ယန္တရာတြးဝါဒ ကဝ်မယှေန်ပၞာန်တံ ဒးဒုၚ်ပါဲပတိတ်ထောံဆက်က်

မတ်မလီု ၊ ဒဳဇြမ်ပါ ၂၆

တ္ၚဲကၠောန်ပေါဲရုဲမာဲသ္ကုတ်ကဵုသ္ကုတ်တံ ကြပ်ကၠုၚ်ဟဍၚ် ယန္တရာတြးဝါဒကဝ်မယှေန်ပၞာန်တံ ပတိတ်မံၚ်တိုက်ရိုက်ဂှ်ကီု ပလက်ဖံၚ်အန်လိုၚ်တံ ဒးဒုၚ်ပါဲပတိတ်ထောံမွဲတုဲမွဲဒှ်ကၠုၚ်ရ။

ပ္ဍဲကၞောတ်သၞာံဏံအိုတ်၊ အကြာသၞာံတၟိတေံမံက်မ္ဂး ညးဍုၚ်ကွာန်တံသွက်ဂွံအာရုၚ်မာဲ ညံၚ်ဂွံစုတ်ကဵုဆန္ဒမာဲ ပ္ဍဲကဵုပေါဲရုဲမာဲဂှ် ကဝ်မယှေန်ပၞာန်ဆဝ်ဗ္ၚုဟ်မံၚ် ပ္ဍဲကဵုဌာန်ဗလးရုပ်ရမျှာၚ်ကၟိန်ဍုၚ်ကီု နူကဵုပလက်ဖံၚ် အန်လိုၚ်စုၚ်ၚ်တံ ချဳဒရာၚ်မံၚ်အိုတ်အစောန်ရ။

ပ္ဍဲအကာဲအရာဏံ မုက်လိက်ပံက်လဝ်တၟိ ပ္ဍဲကဵုဂိတုဏံ MRTV ကေုာံ ပရိုၚ် MRTV တံကီု သီုကဵုဒၞာဲကလေၚ်ဆာဲတြးမံၚ် MRN ကီု နူကဵု Facebook ပါဲပတိတ်ထောံယျဂှ် Justice For Myanmar လလောၚ်တြးလဝ်ရ။

မုက်လိက် MITV, လိက်ပရိုၚ်ရတနာပုံတံဂှ် နူပြဟ်ဟ်တေံရ ပါဲပတိတ်လဝ်တုဲ YouTube၊ Twitch၊ Kick တံလေဝ် ကေတ်ကၠုၚ်အရေဝ်ကီု တုဲပၠန် မုက်လိက် MRTV, MRN တံ ဒးထပ်တးပါဲလဝ်ပၠန် မဒှ်ရ။

စနူသၞာံ ၂၀၂၁ တေံတုဲ လတူပလက်ဖံၚ် Facebook ကဵု Instagram ပရေၚ်ပိုန်ဒြပ်ကဵု ဂကောံဆက်စပ်မံၚ်ကဵု ဒပ်ပၞာန်၊ ကဝ်မယှေန်ပၞာန်တံဂှ် နူကဵုကာန်ပနဳမိ Meta ဖျေံစွံလဝ်မူဝါဒ သွက်ဂွံကၟာတ်ထောံရ။

တုဲကၠုၚ်တ္ၚဲအကြာတံဏံပၠန် နူကဵုကာန်ပနဳနဲကဲပညာ အဝ်သတေဝ်လျ Kick ကၟာတ်ထောံ လိုင်ချာန်နေဝ် တြးဝါဒ ကဝ်မယှေန်ပၞာန်တံတုဲ နူ YouTube လေဝ် ထပ်ကၟာတ်ထောံ လိုင်ချာန်နေဝ် MITV ပၠန်ရ။

နူကဵု Kick ကၟာတ်ထောံ လိုင်ချာန်နေဝ် တြးဝါဒကဝ်မယှေန်ပၞာန်တံဂှ်တှ်ေ MRTV HD၊ MITV၊ MRTV News၊ MRTV Farmers၊ MRTV Sports၊ MRTV NRC ကဵု MRTV Entertainment တံပါလုပ်ရ။

