ဝါယှေန်တာန်၊ အံက်တဝ်ဗာ (၁၅)
တိုက်သြန်ဗဟဵုအာယှ ဗွဲမဂၠိုၚ်ဝွံ ဟိုတ်နူၚုဟ်ဗွဝ်ဖျာ သၠုၚ်တိုန်ကၠုၚ် ကေုာံ ၚုဟ်မးသၠုဲသၠာ်တံ သဝ်စှ်ေဒၟံၚ်ဂှ်ရ သာတုဲ ဒးပတေၚ်ဂြတ်ကၠုၚ် မူဝါဒသြန်ဖောဝ်တံရဂှ် ဂကောံသြန်ဗွဝ်သၠုဲသၠာ်ဍုၚ်သ္အာၚ်တံ ဟီုရ။
ပရေၚ်ပိုန်ဒြပ် ကြုက် ကေုာံ ဂျပါန်တံ ကလေၚ်ယာကၠုၚ်က္ဍိုပ်ဂှ်ဝွံ ၜိုန်ရဒှ်အရာတၟေၚ်တၟဟ်တံကီုလေဝ် တၚ်ဍိုန်လျ ပရေၚ်ပိုန်ဒြပ်တံဏံ သှ်ေဒၟံၚ်ညိညဏီဂှ် သ္ဂးရ၊ ပြဟ်ဟ်ဏံ ကၟိန်ဍုၚ်တံဏံဝွံ သြန်ဖောဝ်သၠုၚ်တိုန်ကၠုၚ် ပြာပြာကတ်တ် ဟွံမွဲပုဟ်ဂှ် IMF ခရေသ်နာ ဟီုရ။
နူကဵုသြန်လှုဲအမေရိကာန် မတေၚ်ဂြတ်ဂှ်မွဲကဆံၚ် အရာမတၞဟ်ခြာ စပ်ကဵုအိက်သြန်တံ သ္ကဵုသၠဲလးကၠေံတုဲ ပ္ဍဲကၟိန်ဍုၚ်ဂမၠိုၚ် ခရိတ်ဗၞိက်ပၠောပ်တံ သၠုၚ်တိုန်ကၠုၚ်ဂှ်ရ သြန်အာယှဗွဲမဂၠိုၚ်ဝွံ သဝ်စှ်ေအာ တီတီဒှ်ဒှ်ရဂှ် ညးသ္ဂးရ။
ဟိုတ်ဂှ်ရ ညးဝွံ စပ်ကဵုသြန်ဖောဝ် မကလေၚ်သၠုၚ်တိုန်ကၠုၚ်မာန် ပ္ဍဲကဵုကၞောတ်သၞာံဏံဂှ်တုဲ မူဝါဒသၠုဲသၠာ်ဍုၚ်အာယှတံဂှ် ထေက်ကဵုဒးပတေၚ်ဂြတ်ပ္တိုန်ယျဂှ် ဟီုဂးလဝ်ရ။
ၚုဟ်မးသြန်လှုဲတံ သဝ်စှ်ေ ကေုာံ အိက်သြန်တံ သၠုၚ်တိုန်ကၠုၚ်ဂှ်ဝွံ ပ္ဍဲဍုၚ်အာယှ ခတှ်ဂၠိုၚ်တံဂှ် သ္ကဵုဒှ်ကၠေံ အရာဂြတ်ဂြက်စပ်ကဵု သြန်လှုဲမာန်ဂှ် သဳရဳနဳဗာသာန် ကဵုလဝ်သတိရ။
“အာယှဝွံ အခိၚ်လၟုဟ် ဒှ်ကၠုၚ်မၞိဟ်ဒးကဵုခတှ် ဂၠိုၚ်အိုတ်ဂှ်တုဲ မွဲလ္ပာ်တေံ ဍုၚ်မဂၠေံကဵုလဝ်သၠုဲတံ ဗွဲမဂၠိုၚ်ဂၠေၚ်ဝွံလေဝ် သွက်သ္ဂောံကလေၚ်ဂွံခတှ်ဂှ် အရာဒှ်ဓဝိၚ် က္တဴက္တာန်တံ စိုပ်ဒၟံၚ်ကဆံၚ်သၠုၚ်အိုတ်ရောၚ်“ ဂှ် ညးသ္ဂးရ။
ခတှ် အာယှဗွဲမဂၠိုၚ်ဂှ်ဝွံ ဒှ်ဒၟံၚ်ခတှ် လ္တူဍုၚ်ကြုက်သၟးရဂှ် သဒၚ်ဂြာသ္ကိုပ်စၞောန်ပ္ညုၚ် နူဌာနစပ်ကဵုဒေသအာယှ ကေုာံ ပသိဖေတ်(ခ်) IMF ဟီုဂးလဝ်ရ။
Ref: Reuters