ၜဳလေၚ်၊ ဒဳဇြမ်ပါ ၂၅
ပ္ဍဲတွဵုရးမန် ပွိုၚ်ဍုၚ်ၜဳလေၚ်ဂှ် ပ္ဍဲကဵုအကြာတ္ၚဲတံဏံ သၟတ်ဟွံအောန် နူကဵု ၂၅ တၠ ဒးဒုၚ်ရပ်ဏာတုဲ ဗွဲမဂၠိုၚ် ဒးဒုၚ်ပကောံလဝ် နဒဒှ်ကောန်ပၞာန်တၟိရ ညးဒေသတံကဵု ညးကြပ်ကဵုကဝ်မယှေန်ပၞာန်တံ ဟီုရ။
စနူဒဳဇြမ်ပါ ၂၀ ဂှ် ပ္ဍဲကဵုကွာန်ဒေသသၟဝ်ပွိုၚ်ဍုၚ်ၜဳလေၚ် သၟတ်နူကဵု ကွာန် မုဟ်ဒဵု၊ ဇဲကလာ၊ ကုန်သာယာ၊ ကွာန်တၟိမုတေၚ်၊ ကွာန်ဇုတ်သုက်ကဵု ကွာန်ကအ်ကဒေါတ်တံဂှ် ရဲဂကောံပံၚ်တောဲဒပ်ကဝ်မယှေန်ပၞာန်တံ ကၠုၚ်တံၚ်ရပ်ပဝ်တာ ရပ်ကေတ်ဏာရ။
သၟတ်အကြာအယုက် ၂၀ ကဵု ၃၀ တံ ဒးဒုၚ်ရပ်တုဲ လ္ၚဵုတံဂှ်တှ်ေ ဒပ်ကဝ်မယှေန်ပၞာန် တိုန်ကေတ်သ္ၚိအတေၚ် ဗက်ရပ်လဝ်နွံမံၚ် မဒှ်ရ။
ဒပ်ကဝ်မယှေန်ပၞာန်ရပ်ဏာသၟတ်တံဂှ် ပလံၚ်စွံလဝ်ပ္ဍဲကဵုဒပ်ဗၠာဲသၟိၚ် ၝောံဍုၚ်ၜဳလေၚ်ကဵု တမ်ဒပ်ခလရ ၈ တံရဂှ် ဂွံတီနူ ညးဒေသတံကဵု ညးကြပ်ကဵုကဝ်မယှေန်ပၞာန်တံရ။
ဟိုတ်နူဒပ်ကဝ်မယှေန်ပၞာန် ရပ်မံၚ်ပဝ်တာဗီုဏံဂှ်တုဲ ပ္ဍဲပွိုၚ်ဍုၚ်ၜဳလေၚ် အခိၚ်ဗ္တံၜက်အာနူကဵု ၇ နာဍဳဟီုတှ်ေ မၞိဟ်ဂွံဂံၚ်တိတ်နူသ္ၚိဌာန်ညးတံ ကြပ်ဟၟဲအောန်အာကွေံကွေံရောၚ် ညးဒေသတံသ္ဂးရ။
မွဲလပါ်ပၠန် ပ္ဍဲပွိုၚ်ဍုၚ်သဓီုကဵု ကျာ်ထဝ်တံကီုဒပ်ကဝ်မယှေန်ပၞာန် ဗက်တံၚ်ရပ်ကေတ်မံၚ်ပဝ်တာကဵု သၟတ်တံ အရိုဟ်တ္ၚဲဆက်က် မဒှ်ရ။
ပရိုၚ်-သြၚ်လောန်တိုၚ်မ်
Photo – CJ