မတ်မလီု ၊ ဂျာန်နဝါရဳ ၂၀
ရဲကဝ်မယှေန်ပၞာန်တွဵုရးမန်တံ ပ္ဍဲကဵုဍုၚ်မတ်မလီု ကၠောန်မံၚ်ကိုန်အစဳဇန်သၠဲပတိတ်ဍုၚ်တၟိလှိုၚ်ဂှ် သီကေတ်လဝ်တိဧကဗွဲမဂၠိုၚ်တုဲ ထမံက်မံၚ်ရုပ်ရဴရောၚ် ညးဒေသကီု ညးကြပ်ကဵု ကဝ်မယှေန်ပၞာန်တံကီု ဟီုကဵုဌာန်ပရိုၚ်သြၚ်လောန်တိုၚ်မ်ရ။
သီကေတ်လဝ်တိဗ္ၚဧက အကြာအရာပ်လှိုၚ်ကဵုသာယာဧတံတုဲ ကဝ်မယှေန်ပၞာန်ကၠောန်မံၚ်ကိုန်အစဳဇန် သၠဲပတိတ်ဍုၚ်တၟိ လှိုၚ်ရ။
ပြဟ်ဟ်ဏံ တိဗ္ၚသီလဝ်နူအခိၚ်ကၠာကၠာတေံသၟးဟွံက ကဵုမၞိဟ်တံပါဲထောံနူသ္ၚိဌာန်ဂှ်ကီု ကၠာတေံကၠောန်လဝ်ဒၞာဲဝဳစာၚ်ကေုာံ ကမၠောန်ဝဳကကၟာတံဂှ်လေဝ် ထပ်သီကေတ်တုဲ ကၠုၚ်ထပေၚ်စုတ်မံၚ် တိဂအာၚ်တံ မဒှ်ရ။
သွက်ရဲဒေါအ်ဇူပၞာန်တံ ဖျေံကဵုဂအာၚ်သ္ၚိဂးတုဲ ကၠောန်တိုန် ကိန်အစဳဇန်သၠဲပတိတ်ဍုၚ်တၟိလှိုၚ်ဂှ် လၟုဟ်မ္ဂး ၚုဟ်မးဂအာၚ်သ္ၚိမွဲဂအာၚ်မ္ဂး ဒှ်တိုန်သြန်လ္ၚီကိုတ်ပြၚ်ၚ်တုဲ ထပ်သၠဲထပဵုကၠောန်မံၚ်ရဂှ် ညးကြပ်ကဵု ကဝ်မယှေန်ပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကၠာတေံ သွက်အရင်ကောန်ပၞာန်တံဂမတုဲ ကၠောန်ကိုန်အစဳဇန်ဍုၚ်တၟိဏောင် ဟီုဂးမံၚ်အိုတ်။ ဗွဲကြဴ ဂအာင်သ္ၚိ ၄၀/၆၀ မွဲဂအာင် ဒှ်အာ ကိုတ်လ္ၚီဂှ် ထပ်သီကေတ်ဒၞာဲတၞဟ်ဟ်ပၠန်။ အဓိက ကၠာအလဵုအသဳတံဏံဟွံပြံၚ်ဏီ မိက်ဂွံကဵုကိုန်အစဳဇန်ဏံ တုဲဒှ်အာ။ သွက်ဂုဏ်ဖဵုပရဲပရၚ်ဍေံတံရဏောင်” သ္ဂးရ။
တုဲပၠန် ကိုပ်ကၠာဲတဲကဝ်မယှေန်ပၞာန်တွဵုရးမန် သွက်ဂွံကၠောန်အာကိုန်အစဳဇန်ဍုၚ်တၟိလှိုၚ်ဏံ ရန်လဝ်တိဧက ၜိုတ် ၅၀၀ ကီုလေဝ် ပြဟ်ဟ်ဏံထပ်ကၠောန်လဝ်ဂှ် ဒှ်အာၜိုတ်ဧက ၁၀၀၀ ပြၚ်နွံမံၚ် ညးဆက်ဟီုရ။
ကဝ်မယှေန်ပၞာန်တွဵုရးမန် ထမံက်မံၚ်ကိုန်အစဳဇန်ဍုၚ်တၟိလှိုၚ်ဂှ် ပြဟ်ဟ်ဏံ ဂအာင်သ္ၚိ ပေ ၄၀/၆၀ မွဲဂအာင် တန်တဴကဵုဒၞာဲဍာန်ဂၠံၚ်တုဲ အောန်အိုတ်သြန်ကိုတ် ၁၃၀၀ ဒကေဝ် ဒဵုကဵုကိုတ် ၁၇၀၀ ဒကေဝ် ၚုဟ်မံၚ်နွံမံၚ်ရောၚ် ဂွံတီရ။
ကိုန်အစဳဇန် ဍုၚ်တၟိလှိုၚ်ဏံ ကဝ်မယှေန်ပၞာန်တွဵုရးမန်ကၠောန်အာမံၚ်ဏံဂှ် ပံၚ်လဝ်ကဵုသေဌဳခရိုနဳ ဥူမိုဝ်ကျဝ်တံတုဲ ထပေၚ်စုတ်တိဂၠံၚ်ဍာန်၊ ပစူကဵုတိုင်ပၟတ်ဂှ် တက်ဂအာင်သ္ၚိ သွံစမံၚ်အိုတ်ရ။
ကၠာဟွံထမံက်ရုပ်ရဴ ကၠောန်ကိုန်အစဳဇန် ဍုၚ်တၟိလှိုၚ်ဏံဂှ် သ္ၚိဌာန်ညးဍုၚ်ကွာန်၊ ဘာလကျာ်၊ သ္ၚိဆေင်ဖျာ ဒၞာဲစမြိုၚ်လၟိဟ်ကဵုကၠံ သိုင်ခၞံလဝ်ခိုၚ်ၚ်ကၠိုက်က်နွံမံၚ်တံဂှ် ထ္ၜးဟိုတ်တိၜက်ၜေတ်ဂးတုဲ ကဝ်မယှေန်ပၞာန်တွဵုရးမန် သီပလီုပလိုက်ထောံသီုဖအိုတ် မဒှ်ရ။
ပရိုင်-သြၚ်လောန်တိုၚ်မ်
Photo – Social Media