လ္ဂုၚ်၊ အံက်တဝ်ဗာ (၁၉)
လာၚ်ဇြေန် အခေါန်ကၠောန်ကမၠောန် စပ်ကဵုသြန်ဍုၚ်သ္အာၚ် မလုပ်သၞောဝ်တံ ဟွံမွဲမွဲသာ် ကုညးမသွံရာန် သၠာဲဂတးသြန်ဍုၚ်သ္အာၚ်တံဂှ် ကေတ်အာအရေဝ်ရောၚ် တိုက်သြန်ဗဟဵု သၟဝ်တဲကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုအံက်တဝ်ဗာ (၁၅) တုဲကၠုၚ်တေံရ။
တိုက်သြန်ဗဟဵု ကံၚ်ဇြဳပၞာန်ဂှ် ပ္တိတ်ကဵုလဝ် လာၚ်ဇြေန်အခေါၚ်ကၠောန်ကမၠောန် စပ်ကဵုသြန်ဍုၚ်သ္အာၚ်တံ ဟွံမွဲမွဲသာ် ဟိုတ်နူဂွံဆဵုကေတ် ဒဒှ်ရသွံရာန်သၠာဲဂတးဒၟံၚ် သြန်ဍုၚ်သ္အာၚ် နူကဵုမုက်လိက် Facebook ဂမၠိုၚ် မပ္တံကဵု မုက်လိက် Perfect Money ကေုာံ B to P Money Exchange တံဂှ်ရ သွက်ဂွံစောဲဂဗုတ်မာန် ရေၚ်တၠုၚ်တုဲယျဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
မုက်လိက် Facebook ၜါဏံ ဒဒှ်ရဖံက်ပလီုလုတ်လောန်ဒၟံၚ် ၝောံပိုဒ် ၃၈ သၞောဝ်ဥပဒေကောပ်ကာဲ သြန်ဍုၚ်သ္အာၚ်ဂှ် ဂွံဆဵုကေတ်တုဲ တိုက်သြန်ဗဟဵု စောဲလဝ်ဂဗုတ် နကဵုၝောံပိုဒ် (၄၂) သၞောဝ်ဥပဒေကောပ်ကာဲ သြန်ဍုၚ်သ္အာၚ်ရောၚ် သ္ဂးလဝ်ရ။
သ္အာၚ်နူဂှ်ပၠန် သွက်ဂွံစောဲဂဗုတ် ကုမုက်လိက် Facebook (၁၅) မပ္တံကဵု မုက်လိက် Black Market Rate, USD Exchange Rate, Gold and Forex Trading တံ နကဵုသၞောဝ်ဥပဒေ ကောပ်ကာဲသြန်ဍုၚ်သ္အာၚ် ၝောံပိုဒ် (၄၂) မာန်ဂှ်လေဝ် ရေၚ်တၠုၚ်အာရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး တိုက်သြန်ဗဟဵု ကံၚ်ဇြဳပၞာန်ရ။
ပ္ဍဲတၚ်စၞောန်ပျး သၞောဝ်ဥပဒေကောပ်ကာဲသြန်ဍုၚ်သ္အာၚ် ၝောံပိုဒ် ၃၈ ဂှ်မ္ဂး “ယြဴပူဂဵုလဵုမွဲဟွံဟီု လာၚ်ဇြေန်အခေါၚ်ကၠောန်ကမၠောန် သြန်ဍုၚ်သ္အာၚ်မွဲမွဲသာ် ဟွံမွဲမ္ဂး ဒဒှ်မသၠာဲဂတးသွံရာန် သြန်ဍုၚ်သ္အာၚ်တံဂှ် ကၠောန်သ္ပဟွံဂွံ” ဂးတုဲ တာဒၞါလဝ်ရ။
ဒဒှ်ရဖံက်ပလီုလုတ်လောန်ဒၟံၚ် တၚ်တာဒၞါတံဏံရောၚ် ယဝ်ရဒုဟ်ဒဏ်ပြာကတ်မ္ဂး ဒဏ်ထံၚ် သၟဝ် (၃) သၞာံကဵုဒှ်၊ ဒဏ်သြန်ကဵုဒှ် ဟွံသေၚ်မ္ဂး သီုဒဏ်ၜါသာ်ဏံကဵုဒှ် ဒးဖျေံစၟတ်တုဲ ကပေါတ်သက်သဳတံဂှ်လေဝ် သီကေတ်အာရောၚ် စၞောန်ပျးလဝ် ပ္ဍဲၝောံပိုဒ် (၄၂) ဝွံရ။
ပရိုၚ်−သြၚ်လောန်တိုၚ်(မ်)