နေပျဳတဝ် ၊ ဂျာန်နဝါရဳ ၇
သွက်ပေါဲရုဲမာဲဏံ ဖန်ဇန်လဝ် မာဲဒစးဒုၚ်တံ နကဵုဥပဒေ၊ နဲကဲဥပဒေ၊ နဲကဲကမၠောန်နာနာတံ အရာကၠးမးမံၚ်ရောၚ် ဥက္ကဌကဝ်မယှေန်ပေါဲရုဲမာဲ ဥူတာန်သိုဝ် ဟီုရ။
ပ္ဍဲဂျာန်နဝါရဳ ၅ ကဝ်မယှေန်ပေါဲရုဲမာဲ ကဝ်မယှေန်ပၞာန်ကဵု ဗော်ပရေၚ်ဍုၚ်ကွာန်ဂမၠိုၚ် ဆဵုဂဗလဝ် ပ္ဍဲနေပျဳတဝ် စပ်ကဵုကိစ္စ ပါ်ပါဲဟီုဂးမံၚ် ပရေၚ်မာဲဒစးဒုၚ်ဂှ် ညးဟီုလဝ်ရ။
ကဵုလဝ်မာဲဒစးဒုၚ်ကီု ရိုဟ်လၟိဟ်မာဲကီု ကၠောန်စရၚ်မာဲကီု တင်လလောၚ်တြးကီု ဖန်ဇန်ကဵုလဝ် နကဵုဥပဒေ၊ နဲကဲဥပဒေ၊ နဲကဲကမၠောန်နာနာသာ်တံ ကော်ဘိက်လဝ် ဗော်ပရေၚ်ဍုၚ်ကွာန်၊ ညးစၞးစၠတ်ဓဝ်၊ ညးစၞးပေါဲရုဲမာဲ၊ ဂတမုက် သက်သဳညးဍုၚ်ကွာန်တံတုဲ ဖန်ဖက်လဝ်ရောၚ် သ္ဂးရ။
ပ္ဍဲလၟေၚ်ကမၠောန် ကံက်စရၚ်မာဲဒစးဒုၚ်တံဂှ် ဗော်ပရေၚ်ဍုၚ်ကွာန်တံလေဝ် အရာကၠးမး ညံၚ်ဂွံကဵုအခေါၚ်ပါလုပ်ရေၚ်တၠုၚ်အာကီု ဗော်ပရေၚ်ဍုၚ်ကွာန်ဂမၠိုၚ် အာတ်မိက်ပတိုန်ထ္ၜးလဝ် ဇရေၚ်ကဝ်မယှေန်ပေါဲရုဲမာဲ ဂွံတီရ။
ယဝ်ရ ဟွံသင်ကာ မာဲဒစးဒုၚ်တံမ္ဂး ပတိုန်ထ္ၜး နကဵု ဗီုပြၚ် (၁၃-၁) တုဲ ကလေၚ်စၟဳစၟတ်မာန်ရောၚ် နူလပါ် UEC ဟီုလဝ်ဂှ် ညးတိုန်စိုပ်လဝ်ကောံဓရီု နဝ်သဇင်တုက် ညးအုပ်ကာ (၂) ဗော်ဒဳမဝ်ကရိတ်တေက် ကောန်ဂကူကရေၚ် KNDP သ္ဂးရ။
“စပ်ကဵုမာဲဒစးဒုၚ်တှ်ေ နူကဵုပိုဲ ဟွံဂွံပရိုၚ်ဖအိုတ်ပုဟ် ဒှ်မံၚ်။ ဒၞာဲလ္ၚဵု ပရေၚ်ကၠးမးဟၟဲညးသ္ကံနွံမံၚ်။ လပါ်ညးတံ ဟီုဂှ်တှ်ေ ယဝ်ရဟွံသၚ်ကာမ္ဂး အာတ်မိက် နကဵုဗီုပြၚ် (၁၃-၁) တုဲ ကလေၚ်စၟဳစၟတ်မာန်မံၚ်။ လပါ်ညးတံ ဟီုလဝ်ဟဏံ” သာ်ဝွံ သ္ဂးရ။
