မတ်မလီု၊ အံက်တဝ်ဗာ (၁၅)
ကမၠောန်သိုၚ်ခၞံ အပ္ဍဲတွဵုရးဍုၚ်မန်တံဝွံ ၜိုန်ရစိုပ်ကၠုၚ်ရာသဳမတ်ကျာတၟးကီုလေဝ် ဒၟါနူၚုဟ်ကပေါတ်ဗၞိက်အပြောတံ သၠုၚ်တိုန်ဒၟံၚ် ကဵုဆဂှ်ရ ကမၠောန်ဗွဲမဂၠိုၚ် ကလေၚ်စဟွံမာန်ရပုဟ်ဂှ် တၠကမၠောန်ပရေၚ်သိုၚ်ခၞံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ပရေၚ်သိုၚ်ခၞံတံဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် ၚုဟ်ဒဝ်ဠာ သၠုၚ်တိုန်ကၠုၚ် ကဵုဆကီု၊ ၚုဟ်မးသြန်ဗမာ စှ်ေတုဲ ကပေါတ်ဗၞိက်အပြောံ အရပ်စပ် ပရေၚ်သိုၚ်ခၞံတံ ၚုဟ်က္ဍၚ်တိုန်ကၠုၚ်ကဵုဆဂှ်ရ ဒးဒေါအ်ဇူလဝ် ကမၠောန်တံရ။
အခိၚ်လၟုဟ်ဂှ်လေဝ် ကမၠောန်ပရေၚ်သိုၚ်ခၞံတံဝွံ ဟိုတ်နူၚုဟ်ကပေါတ်ဗၞိက် သၠုၚ်တိုန်ဒၟံၚ်တုဲ ကမၠောန် ဟွံအောန်နူကဵု (၆၀) တၟံကၠံ ဆက်ဒေါအ်ဇူဒၟံၚ်တုဲ ကမၠောန်လ္ၚဵုတံဂှ်မ္ဂး ကမၠောန်စကၠောန်လဝ်တုဲတံဂှ် ဒုၚ်ကျတုဲ ဒးဆက်ကၠောန်ဒၟံၚ်ရောၚ် တၠကမၠောန်ပရေၚ်သိုၚ်ခၞံမွဲတၠ ဟီုရ။
“ၚုဟ်ဖျာတံ သၠုၚ်တိုန်ဒၟံၚ် ကွေံကွေံဏောၚ်၊ ၚုဟ်ကပေါတ်သိုၚ်ခၞံတံ က္ဍၚ်ဒၟံၚ် ကွေံကွေံတုဲ ဗွဲမဂၠိုၚ် ဒေါအ်လဝ်အိုတ်ရ၊ ဗွဲမဂၠိုၚ်ဂှ်တှ်ေ ဇူဒၟံၚ်ဖိုဟ်၊ ၜိုတ် (၆၀) တၟံကၠံ ဒေါအ်ထောံအိုတ်ရ၊ လ္ၚဵုတံဂှ်တှ်ေ ကမၠောန်မစကၠောန်လဝ်တုဲတံဂှ် ဆက်ကၠောန်ဒၟံၚ်အိုတ်ရ၊ ကော်တိန်ဒါ ချုက်လိက်ကသုက်တံဂှ် ဒးကၠောန်ဒၟံၚ်ရ၊ ဆ္ဂး ဂွံပရဲတုဲ ကၠောန်ဒၟံၚ်ဟွံသေၚ်၊ ကျတုဲ ဒးကၠောန်ဒၟံၚ်ဏောၚ်၊ ကဵုၚုဟ်ဖျာဏံဂှ်တှ်ေ ဆဗၞတ်ညိညဓဝ်ဂှ် ကၠောန်ဟွံမာန်အိုတ်ပုဟ်၊ ဒေါအ်လဝ်တုဲ သၟာကမၠောန်တံလေဝ် ဒှ်အာကမၠောန်ကၟိတ် ဟၟဲအိုတ်ရ၊ သၟာကမၠောန် ဗွဲမဂၠိုၚ်ဂှ် ကမၠောန်ဟွံမွဲအိုတ်ရပုဟ် “ သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်လၟုဟ် ဟိုတ်နူၚုဟ်ဒဝ်ဠာ ကလေၚ်စှ်ေကၠုၚ်ဒၟံၚ် ညိညကီုလေဝ် ကပေါတ်ဗၞိက်အပြောံ အရပ်စပ်ပရေၚ်သိုၚ်ခၞံတံ ၜိုတ်ထေၚ်လဝ် ၚုဟ်ဟွံစှ်ဂှ်ေရ ၚုဟ်ကပေါတ်ဗၞိက်အပြောံလ္ၚဵုတံမ္ဂးလေဝ် ဆက်က္ဍၚ်ဒၟံၚ်တုဲ သွက်ဂွံစကမၠောန်ဂှ် ဒးဂဗဒၟံၚ်အခက်အခုဲအိုတ်ရ။
