မတ်မလီု၊ ဂျာန်နဝါရဳ ၂၁
တွဵုရးမန် ပ္ဍဲဍုၚ်မတ်မလီု နူကဵုညးဒေသဂမၠိုၚ်အာကၠုၚ်မံၚ်တရဴတံဂှ် ဗၠာဲသၟိၚ်ထိၚ်ယာန်မဝ်တဝ်ပဳကေဝ်တံ ဗက်ဂၠာဲစမံၚ်သြန်ကြီုကွေံကွေံရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
မဝ်တဝ်ပဳကေဝ်တံ မၚ်မံၚ်အကြာဂၠံၚ်သွာၚ်နာနာတံကီု ဒၞာဲပၞော်လုပ်တိတ်ဍုၚ်ကီု ပ္ဍဲကဵုဂိတ်ကွဳစက်တံကီု ရပ်ကွဳစက် ကွဳလိုန်ဓါတ်၊ စနူကဵု မဳနဳအိုဝ်ဝေတံလေဝ်ဟွံသှ်ေ ရပ်တုဲအာတ်မံၚ်သြန် အိုတ်အစောန်ရ။
တန်တဴကဵုအမှုရပ်လဝ်ဂှ် ပ္ညဳပ္ညပ်ကေတ်သောၚ်ကဵုလှုဲဓဝါဲဂှ်လေဝ်နွံ ယဝ်ရပ္ညဳပ္ညပ်ကေတ်ဟွံပြေပြံၚ်မ္ဂး မဝ်တဝ်ပဳကေဝ်တံ ဍေံထပိုတ်ကဵုချလာန်တုဲ ကဵုဗက်အာသောၚ်အမှုပ္ဍဲကဵုရုၚ်ဆေင်စပ် မဒှ်ရ။
ကွဳစက်ၜိုတ်ရပ်ဂွံလဝ်တံဂှ် တပ်ဒဏ်တုဲ ကဵုလေဲသြန်ဒဏ်ဓဝါဲဂှ်လေဝ်နွံ ယဝ်ကဵုကဵုဒဏ်သြန်ဓဝါဲဂှ်ဟွံမာန်မ္ဂး ဒးအာရုၚ်သၞောဝ်ဓရ်ရောၚ် ဘပဠမံၚ်လေဝ်နွံရဂှ် ညးဒေသမတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဗၠာဲသၟိၚ်ထိၚ်ယာန် မဝ်တဝ်ပဳကေဝ်တံ ဗီုလဵုကၠောန်စမံၚ်ရောဟီုတှ်ေ လိုင်သေၚ်၊ အထုပ်ဟွံပါမ္ဂး လိုၚ်သေၚ်ပါလေဝ် ဒးဒဏ်သြန်ဓဝါဲဂှ်ပၠန်။ ဍေံထပိုတ်ကဵုချလာတ်မွဲတၞး။ ရဲဗက်စအကြာ ဂဇအ်မံၚ် ၃/၄ ။ ဒးအာရုၚ်သၞောဝ်ဓရ်ဏောၚ် ဘပပဠပၠန်။ ဟွံမိက်အာတှ်ေ ကဵုလဝ်ညးစအကြာဂှ်ညိ။ နူကဵုမၞိဟ်ဏံ ကပေါတ်ဍေံတံသီဂွံလဝ် လိုၚ်သေၚ်ဇကု ကသအ်ဇကု ဍေံကလေၚ်အပ်ကဵုဇကု၊ ပ္ဍဲဂိက်သၞေဟ်ကၚ်တံ ကၠောန်စမံၚ်ဟဂှ်ရ” သာ်ဝွံသ္ဂးရ။
တုဲပၠန် ဗၠာဲသၟိၚ်ထိၚ်ယာန်မဝ်တဝ်ပဳကေဝ်တံ ယဝ်ရစၟဳစၟတ်ကွဳစက်မ္ဂး မွဲအမှုအောန်အိုတ် ပိဠက်ဘာ်ဒကဝ် အာတ်မံၚ်ရ။ မၞိဟ်ရဲကြပ်ကဵုဍေံတံဂှ်တှ်ေ ဖံက်ပကဝ်စေဝ်ပၞောန်ကွဳစက်ယာန်နွံကီုလေဝ် ပရေၚ်ရပ်စပ်ကေတ်အရေဝ်ဟၟဲပုဟ် ညးဆက်ဟီုရ။
ဗၠာဲသၟိၚ်ထိၚ်ယာန် မဝ်တဝ်ပဳကေဝ်တံ ပ္ဍဲကဵုစၟဳစၟတ် လိုၚ်သေၚ်ကွဳစက်ကဵု လိုၚ်သေၚ်မၞိဟ်ကီု နွံဟွံမွဲစၟဳစၟတ်တုဲ ပါတ်စုတ်လဝ်ဇုက်ဂၞိၚ်ဟာ စၟဳစၟတ်နူကဵုဗလးတိ သီုကဵု CCTV တံတုဲ အာတ်ကေတ်မံၚ်သြန်ရ။
ပ္ဍဲကဵုစၟဳစၟတ်ကွဳလိုန်ဓါတ်ပၠန် ဒ္ၚောဝ်၊ ဂတဝ်မဂၞန်၊ ကထုပ်၊ လိုၚ်သေၚ်ကွဳ၊ လိုၚ်သေၚ်မၞိဟ် စၟဳစၟတ်တုဲ ကွဳစက်မဳနဳအိုဝ်ဝေဍောတ်တ်တံဂှ် လိုၚ်သေၚ်ကွဳစက်၊ လိုၚ်သေၚ်မၞိဟ်ဟွံက ပတိုန်လဝ်မၞိဟ်အပဵုဟာ စၟဳစၟတ်အာတ်ကေတ်မံၚ်သြန် မဒှ်ရ။
ပ္ဍဲဍုၚ်မတ်မလီု ဟိုတ်နူကဝ်မယှေန်ပၞာန်ထိၚ်ချုက်ဂွံလဝ်ပေၚ်ၚ်ဂှ် နူကဵုသၟဝ်တဲကဝ်မယှေန်ပၞာန် ဗၠာဲသၟိၚ်ထိၚ်ယာန်မဝ်တဝ်ပဳကေဝ်တံဏံ ထ္ၜးဟိုတ်စေဝ်ပၞောန်ဂၠံၚ်၊ စေဝ်ပၞောန်စက်ယာန်တုဲ ဗက်ဓရတ် အာတ်ကေတ်မံၚ်သြန် နူကဵုညးဍုၚ်ကွာန်တံ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