မတ်မလီု၊ ဂျာန်နဝါရဳ ၂၀
ပ္ဍဲကဵုသၞာံအာ ၂၀၂၅ တေံ အလုံဍုၚ်ဗမာ လၟိဟ်ပရေၚ်ဒှ်လဝ်ပဋိပက္ခအောန်စှ်ေကီုလေဝ် ကောန်ဍုၚ်ကွာန်တံ ပွမဒးဒုၚ်ဂစိုတ်လဝ် ဂအုံဂအုံကလောအ်ကလောအ်ဂှ် ပဵုတိုန်ကၠုၚ်မံၚ် မွဲသၞာံကဵုမွဲသၞာံရောၚ် ISP-Myanmar လလောၚ်တြးလဝ် ပ္ဍဲဂျာန်နဝါရဳ ၁၅ ရ။
လိက်ကၞပ်တင်သ္ၚဳဂၠိပ်မဟာဗျူဟာကေုာံ တၠုၚ်လအာပတဝ်အာ (၂၀၂၅-၂၀၂၆) ပ္ဍဲကဵုခါတ်လဝ်အကာဲ ဗီုပြၚ်အဏုၜတ် သွက် ၂၀၂၅ ဂှ် ချူထမံက်လဝ်ရ။
ၜတ်ကၞာတ်အာပရေၚ်ဒှ်လဝ်ပေါဲဗတိုက် သၞာံ ၂၀၂၄ ကဵု ၂၀၂၅ မ္ဂး အောန်စှ်ေအာ ၂၈% တုဲ ထပ်ၜတ်ကၞာတ်အာကဵုသၞာံပေါဲဗတိုက် ဒှ်လဝ်ဂၠိုၚ်အိုတ် ၂၀၂၂ တေံမ္ဂး ဒဵုကဵု ၅၅% ထပက်စှ်ေအာ မဒှ်ရ။
ပ္ဍဲကဵုတွဵုရးမန် ပဆုဲပြံၚ်ဏာ ကရောၚ်ပၞာန်တမ်ဒပ် PDF ပ္ဍဲကဵုသၞာံအာတေံတုဲ ပရေၚ်လဝေၚ်ပၞာန် အောန်စှ်ေအာရဂှ် သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် နာဲတလနိုင် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“တမ်ဒပ် PDF နူကဵုဒေသမန်သၠုၚ်ကျာတံ ပဆုဲပြံၚ်ဏာ လပါ်ၜဳဗတာၚ်တေံ လပါ်လ္ဂုၚ်တေံတုဲ လပါ်ပိုဲဏံ ဗီုပြၚ်ဖျေံလဝ်ဗီုမူလ ဇြဟတ်ယအ်စှ်ေအာ။ ဟိုတ်ဂှ်တှ်ေ နူလပါ်ပိုဲ အကာဲအရာ ထပက်ပၞာန် အောန်စှ်ေအာ။ မွဲတၚ်ပၠန် နူလပါ်သၞတံ စကာတိုန် နဲကဲဒရုၚ်အဆံၚ်သၠုၚ်တိုန် ဂျာန်ပါတံသၠုၚ်တိုန်တုဲ ပိုဲထပက်ပၞာန်ဝါတ်ဂါတ်အာနွံ။ လ္တူဏံ ဒှ်အာဗီုပြၚ် အသိၚ်ဍိုန်လျစှ်ေအာ” သာ်ဝွံ သ္ဂးရ။
ပဋိပက္ခတံ အဆံၚ်ပေါဲဗတိုက် ညးမွဲဗလဵုအဲမွဲဗလဵုဒှ်မာန်ကီုလေဝ် ပေါဲဗတိုက်ဇေတ်တ်တံ မွဲလပါ်ကဵုမွဲလပါ် ညံၚ်ဂွံကျအာ ပိုတ်တ်သ္ကုတ်တ်ဂှ် ထပိုတ်အာညးသ္ကံဟွံမာန်ပုဟ် စိုပ်အာဍာ်ဏံယျရောၚ် ISP-Myanmar သ္ဂးလဝ်ရ။
