လိုၚ်ဗၠဲ၊ ဂျာန်နဝါရဳ ၇
သွက်ဂွံကၠောန်ပေါဲရုဲမာဲ သ္ကုတ် ၂ ပ္ဍဲပွိုၚ်ဍုၚ်လိုၚ်ဗၠဲ ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန် ဖျေံလဝ်ဒပ်ပ္ဍဲကဵုဘာလကျာ် ကွာန်တံဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဂိတုဂျာန်နဝါရဳ ပြဟ်ဟ်တေံရ နူကဵုတွဵုရးမန် ဌာန်ဂအုပ်ပၞာန်ရးအဂၞဲ ကွဳစက်ပၞာန်တံရေၚ်တုဲ တတ်လုပ်အာ ဍုၚ်ဖာအၚ်၊ နူဂှ်မွဲအဆံၚ် လုပ်အာလဝ်လပါ် ဍုၚ်လိုၚ်ဗၠဲရ။
ဒပ်ကဝ်မယှေန်ပၞာန် စိုပ်ကၠုၚ်လပါ် ဍုၚ်လိုၚ်ဗၠဲတုဲ ဖျေံဟလိုၚ်လဝ်ဇြဟတ်ဒပ် ပ္ဍဲကဵုဒၞာဲပွဳပွူဍုၚ်မွဲဒမြိပ်ဂှ်ကီု ပတေၚ်လဝ်ပရေၚ်ဂီုကၠီုသၟးဟွံက သ္ကုတ်ကရပ်ဂၠံၚ်လိုၚ်ဗၠဲ-ပိုၚ်ကြုၚ် လပါ်ကွာန် ကသိုဝ်၊ ကမာလေၚ်၊ ကၠအ်ဗြာတ်၊ နံၚ်ခလုၚ်တံဂှ် ဒပ်ကဝ်မယှေန်ပၞာန်ဗမာဗွဲမဂၠိုၚ်တံ စိုပ်မံၚ်ရ။
ဒၞာဲကရောၚ်ပၞာန်ဗမာတံစိုပ်မံၚ် ကွာန်ဖျေံလဝ်ဒပ်တံဂှ် ပါလုပ်မံၚ်သၟဝ်တဲ ပရေၚ်အုပ်ဓုပ် KNU ခရိုၚ်ဖာအၚ် မဟာဒပ် ၇ ကီု ဒၞာဲဒေသပၞာန် လၟိဟ် ၂ ဒပ်ပၞာန်ကောန်ဂကူကရေၚ် KNA တံ ထိၚ်ချုက်လေဝ် ဒှ်မံၚ်ကီုရ။
ပ္ဍဲတွဵုရးကရေၚ် ကၠောန်ပေါဲရုဲမာဲသ္ကုတ် ၂ ဏံ ပွိုၚ်ဍုၚ်လိုၚ်ဗၠဲကဵု ဖာပေါန်တံပါလုပ်တုဲ ဗော်ကရေၚ် KNDP၊ ဗော်ကရေၚ် ဖလုၚ်-သဝဝ် PSDP၊ ဗော်ပျဳခိုၚ်ဖျိုဝ်တံ စှ်ေမံၚ်ပရေၚ်စန်ဒက်မာဲဂှ် နူကဵုဗော်တံဏံ လလောၚ်ပတိတ်လဝ်ပရိုၚ်ရ။
ပ္ဍဲကဵုပွိုၚ်ဍုၚ်လိုၚ်ဗၠဲကဵု ဖာပေါန်တံမ္ဂး ဍုၚ်ဖာပေါန်၊ ဍုၚ်တၟိကွာန်သေံကဵု ကွာန်ဗွဲမဂၠိုၚ် ကၠောန်ပေါဲရုဲမာဲဟွံမာန် ကဝ်မယှေန်ပၞာန် လလောၚ်တြးလဝ်တုဲ လ္တူဍုၚ်ကမမံၚ်၊ ဍုၚ်လိုၚ်ဗၠဲကဵု ကွာန်နွံမံၚ်ကရပ်ညိညရ ကၠောန်အာပေါဲရုဲမာဲရောၚ်။
ပြဟ်ဟ်ဏံ ပ္ဍဲကဵုပွိုၚ်ဍုၚ်လိုၚ်ဗၠဲ ပေါဲဗတိုက်ဟၟဲကီုလေဝ် ဒှ်တိုန်ပရေၚ်ကြံၚ်မ္ၚိုဟ်မာန်တုဲ ပ္ဍဲပွိုၚ်ဍုၚ်ဖာပေါန်မ္ဂး ကွာန်ကတိုၚ်တိကဵု ဒၞာဲရုၚ်ဗျူဟာပၞာန်ဗမာတံဂှ် ပေါဲဗတိုက်ဆက်ဒှ်မံၚ်နွံတုဲ ၜၚ်ကျာဒပ်ပၞာန်ဗမာတံ ကၠုၚ်ကြဳဖျေံမံၚ်ဗုၚ် ဆက်က်ရ။
ဗွဲတၟေၚ် ရုၚ်ဗျူဟာဖာပေါန် ညံၚ်ဟွံဂွံစှ်ေအာဂှ် ဒပ်ကဝ်မယှေန်ပၞာန် စကာၜၚ်ကျာ ဘိုၚ်ပန်ရီုကဵုမံၚ်အရိုဟ်ဟ်တ္ၚဲကီု နူကဵုဍုၚ်ကမမံၚ် ကရောၚ်ပၞာန် ဇက်ကၠုၚ်ကီုလေဝ် ဟိုတ်နူဒပ်ပၠန်ဂတးတံ မာတ်ဆိုအ်ဗတိုက်မံၚ်ဂှ် ဆက်တိုန်ဂတဟွံဂွံ ဒးဖျေံလဝ်ဒပ် ပ္ဍဲအကြာကွာန် ဝါဒူ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