ဟိုတ်နူအကာဲအရာတံဏံတုဲ ကမၠောန်ပရေၚ်သိုၚ်ခၞံ ဗွဲမဂၠိုၚ်ဝွံ ၜိုန်ရပရဲဖဵု ဟွံမွဲကီုလေဝ် ကောန်ကမၠောန် မကၠောန်ၜိုတ် ဗ္ဒဗ္ဒါဲဒၟံၚ် လ္တူကမၠောန်ပရေၚ်သိုၚ်ခၞံတံ ညံၚ်ပရေၚ်စသုၚ်မံၚ်စံၚ်ဗိုက်လ္တက်တံ ဂွံပြေပြံၚ်ဂှ် ရေၚ်တၠုၚ်ကၠောန်ၜိုတ်အာ ဗၞတ်ညိညဓဝ်ရဂှ် တၠကမၠောန်ပရေၚ်သိုၚ်ခၞံမွဲတၠ ဟီုရ။
“ပိုယ်တံဂှ်လေဝ် လ္တူနူပရဲပရာဇကုဂှ် ညံၚ်ကောန်ၚာ်တံ ကလောန်ဂွိုအ်လီုဂှ်ရ ဒးကၠောန်ဒၟံၚ်၊ ဍေံတံဂှ်တှ်ေ ဒးဗ္ဒဗ္ဒါဲဒၟံၚ် ဇကုတုဲ ကမၠောန်ဟၟဲမ္ဂး ပရေၚ်စသုၚ်မံၚ်စံၚ် ဟွံပြေပြံၚ်ပုဟ်၊ ဟိုတ်ဂှ်ရ ပိုယ်တံဂှ် လ္တူနူပရဲပရာဂှ် ဇကုလေဝ် အိန္ဒြေဟွံဒးလီုတုဲ ကၠောန်ကမၠောန်ဂွံရ၊ ကောန်ၚာ်တံလေဝ် ကလောန်ဍေံတံ ပြေပြံၚ်ဒၟံၚ်ရလေဝ်၊ ပရဲဂှ်တှ်ေ ဟွံဂံၚ်စၟဳစဏီပုဟ်၊ ညံၚ်တမ်ဂွိုအ်ကျဂှ် ကၠောန်ဒၟံၚ်ညးသ္ကအ်အိုတ်ရ၊ မုပရောဟီုတှ်ေ ကလောန်သ္ဂောံကၠောန် တၞဟ်ဟ်တံဂှ် ဟွံမွဲပုဟ်လေဝ် ၊ ၜိုတ်ဇကုမာန်ရ စမြိုၚ်မ္ဂးလေဝ် မွဲမၜါမတှ်ေ ကေတ်ရ ဂၠိုၚ်တှ်ေ ကေတ်ဟွံမာန်ပုဟ်လေဝ် ၊ မုပရောဟီုတှ်ေ ကဵုၚုဟ်ဖျာဂှ် ကမၠောန်ဇၞော်ခ္ဍၚ် ဟွံပြေပြံၚ်ခ္ဍၚ်ရဏောၚ်၊ ကမၠောန်ဍောတ်တ်တံဂှ်တှ်ေ ဘာသာဍေံကုဍေံဂှ် အာဒၟံၚ်ၜန်န်ၜဲၜဲရ” သာ်ဝွံ သ္ဂးရ။
ကမၠောန်ပရေၚ်သိုၚ်ခၞံတံ ဂေတ်ဂြိပ်ဍိုက်က်ပေၚ်ၚ် ဟွံဂွံဏီဂှ်ရ ကမၠောန်လ္ၚဵုတံဂှ် ဒးဖအောန်ဖျေံ ကောန်ကမၠောန်တံ နွံတုဲ ကောန်ကလောန် မသှ်ေတံဂှ်လေဝ် ဒးဖအောန်ဖျေံလဝ် သြန်ဂိတုတံရဂှ် သ္ဂးရ။
ပ္ဍဲတွဵုရးဍုၚ်မန်ဂှ် ကောန်ကမၠောန်ပရေၚ်သိုၚ်ခၞံ မဒးဗ္ဒဗ္ဒါဲကၠောန်ဒၟံၚ်ကမၠောန် ပရေၚ်သိုၚ်ခၞံဂှ် ဂၠိုၚ်ကဵုဠက်နွံတုဲ ကမၠောန်ပရေၚ်သိုၚ်ခၞံလ္ၚဵုတံမ္ဂး ဒးဒေါအ်ဇူလဝ်ဂှ်ရ ကောန်ကမၠောန်ဂၠိုၚ်ကဵုလ္ၚီ ဒးဒှ်ဒၟံၚ် ကလောန်ကၟိတ်ဟွံမွဲရ။
ပရိုၚ်−သြၚ်လောန်တိုၚ်(မ်)