တုဲပၠန် အခိၚ်ဒပ်ပၞာန်ဗမာ အစောန်စရာဲဍိုန်လျစှ်ေအာ ဒှ်မံၚ်အကာဲအရာဇြဟတ်အောန်အိုတ်ဂှ် ဒးဇီုကပိုက်လဝ်ကဵု ပရေၚ်ဍုၚ်ကြုက်ဘပဠကီုလေဝ် ဗွဲကြဴ နူလပါ်ဂကောံဇြဟတ်ပၠန်ဂတးတံလေဝ် ဗီုပြၚ်နတဲစှ်ေစှ်ေဖန်ဖက်ဟွံမာန်ဂှ် ဒပ်ပၞာန်ဗမာကေတ်ဂွံအာအခေါၚ်အရာခိုဟ်ရောၚ် ထံက်ထ္ၜးလဝ်ရ။
အခိၚ်ဒပ်ပၞာန်သီအဝဵုတေံဂှ် အလုံဍုၚ်မွဲ ဒပ်ပၠန်ဂတးတံ ထိင်ချုက် ဂွံလဝ် ၜိုတ် ၂၅၆,၀၀၀ စတုယာန်ကဳလဝ်မဳတာနွံတုဲ ၜတ်ကၞာတ်အာအလုံဍုၚ်မွဲမ္ဂး ထိၚ်ချုက်ဂွံလဝ် ၜိုတ် ၃၈% ရ။
ဒပ်ပၞာန်ဗမာဆောံလေၚ်အာလဝ် ဒၞာဲဗ္ဒိုပ် ၂၆ မဂှ် ပ္ဍဲကဵုသၞာံ ၂၀၂၅ ကလေၚ်ထိၚ်ချုက်ဂွံကီုလေဝ် ဗ္ဒိုပ်ဖျေံလဝ်ဒပ် ဟွံအောန်နူကဵု ၁၅၀ ဒၞာဲတံဂှ် ဒးဗလးလဝ်တဲဖိုအ် မဒှ်ရ။
ပ္ဍဲကဵုဍုၚ်ကျလဝ်ပၞာန်တံဂှ် ဒပ်ပၞာန်ဗမာကလေၚ်ထိၚ်ချုက်ဂွံ ၁၅ ဍုၚ်ကီုလေဝ် ဒပ်ပၠန်ဂတးတံဂှ်တှ်ေ ထိၚ်ချုက်ဂွံလဝ် ၈၇ ဍုၚ်ဏီအကာဲအရာဒှ်မံၚ်ရ။
မွဲလပါ်ပၠန် ပရေၚ်ကောန်ညးဍုၚ်ကွာန်တံ ပွမဒးဒုင်ဂစိုတ်လဝ်ဂအုံဂအုံကလောအ်ကလောအ် ၁၀ တၠကဵု လပါ်လ္တူတံမ္ဂး ပ္ဍဲကဵုသၞာံ ၂၀၂၅ ဒှ်ကၠုၚ်လဝ် ၃၂ ပရူပရာနွံတုဲ ကောန်ညးဍုၚ်ကွာန်ဟွံအောန်နူကဵု ၅၉၉ တၠ ချိုတ်လဝ်ရောၚ် ပ္ဍဲတၚ်နၚ် ISP-Myanmar ထမံက်ထ္ၜးလဝ်ရ။
ဟိုတ်နူဒပ်ပၞာန်ဗမာ ဗတိုက်လဝ်ကဵုၜၚ်ကျာ၊ အခိၚ်ကရောၚ်ပၞာန်လုပ်ကၠုၚ် ဂစိုတ်စံၚ်လဝ်တံကီု၊ ပန်လဝ်ကဵုလွဟ်ဇၞော်၊ အခိၚ်ကရောၚ်ပၞာန်လုပ်ကၠုၚ်ဂစိုတ်လဝ်မၞိဟ်ကေုာံ ဂကောံရပ်လွဟ်တၞဟ်ဟ် ဂစိုတ်လဝ်တံပါလုပ်မံၚ် ပ္ဍဲကဵုတၚ်နၚ်ပွမဒးဒုင်ဂစိုတ်လဝ် ဂအုံဂအုံကလောအ်ကလောအ်တံ မဒှ်ရ။
