မတ်မလီု ၊ ဒဳဇြမ်ပါ ၂၅
ပ္ဍဲတွဵုရးမန်ကဝ်မယှေန်ပၞာန်သီအဝဵု သွက်ဂွံကၠောန်ပေါဲရုဲမာဲသ္ကုတ် (၁) သှ်ေမံၚ်အကြာတ္ၚဲညိညဏံဂှ် သၠုၚ်လဝ်ဇြဟတ်ပရေၚ်ဂီုကၠီု နွံမံၚ်ဗွဲမဂၠိုၚ်ရောၚ် ညးဒေသတံဟီုကဵုဌာန်ပရိုၚ် သြၚ်လောန်တိုၚ်မ်ရ။
ပေါဲရုဲမာဲသ္ကုတ်(၁) ဂှ် သွက်ဂွံကၠောန်အာ ပ္ဍဲဒဳဇြမ်ပါ ၂၈ မဒှ်တုဲ ပ္ဍဲတွဵုရးမန်မ္ဂး ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵုကျာ်မြဟ်တံဂှ် ကဝ်မယှေန်ပၞာန် သွက်ဂွံကၠောန်အာပေါဲရုဲမာဲရ။
ပ္ဍဲကဵုရုၚ်မာဲဒၞာဲကၠောန်ပေါဲရုဲမာဲ ၅ ပွိုၚ်ဍုၚ်ဂှ် သၠုၚ်စွံလဝ်ဇြဟတ်ပရေၚ်ဂီုကၠီုဒပ်ကဝ်မယှန်ပၞာန်၊ ဒပ်ဗၠာဲသၟိၚ်၊ ဒပ်မၚ်ကွာန်၊ ဂကောံဂီုကၠီုညးဍုၚ်ကွာန်ကဵု ရဲဗတိုက်သရိုဟ်ပကီုပရာတ်တံ မဒှ်ရ။
နူကၠာဟွံစိုပ်ပေါဲရုဲမာဲဏီ ကဝ်မယှေန်ပၞာန်တံ ဖျေံစွံလဝ်ဇြဟတ်ပရေၚ်ဂီုကၠီုဗွဲမဂၠိုၚ်နွံတုဲ ပ္ဍဲကရပ်ရုၚ်မာဲတံလေဝ် ကရေပ်ဓရတ်လဝ်ပရေၚ်စၟဳစၟတ်ရဂှ် ညးလ္တူဍုၚ်မတ်မလီုမွဲတၠ ဟီုလဝ်ကဵုဌာန်ပရိုၚ်သြၚ်လောန်တိုၚ်မ်ရ။
စၞးရမျှာၚ် ညးလ္တူဍုၚ်မတ်မလီုမွဲတၠဟီုဂးလဝ်ဂှ် ရန်ကဵုပရေၚ်ဂီုကၠီုညးတုဲ ထပက်အဇာဟီုကဵုလဝ်အတိုၚ်ဏံရ။
“ပ္ဍဲလ္တူဍုၚ် ဒၞာဲဍေံတံသ္ပလဝ်ရုၚ်မာဲ ပ္ဍဲကဵုရုၚ်ပရေၚ်အုပ်ဓုပ်တံ ဘာဗတောန်လိက်တံ မုတံဂှ် ကောန်ပၞာန်၊ ဒပ်ဗၠာဲသၟိၚ်၊ ဒပ်မၚ်ကွာန်တံ မၚ်မံၚ်ပရေၚ်ဂီုကၠီုဂှ် ဂွံဆဵုရ။ သီုဗ္တံသီုတ္ၚဲမၞိဟ်ဍေံတံ ဂၠိုၚ်မံၚ်။ လဆောဝ်လဆောဝ် ညးဍုၚ်ကွာန်တံ တတ်အာကရပ်ရုၚ်မာဲတှ်ေ ညံၚ်ကဵုဟွံသင်ကာကဵုမၞိဟ် ဍေံတံရံၚ်မံၚ်။ အခိၚ်ဗ္တံတှ်ေ ဗက်မာတ်ဆိုအ်စၟဳစၟတ်မံၚ် ကရပ်ရုၚ်မာဲတံလေဝ်နွံမံၚ်။ အခိၚ်တ္ၚဲအကြာတံဏံ ပရေအ်တိုန်ကွေံကွေံ။ မၞိဟ်ဆအရိုက်တံ ဟွံဂံၚ်တတ်အာကရပ်ရုၚ်မာဲ” သာ်ဝွံ သ္ဂးရ။
တုဲပၠန် ရဲသၟဝ်တဲကဝ်မယှေန်ပၞာန် ကောန်ရဲတဝ်သွာတံဂှ်လေဝ် သၠုၚ်ပတိုန်လဝ်ပရေၚ်ဂီုကၠီုတုဲ မၞိဟ်တတ်အာ ကရပ်ရုၚ်မာဲတံဂှ် စၟဳစၟတ်ကီု ဟွံသၚ်ကာမ္ဂး ရပ်တုဲသၟာန်သၟုက်၊ ပတေၚ်လဝ်ပရေၚ်ဂီုကၠီု ကရပ်ရုၚ်မာဲတံရဂှ် ညးဆက်ဟီုရ။