တုဲပၠန် ဗော်ပရေၚ်ဍုၚ်ကွာန်ဗွဲမဂၠိုၚ်တံဂှ် ဟိုတ်နူမာဲဒစးဒုၚ်ဂှ် ကျလဝ်မာဲမဒှ်တုဲ စပ်ကဵုမာဲဒစးဒုၚ်ကီု စရၚ်မာဲဗၠေတ်မံၚ်တုဲ အခေါၚ်ကဵုမာဲဆောံလေၚ်လဝ်ဂှ်ကီု သဳကၠဳလဝ် ညးဆက်ဟီုရ။
မာဲဒစးဒုၚ်ကဝ်မယှေန်ပၞာန် ကၠောန်ပေါဲရုဲမာဲလၟုဟ်ဂှ် အကာဲအရာ ပရေအ်နူကဵု ပေါဲရုဲမာဲ ၂၀၁၀ ကၠာတေံဏီ ညးမၚ်လ္ၚတ်ရံၚ်ပေါဲရုဲမာဲမွဲတၠ ပါ်ပါဲလဝ်ရ။
“ပိုဲကလေၚ်ရံၚ် စရၚ်တှ်ေ ၂၀၂၅ ဏံ အကာဲအရာ ပရေအ်နူကဵု ၂၀၁၀ တေံဏီ။ တင်တၟေၚ် UEC ဟီုတှ်ေ တော်လဝ်ကဵုညးနွံစရၚ်ကဵုမာဲဟွံသေၚ် တၟော်လဝ်ကဵု က္ဍိုပ်ကၠံဂွံမာဲ ၜိုတ်ညးကၠုၚ်လဝ်မာဲရဒှ်တုဲ အကာဲအရာ ပရေၚ်ကွေံ ဒးဟီုရ။ မာဲဒစးဒုၚ်ကဵု မာဲကၠုၚ်စုတ်လဝ်တံပံၚ်တုဲ က္ဍိုပ်ကၠံၜိုတ်လဵု ကၠုၚ်ကဵုမာဲ ပ္ဍဲပေါဲရုဲမာဲ ၂၀၁၀၊ ၂၀၁၅၊ ၂၀၂၀ တေံ လလောၚ်တြးကၠုၚ်နွံ၊ တၟေၚ်အိုတ်ဂှ် ၂၀၂၅ ဏံရ” သာ်ဝွံ သ္ဂးရ။
တုဲပၠန် မာဲဒစးဒုၚ်သီုဖအိုတ်ဂှ် မာဲပျဳခိုၚ်ဖျိုဝ်သၟး ဂွံလဝ်တုဲ ဗော်ဒပ်ပၞာန်ဍေံတံထံက်ဂလာန် ညံၚ်ဂွံဂွံလၟိဟ်မာဲဂၠိုၚ်အိုတ် ခြာမံၚ်ညံၚ်ကဵုအကးကဵုတိ ကၠောန်လဝ်မာဲဒစးဒုၚ်တုဲ လီလဝ်ရဂွံမာန် ညးဆက်ဟီုရ။
ပ္ဍဲကဵုပေါဲရုဲမာဲသ္ကုတ် ၁ ဂှ်လေဝ် စပ်ကဵုမာဲဒစးဒုၚ် ပရေၚ်ပါ်ပါဲဂၠိုၚ်မံၚ်ကီုလေဝ် နူကဵုကဝ်မယှေန်ပေါဲရုဲမာဲ ဆက်ကၠောန်အာ ပေါဲရုဲမာဲသ္ကုတ် ၂ ကဵု ၃ ပၠန်ရောၚ် သ္ဂးလဝ်ရ။
သၟဝ်တဲကဝ်မယှေန်ပၞာန်သီအဝဵု ကဝ်မယှေန်ပေါဲရုဲမာဲကၟိန်ဍုၚ်ဂှ်တှ်ေ ဆက်ကၠောန်အာ ပေါဲရုဲမာဲသ္ကုတ် ၂ ပ္ဍဲကဵုဂျာန်နဝါရဳ ၁၁၊ ပေါဲရုဲမာဲသ္ကုတ် ၃ ပ္ဍဲကဵုဂျာန်နဝါရဳ ၂၅ ရောၚ် လလောၚ်တြးလဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – MOI