ဗ္တိုက်ဏံဝွံ ဒပ်မဟာ (၁) KNLA ကေုာံ ဂကောံ PDF သၟဝ်တဲ NUG, CRPH တံ ဟိုတ်ဟွံမွဲ ပန်ပှော်လဝ်လွဟ်လက်နက်ဇၞော်ဍောတ်တံဂှ်ရ ညးဍုၚ်ကွာန်အာလ္ၚောဝ်ကျာ် (၃) တၠ ချိုတ်တုဲ (၁၉) တၠ ကလိဂွံလဝ်ဝပ်ဇီုကပိုက်ဒးလဝ်ရောၚ် တုဲကၠုၚ်ဂိတုအံက်တဝ်ဗာ (၁၂) တေံ လလောၚ်ပ္တိတ်လဝ်ရ။
ညးဒုၚ်တာလျိုၚ် PDF ခရိုၚ်သဓီု ကိုဝ်ဨမေန်ထောန်ဂှ်လေဝ် ပ္ဍဲပရေၚ်ပန်ပှော်ဏံ ဂကောံလဵုပန်လဝ် ညးဍုၚ်ကွာန်တံရောဟီုဂှ် နကဵုကံၚ်ဇြဳပၞာန် နွံပၟိက်ဒးထ္ၜးကဵု စၟတ်သမ္တီ CCTV ပ္ဍဲသၞေဟ်ကာတိုန်ဒဵုတံ ကုညးဍုၚ်ကွာန်တံရောၚ်ဂှ် ဟီုရ။
ပ္ဍဲဂိတုအံက်တဝ်ဗာ (၁၄) ဂှ် နကဵုအကံက် ထလဳဂရာမ် ညးထံက်ဂလာန်ဒပ်ပၞာန်တံ ၜိုန်ရထ္မံက်ထ္ၜးလဝ် စၟတ်သမ္တီ CCTV ဂၠေံဂၠေံ ၜါဖိုၚ် စပ်ကဵုပရေၚ်ပန်ပှော်သၞေဟ်ကာတိုန်ဒဵုကျာ်ဣသိယဵုဂှ်ကီုလေဝ် စၟတ်သမ္တီ CCTV နူဒကဴနာနာသာ် ပ္တိုန်လဝ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)