ဟိုတ်ဂှ်ရ သွက်ကဝ်မယှေန်ပၞာန် ကၠာဟွံစိုပ်တ္ၚဲကၠောန်ပေါဲရုဲမာဲတံမ္ဂး ပလက်ဖံၚ်ဗလးတိုက်ရိုက်တံ ဟၟဲမွဲသာ်ရောၚ် Justice For Myanmar သ္ဂးရ။

ဝဘ်သိုက် MRTV ကဵု အက်ပလဳကေယှေန် ကဝ်မယှေန်ပၞာန်တိုက်ရိုက် သွက်ဂွံဗလးရုပ်ရမျှာၚ်မ္ဂး ဒးစကာမံၚ် Kick မဒှ်တုဲ ပရိုၚ်ဗၠေတ်တ်တံ၊ မအရေဝ်က္ဍုဟ် ပရေၚ်တြးဝါဒကဝ်မယှေန်ပၞာန်တံဂှ် Kick ကုတ်ထပိုတ်လဝ်ရ။

နူကၠာဲတဲ နူကဵု YouTube ကၟာတ်လဝ်လိုၚ်ချာန်နေဝ် ဌာနလလောၚ်ပရိုၚ်ကဝ်မယှေန်ပၞာန်တုဲ Twitch ကဵု Facebook ဂှ်လေဝ် ဖာဲပတိတ်ထောံလဝ် MITV ရ။

သွက်ပရေၚ်ကဝ်မယှေန်ပၞာန်ဂွံတြးဝါဒ MITV ဗလးရုပ်ရမျှာၚ်ဘာသာအဂႅလိက်ဂှ်တှ်ေ ပူရိသာတ်ဍုၚ်သ္အာၚ်တံ ညံၚ်ဂွံပတေဟ် ဗီုပြၚ်လွဟ်တြးဝါဒမွဲ ကိစ္စသီအဝဵုပၞာန်ကဵုသွက်ပေါဲရုဲမာဲအလီဏံရောၚ် Justice For Myanmar ထံက်ထ္ၜးရ။

မွဲလပါ်ပၠန် ကဝ်မယှေန်ပၞာန် သွက်ဂွံမၚ်ရံၚ်အာပရိုၚ်အေန်တာနိတ်တံကီု သွက်ဂွံဒၞာတာအာ ပါ်ပါဲပရေၚ်ဍုၚ်ကွာန် လ္တူဍေံတံကီုတုဲ ပံက်လဝ်ကမ္မတဳမွဲနွံရ။

တုဲပၠန် ပရေၚ်ဟီုဂးချူဆန်သၠးၜးပရေၚ်ဍုၚ်ကွာန်တံဂှ် ကဝ်မယှေန်ပၞာန်စၟတ်ပိုၚ်ခြာ ကေတ်မံၚ်အရေဝ်လေဝ်နွံ ဗွဲတၟေၚ် ပ္ဍဲကာလဒစးဒုၚ်ပေါဲရုဲမာဲလၟုဟ်ဏံ နကဵုဥပဒေဒစဵုဒစးပေါဲရုဲမာဲဂှ် ရပ်စပ်ကေတ်မံၚ်အရေဝ်ကဵု တၠအကံက် Facebook တံ မဒှ်ရ။

နူကဵုအခိၚ်ကဝ်မယှေန်ပၞာန် သီလဝ်အဝဵုပြဟ်ဟ်တေံ ဟိုတ်နူ Facebook ကၟာတ်လဝ်ပရေၚ်တြးဝါဒတုဲ ကဝ်မယှေန်ပၞာန်တံ ပြံၚ်သၠာဲသုၚ်စောဲ Telegram တုဲ ပ္ဍဲကဵု TikTok လေဝ် လဝ်ဗဳကဝ်မယှေန်ပၞာန်တံ တြးမံၚ်ဝါဒရ။

နကဵုကာန်ပနဳနဲကဲပညာသီုဖအိုတ်တံ သွက်ဂွံပလှ်ဖျေံ ပလက်ဖံၚ်မဳဒဳယာ ကဝ်မယှေန်ပၞာန်တံကီု အကံက်တြးကဵုမံၚ်ဝါဒ သွက်တၠအဝဵုပၞာန်တံကီုဂှ် နူကဵု Justice For Myanmar ဆက်အာတ်မိက်မံၚ်ရ။

ပရိုၚ်-သြၚ်လောန်တိုၚ်မ်

Photo – Social Media