ဒဳပေဝ်ယေန်၊ အံက်တဝ်ဗာ (၁၆)
ပၞောဝ်ကဵုညးဍုၚ်ကွာန် ဒးဒုၚ်ရပ်ဒက် နူကွာန်(လက်ယက်ကုန်း) ၊ ပွိုၚ်ဍုၚ်ဒဳပေဝ်ယေန်၊ ရးသက်ကိုၚ် မဒးဒုၚ်ဗ္တိုက်လဝ် နကဵုက္ၜၚ်ကျာ ကံၚ်ဇြဳပၞာန်ဂှ် ပ္ဍဲဂိတုအံက်တဝ်ဗာ (၁၅) ဂှ် မၞိဟ်တြုံၜါတၠ ကလေၚ်ဗၠးကၠုၚ်လဝ်ရောၚ် ဂကောံကောဒေံပွိုၚ်ဍုၚ်ဒဳပေဝ်ယေန် ဟီုကဵု ဌာန်ပရိုၚ်သြၚ်လောန်ုတိုၚ်(မ်) ရ။
ဒပ်ကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုသေပ်တေမ်ဗာ (၁၆) အခိၚ်လဒေါဝ်တ္ၚဲ ၜိုတ် (၁) နာဍဳဂှ် နူကဵုဂၠးအကးတေံ ပန်ပှော်လဝ် လွဟ်လက်နက်ဇၞော် လ္တူကွာန်(လက်ယက်ကုန်း) နကဵုက္ၜၚ်ကျာ ဗ္ဒါဲမွဲနာဍဳပြၚ်တုဲ ပ္ဍဲကဵုလၟေၚ်ဒဒှ်ပန်ပှော်ဏံဂှ် အ္စာ၊ အ္စာၝောံတံ မပါလုပ် မၞိဟ် (၁၇) တၠ ဒးဒုၚ်ရပ်လဝ်တုဲ ပ္ဍဲကဵုဂှ် ကလေၚ်ဗလးကဵုလဝ် သၟာဒဳကွဳၜါတၠရ။
ပ္ဍဲအခိၚ်ဗ္တိုက်ကဵုက္ၜၚ်ကျာတုဲဂှ် အ္စာ၊ အ္စာၝောံ မကလိဂွံလဝ်ဝပ်တံ မပါလုပ် ကောန်ၚာ်သၟတ်တံဂှ် လွဳကဵုရောၚ် နကဵုတၚ်ထ္ၜးဟိုတ်သာ်ဏံ ရပ်ဒက်ကော်ဏာလဝ် လ္ပာ်ရုၚ်ဂဥုဲ ပွိုၚ်ဍုၚ်ယျေဥူ ကေုာံ ရုၚ်ဂဥုဲပၞာန် မုၚ်ယဲတေံရ။
ကောန်ၚာ်သၟတ် မကော်ဏာလဝ် လ္ပာ်ရုၚ်ဂဥုဲ ပွိုၚ်တိုက်ယျေဥူဂှ် ဒဵုကဵုတ္ၚဲဏံ ကလေၚ်ဗလးကဵုလဝ် ဟွံမွဲဏီတုဲ ကောန်ၚာ်သၟတ်ပ္ဍဲကဵုဂှ် မွဲတၠဂှ် ပလံၚ်ဗစိုပ်ဏာလဝ် ရုၚ်ဂဥုဲပွိုၚ်တိုက် မုၚ်ယဲရောၚ် ဂကောံကောဒေံပွိုၚ်ဍုၚ်ဒဳပေဝ်ယေန်တံ သ္ဂးရ။
ပ္ဍဲကဵုဒဳပေဝ်ယေန်ဂှ် ကောန်ၚာ်သၟတ် ကေုာံ အ္စာ၊ အ္စာၝောံ ကံၚ်ဇြဳပၞာန်မရပ်ဒက်လဝ်တံ မပါလုပ် ညးဒေသ အပံၚ်ဖအိုတ် (၁၁) တၠ သှ်ေဒၟံၚ်ဏီတုဲ ဒဵုကဵုအခိၚ်လၟုဟ် ကဵုလဝ်ပရိုၚ် ဇရေၚ်ညးမဆေၚ်စပ်တံ မွဲမွဲသာ် ဟွံမွဲဏီပုဟ်ဂှ် ဂွံတီကေတ်ရ။
ဟိုတ်နူပရေၚ်ဗ္တိုက် ဒဳပေဝ်ယေန်ဂှ်တုဲ ကောန်ၚာ်သၟတ်ကွးဘာ (၇) တၠ ကောန်အရာပ် (၆) တၠ အပံၚ်ဖအိုတ် (၁၃) တၠ ချိုတ်အာလဝ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပ္ဍဲကဵု ဒပ်ကံၚ်ဇြဳပၞာန် ရပ်ဒက်ကော်ဏာလဝ် (၁၇) တၠဂှ် မွဲတၠ ဒးဒုၚ်ဂစိုတ်လဝ်တုဲ မၞိဟ်မသၟေဟ်တံဂှ်လေဝ် ဒဵုကဵုအခိၚ်လၟုဟ် ဟွံကလေၚ်ဗလးကဵုလဝ်ဏီရ။
ပရိုၚ်−သြၚ်လောန်တိုၚ်(မ်)