ရေဝ်၊ ဂျာန်နဝါရဳ ၂၁
တွဵုရးမန် ပ္ဍဲပွိုၚ်ဍုၚ်ရေဝ်ဂှ် ကရောၚ်ပၞာန်ဒပ်ကဝ်မယှေန်ပၞာန် ဂေတ်ဂေၚ်ထပက်မံၚ်ဂှ်တုဲ ညးဒေသတံ ဟွံဂံၚ်အာကၠအ်၊ ဒၞာဲကမၠောန်ရောၚ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဒပ်ကဝ်မယှေန်ပၞာန် ဇြဟတ် ၁၀၀ ပြင်င် စနူကဵုဂိတုဂျာန်နဝါရဳ ၁၅ ဂှ် ဂေတ်ဂၚ်ထပက်ပၞာန် လပါ်ပွိုၚ်ဍုၚ်ရေဝ်သၟဝ်ကျာ မွဲကွာန်တုဲမွဲကွာန်လုပ်တိတ်မံၚ် မဒှ်ရ။
အဃောကရောၚ်ပၞာန်ဏံ အာလ္တူဂၠံၚ် ၜိုတ်ဆဵုညာတ်ဒးရဲကၠအ်တံမ္ဂး ကော်သၟာန်စၟဳစၟတ်ကီု ကဵုသ္ပညးထ္ၜးဂၠံၚ်ကီု စကာမံၚ်ဂှ်တုဲ ပြဟ်ဟ်ဏံညးမွဲမှ ဟွံဂံၚ်အာကၠအ်အိုတ်ဒှ်မံၚ် သ္ဂးရ။
ကရောၚ်ပၞာန်ဒပ်ကဝ်မယှေန်ပၞာန် ဂေတ်ထပက်မံၚ်ပၞာန်ဂှ်ကဵု ဒပ်ပံၚ်တောဲဂကောံမဟာမိတ်တံ ပ္ဍဲကဵုဂျာန်နဝါရဳ ၁၅ ဒၞာဲကွာန်အံၚ်တပျေဂှ် ဒှ်လဝ်ပေါဲဗတိုက်မွဲလန်၊ ပ္ဍဲကဵုဂျာန်နဝါရဳ ၁၈ ဒၞာဲကရပ်ကွာန်ကၞေၚ်တၟအ်ဂှ် ဒှ်ကၠုၚ်လဝ်ပေါဲဗတိုက် မွဲဝါကီုရ။
ဒဵုကဵုဂျာန်နဝါရဳ ၂၀ အခိၚ်နူဂယးဂှ် ကရောၚ်ပၞာန်ဏံချဳဒရာၚ်မံၚ်ပရေၚ်ပၞာန် အကြာပွဳပွူကွာန်ကျိုက်ဂှ်တုဲ အကြာၜါလပါ်ပရေၚ်ပၞာန် ကြံၚ်မ္ၚိုဟ်မံၚ်ရောၚ် ဂွံတီနူကဵုဒပ်ပၠန်ဂတးတံရ။
ပ္ဍဲဂျာန်နဝါရဳ ၁၅ တေံ ပေါဲဗတိုက်ၜါလပါ်ဒှ်ကၠုၚ်လဝ် ပ္ဍဲကဵုကွာန်အံၚ်တပျေဂှ် လပါ်ဒပ်ကဝ်မယှေန်ပၞာန် ချိုတ် ၃ တၠ၊ ဒးဝပ် ၆ တၠနွံတုဲ လပါ်ဒပ်ပၠန်ဂတးတံဂှ် ကောန်သ္ဂံၚ်မွဲတၠဒးလဝ်ဝပ်ညိည ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – Social Media