ၜဳလေၚ်၊ ဒဳဇြမ်ပါ ၂၆
အပ္ဍဲကဵုတွဵုရးမန် ပွိုၚ်ဍုၚ်ၜဳလေၚ် လ္တူဘာခေတ္တာ ကွာန်အလူဂျဳဂှ် လွဟ်ဇၞော်ပြဟ်စှ်ေခတိုဟ်အာဂှ်ရ ညးဗြဴပိတၠ ချိုတ်အာလဝ်နွံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်ဒဳဇြမ်ပါ ၂၄ အခိၚ်နူဂယးၜိုတ် ၈ နာဍဳ ဒၞာဲတိဍာ်အုပ်ဓုပ် KNU ခရိုၚ်သဓီုကွာန်အလူဂျဳဂှ် ဒပ်ပၞာန်ဗမာတံ ပန်ကၠဟ်နၚ်ကဵု လွဟ်ဇၞော် မဒှ်ရ။
ညးကၠုၚ်ရံၚ်ဗေဒင် ပ္ဍဲဘာလကျာ်ပိတၠ မထိုဲ အယုက် ၂၃ သၞာံ ရဲကွာန်ကဇြိုၚ်၊ မခိုၚ်တောဲဝေန် အယုက် ၃၂ သၞာံ ရဲကွာန်အလူလေဝ်၊ ဒဝ်ချဝ် အယုက် ၄၉ သၞာံ ရဲကွာန်ပါၚ်ဒဝါတံ ဟိုတ်နူလွဟ်ဇၞော်ဒတုံခတိုဟ်ဒးတုဲ ချိုတ်အာရ။
တုဲပၠန် ညးဗြဴအယုက် ၅၀ ပြၚ်ၜါတၠပၠန်လေဝ် ဒးအာဝပ်နွံတုဲ ဒၞာဲစမြိုၚ်ဘာ ဒးအာလဝ်ကဝေက်မကမ် လီုလာ်စာ်ထောၚ်အာနွံရ။
အတိုၚ်ညးဒေသတံဟီုလဝ်မ္ဂး မထိုဲ အယုက် ၂၃ သၞာံ ဒးလွဟ်ဇၞော် ချိုတ်အာဂှ် ခြာဟွံလံဏံ သွက်ဂွံအာတိုန်စိုပ် ကေတ်လာဘ်တဆိပ်ကြာ နူကဵုတက္ကသိုလ်နွံမံၚ်ရောၚ် ဂွံတီရ။
တုဲကၠုၚ်ဒဳဇြမ်ပါ ၁၂ တေံ ကရောၚ်ပၞာန်ထပက်လုပ်ကၠုၚ် ပ္ဍဲကွာန်ဖိုဝ်ဝတိၚ် ပွိုၚ်ဍုၚ်ၜဳလေၚ်ဂှ် ပန်ဏာလွဟ်ဇၞော်တုဲ ညးဍုၚ်ကွာန်ၜါတၠချိုတ်လဝ်နွံမံၚ်ရောၚ် ဗော်သွးကောန်ဂကူပရေၚ် KNU ခရိုၚ်သဓီု လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media