ကၠာဟွံစိုပ်ပေါဲရုဲမာဲဏီ စနူအခိၚ်လၟုဟ်စကာဇြဟတ်ဂၠိုၚ်ၚ်တုဲ ဖျေံစွံလဝ်ကၚ်ဒမၠုက်တံတုဲ စိုပ်တ္ၚဲပေါဲရုဲမာဲမ္ဂး ဖျေံဒပ်ဂီုကၠီုတံတုဲ သွက်ဂွံစကာအာဇြဟတ်ဂၠိုၚ်ၚ်နွံမံၚ်ရောၚ် ညးဒေသကျာ်ထဝ်မွဲတၠ ဟီုလဝ်ကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲကဵုဒၞာဲရုၚ်မာဲ ဒစးဒုၚ်ဖျေံလဝ်ကၚ်ပၞုက်နွံမံၚ်။ ပ္ဍဲအတေံ ဍေံတံဖျေံစွံလဝ် ကၚ်ပၞုက် ၁၅ တၠနွံမံၚ်။ ၁၀ တၠဖျေံစွံလဝ်နွံမံၚ်။ မွဲပၠန်ဂှ် စိုပ်တ္ၚဲတေံမ္ဂး ဇြဟတ်ဍေံတံ ဇြဟတ်ကၚ်ဂေတ်တံ ဇြဟတ်ဖျေံလဝ်သ္ဇိုၚ်တံ ဍေံတံဘိုအ်ဂွံကလေၚ်ဓရတ်ကၠောန်အာကီု ဒစးဒုၚ်ညံၚ်ဂွံကၠောန်မာန် ကော်ကောံဓရီုတုဲ ကၠောန်အာဏောၚ်” သာ်ဝွံသ္ဂးရ။
မွဲလပါ်ပၠန်မ္ဂး ကၠာဟွံစိုပ်အခိၚ်ပေါဲရုဲမာဲ ပ္ဍဲကဵုဒၞာဲပၞော်လုပ်တိတ်ဍုၚ် ဒၞာဲမၞိဟ်ဂၠိုၚ် ဒၞာဲဂၠံၚ်ဍာန်သွာၚ် ဒၞာဲဟွံခယျလဝ်တံ ဂေတ်ဍုၚ်တုဲကဝ်မယှေန်ပၞာန် ကၠောန်လဝ်ပရေၚ်စၟဳစၟတ် ဒၞာဲစုၚ်ၚ်ရ။
တုဲပၠန် ဒၞာဲကၚ်ဂေတ်တံကီု စကာသုၚ်စောဲလဝ် ဇြဟတ်မၞိဟ်ဗွဲမဂၠိုၚ်တုဲ ဂေတ်ၚ်မံၚ်ဂှ်လီု ထ္ၜးဟိုတ်ကဵု ဟွံသၚ်ကာတုဲ ရပ်လဝ်သၟတ်တံ၊ လ္ၚဵုဒးဒုၚ်ၜုၚ်တက်လဝ်နွံရဂှ် ညးဒေသတံဟီုရ။
ပ္ဍဲကရပ်ဒၞာဲရုၚ်မာဲသၟးဟွံက လ္တူဍုၚ်ဂှ်လေဝ် ပတေၚ်ဓရတ်လဝ်ပရေၚ်ဂီုကၠီုဂှ်တှ်ေ ညးဒေသတံ အခိၚ်အာကမၠောန်၊ စဴနူကဵုကမၠောန် ဝါတ်ဂါတ်ခက်ခုဲအာတုဲ ဒးဇီုကပိုက်ဆဵုဂဗမံၚ်ကဵု အကာဲအရာ သွက်ဂွံဒးဒုၚ်ရပ် အခိၚ်ဟွံရုဲနွံမံၚ်ရ။
ပ္ဍဲတွဵုရးမန် ကၠောန်အာပေါဲရုဲမာဲသ္ကုတ် (၁) ဏံမ္ဂး ပ္ဍဲကဵုပွိုၚ်ဍုၚ်ပါလုပ်မံၚ် ၅ ပွိုၚ်ဍုၚ်ဂှ် ရုၚ်မာဲနွံမံၚ် ၃၃၅ ရုၚ်၊ ညးအခေါၚ်ကဵုမာဲနွံမံၚ် ကရပ် ၆ ကိုဋ်ရောၚ် အတိုၚ်တၚ်နၚ် ကဝ်မယှေန်ပေါဲရုဲမာဲကၟိန်ဍုၚ် လလောၚ်ပတိတ်လဝ်ဂှ် ဂွံတီရ။
ပရိုၚ်-သြၚ်လောန်တိုၚ်မ်
Photo – MOI