ဖာအၚ်၊ ဒဳဇြမ်ပါ ၂၅
အခိၚ်ကြပ်ကၠောန်ပေါဲရုဲမာဲ သှ်ေမံၚ်ဆပွိုၚ်တ္ၚဲဂှ် ဒပ်ပၞာန်ဗမာထ္ၜးဇြဟတ်ဂေတ်င်မံၚ်ကဵု ကွဳစက်ရေၚ်ၚ် လ္တူဍုၚ်ဖာအၚ်ရဂှ် ညးလ္တူဍုၚ်တံဟီုကဵုဌာန်ပရိုၚ်သြၚ်လောန်တိုၚ်မ်ရ။
ကွဳစက်ပၞာန်ဇၞော်ဇၞော်ကီု သီုဖအိုတ်ကွဳစက်ပၞာန် ၃ မတံ ဂေတ်င်အာကၠုၚ်မံၚ်လ္တူဍုၚ်ဖာအၚ် နူဂယးမွဲအခိၚ် ဇိုၚ်သဝ်တ္ၚဲမွဲအခိၚ်တုဲ ကေတ်လဝ်ပရေၚ်ဂီုကၠီုသွက်ပေါဲရုဲမာဲရဂှ် ညးလ္တူဍုၚ်တံ သ္ဂးရ။
ပေါဲရုဲမာဲသ္ကုတ် ၁ ဂှ် ကၠောန်အာပ္ဍဲဒဳဇြမ်ပါ ၂၈ ဏံမဒှ်တုဲ ပ္ဍဲကဵုတွဵုရးကရေၚ်မ္ဂး ပွိုၚ်ဍုၚ်ဖာအၚ်၊ ဗြဝတဳကဵု တာန်တံၚ်ဂျဳတံ သွက်ဂွံကၠောန်ဗ္ဒျ်အာပေါဲရုဲမာဲ မဒှ်ရ။
ကၠာဟွံစိုပ်ပေါဲရုဲမာဲဏံ ပ္ဍဲတွဵုရးကရေၚ် ဒပ်ကဝ်မယှေန်ပၞာန်ဗမာထပက်မံၚ်ကရောၚ်ပၞာန်ဂှ် ပ္ဍဲကဵုပွိုၚ်ဍုၚ်ကအ်ကြိက်၊ ဖာပန်ကဵု ဗြဝတဳတံ ပေါဲဗတိုက်ဆက်ဒှ်မံၚ်ကဵု ဂကောံဇြဟတ်ပၠန်ဂတးတံတုဲ နူကဵုပၞာန်ကျာတံလေဝ် ဗတိုက်မံၚ်နွံရ။
ပ္ဍဲကဵုပွိုၚ်ဍုၚ်ဗြဝတဳ သၠုၚ်ကျာဒေသဇိုၚ်ပယျဵုသေံ မေန်လက်ပါန်၊ ကွာန်ဖလူတံဂှ်တှ်ေ တုဲကၠုၚ် နူကဵုတ္ၚဲကၠောန်သၞာံတၟိကရေၚ် ဒဳဇြမ်ပါ ၁၉ တေံတုဲ အကြာပေါဲဗတိုက်ဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံဒှ်ကၠုၚ်လဝ်ဂှ် ကဝ်မယှေန်ပၞာန်ပန်မံၚ်ကဵုဒရုၚ်ရောၚ် ဂွံတီနူညးဒေသတံရ။
တုဲပၠန် တုဲကၠုၚ်ဒဳဇြမ်ပါ ၁၂ တေံဂှ်လေဝ် နူကဵုဒပ်ကဝ်မယှေန်ပၞာန် ပန်ဖျေံကဵုၜၚ်ကျာကီု သီုကဵုဒရုၚ် ပ္ဍဲကဵုကွာန်မာမူ ခရိုၚ်ဖာပန်ဂှ် ကောန်ၚာ်ချိုတ်အာမွဲတၠ ၁၂ တၠဒးဝပ်တုဲ ဘာဗတောန်လိက်ကဵု သ္ၚိဌာန်ကောန်ကွာန်တံဗွဲမဂၠိုၚ်လီုလာ်အာလဝ်နွံ ဂကောံမှာဇန်ကရေၚ်တံ လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – MOI