ပ္ဍဲကဵုတွဵုရးမန် ညးဍုၚ်ကွာန်တံဒးလဝ်ဘဲပဋိပက္ခကေုာံ ပွမဇီုကပိုက်ပရေၚ်ပၞာန်နွံမံၚ်ကီုရောၚ် ဒါရိုက်တာပရိုဂရမ်ဖံၚ်ဒေဝ်ယှေန် အခေါၚ်အရာမၞိဟ်ညးဍုၚ်မန် နာဲအဲမန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ရံၚ်အာအတိုၚ်မွဲသၞာံတှ်ေ ညးဍုၚ်ကွာန်တံ ဒးလဝ်ဘဲပဋိပက္ခဒကဲဒကဲ ကေုာံ ပွမဇီုကပိုက်ပရေၚ်ပၞာန်နွံမံၚ် ဗွဲမဂၠိုၚ်ရောၚ် ဂွံဆဵုညာတ်လဝ်။ ဣဏံဂှ် ပရေၚ်ဖံက်ပကဝ်အခေါၚ်အရာမၞိဟ် ဒှ်မံၚ်အရာဇၟာပ်ပ်တ္ၚဲတံဟွံပါဏီ။ ဥပမာ ဓရတ်အာတ်ကေတ်သြန် ပရေၚ်ယိုက်ဝန်ပၞာန်တံ ဟွံပါဏီ။ ယဝ်ရရံၚ်အာ ပရေၚ်ပဋိပက္ခတံမ္ဂး တောဲကဵုအခေါၚ်အရာမၞိဟ်တံနွံတုဲ ပိုဲတံပတိုန်ထ္ၜးလဝ်ကဵု ပရေၚ်အခေါၚ်မၞိဟ်တံ မဒှ်ရ” သာ်ဝွံသ္ဂးရ။
ပ္ဍဲကဵုတွဵုရးမန် သၞာံ ၂၀၂၅ ဂှ် စွံပွန်ပန်လဝ်လွဟ်ဇၞော်ဂှ် ၃၈၀ ဝါ၊ ဗတိုက်လဝ်ကဵုဒရုၚ်၊ ၜၚ်ကျာသၞေၚ်ကဝဲ၊ ၜၚ်ကျာဂျက်ဂှ် ၜိုတ် ၁၅၀ ဝါ နွံရ။
တုဲပၠန် ပေါဲဗတိုက်ဒှ်လဝ် ၜိုတ် ၁၈၀ ဝါ၊ သ္ၚိဌာန်ဒးလီုလာ်ဆောံလေင်အာလဝ် အကြာနူကဵု ၉၀၀ ဒဵုကဵု ၁၄၀၀ မ နွံတုဲ ကောန်ဍုၚ်ကွာန်ချိုတ်လဝ် အကြာ ၁၀၅ တၠကဵု ၁၂၅ နွံရောၚ် ဂွံတီနူကဵု ဖံၚ်ဒေဝ်ယှေန် အခေါၚ်အရာမၞိဟ်ညးဍုၚ်မန်ရ။
တုဲပၠန် နူကဵုပေါဲဗတိုက် ဗတိုက်သရိုဟ်တၠအဝဵုပၞာန်အလုံမွဲဍုၚ် ဒပ်ပၞာန်ညံၚ်ဂွံရုန်တိတ်ပၞော်ပရေၚ်ဍုၚ်ကွာန် သွက်ဂွံဂွံဗဗွဲဓဝ်မာန်ဂှ် ဒပ်ပၞာန်ဗမာကၠောန်အာပေါဲရုဲမာဲ သ္ကုတ်ကဵုသ္ကုတ်ဂှ်တှ်ေ ပ္ဍဲဂျာန်နဝါရဳ ၂၅ မ္ဂး ကၠောန်အာသ္ကုတ် ၃ မဒှ်ရောၚ်။
ပရိုင်-သြၚ်လောန်တိုၚ်မ်
Photo – CJ