ကွာလာလမ်ပူ၊ ဂျာန်နဝါရဳ ၂၁
ဂကောံအာသဳယာန် ၁၁ ဍုၚ်ပါလုပ်မံၚ်တံ ပြဟ်ဟ်ဏံ ကၠောန်မံၚ်ပေါဲရုဲမာဲဂှ် ဟွံသ္ပစၟတ်သမ္တီတုဲ ညးမၚ်ကျောဝ်ရံၚ်တံဂှ်လေဝ် ဗလးဗစိုပ်ဏာဟွံမာန်ပုဟ် ဝန်ဇၞော်ဍုၚ်သ္အာၚ်မလေဝ်ယှာ မိုဟာမက် ဟာသာန် ဟီုလဝ် ပ္ဍဲဂျာန်နဝါရဳ ၂၀ ရ။
စနူကဵုဒဳဇြမ်ပါ ၂၈ ပေါဲရုဲမာဲ သ္ကိုပ်ပၞာန်တံ ကၠောန်မံၚ်ဂှ် သွက်ပရေၚ်အုပ်ဓုပ်ပၞာန်ညးတံ ဂွံဆက်အယုက်မာန် စၞးညးတံစကာလဝ်ဗော်ပရေၚ်တံတုဲ ပတိတ်ကသပ်ဖန်ကၠောန်လဝ်ရောၚ် ကုလသမဂ္ဂ၊ ဍုၚ်ပလိုတ်တံ ကေုာံ ဂကောံအခေါၚ်အရာမၞိဟ်တံ ဟီုလဝ်ရ။
တင်ဟီုမံၚ်သာ်ဏံဂှ် က္ဍိုပ်သ္ကိုပ်ပၞာန်တးပါဲတုဲ သွက်ဂွံသၠောဲပအပ်အဝဵုကု အလဵုအသဳကောန်အရာပ်မာန်ဂှ် ကၠောန်ကဵုပေါဲရုဲမာဲ သ္ဂးရ။
ကၠောန်လဝ်ပေါဲရုဲမာဲ ၜါအလန်ဏံ ညးကၠုၚ်ကဵုမာဲအောန်မံၚ်တုဲ ဗော်ပျဳခိုၚ်ဖျိုဝ် စၞးဒပ်ပၞာန်ဗမာ ဂွံလဝ်ဒၞာဲအမာတ်ဂၠိုၚ်အိုတ်ရ။
ပေါဲရုဲမာဲအလန်ကၠာအိုတ် အတိုၚ်သွဟ်တိတ်လဝ်မ္ဂး ဗော်ပျဳခိုၚ်ဖျိုဝ် ဂွံလဝ်ဒၞာဲစၠတ်ဓဝ်သၟဝ် အမာတ် ၈၈% ဇၞးလဝ်မာဲ ဂွံတီရ။
သွက်ဂွံဗလးကဵုနၚ် ညးမၚ်ကျောဝ်ရံၚ် ပေါဲရုဲမာဲဂှ် သ္ကိုပ်ပၞာန်တံအာတ်မိက်လဝ်ဂှ် နူကဵုအာသဳယာန် တးပါဲလဝ်ရောၚ် မိုဟာမက် ဟာသာန် ဟီုလဝ်ကဵု စၠတ်ဓဝ် မလေဝ်ယှာရ။
ပ္ဍဲသၞာံ ၂၀၂၅ သဘၚ်သဳကၠဳအာသဳယာန်လၟေၚ်သၞာံ ကၠောန်လဝ် ပ္ဍဲကွာလာလမ်ပူဂှ် တးပါဲလဝ်မဒှ်ရောၚ် ညးဟီုရ။
ဆဂး ကောန်ဂကောံဍုၚ်လ္ၚဵုလ္ၚဵုတံ နကဵုစိတ်ဆန္ဒဇကုညးတံ ဗလးဗစိုပ်လဝ် ညးမၚ်ကျောဝ်ရံၚ် ပေါဲရုဲမာဲနွံ ဝန်ဇၞော် ဟာသာန်ဟီုရ။
စပ်ကဵုတင်ဒတူလိုၚ်ပေါဲရုဲမာဲဍုၚ်ဗမာဂှ် အမာတ်စၠတ်ဓဝ်မွဲတၠသၟာန်လဝ်တုဲ ပေါဲရုဲမာဲသ္ကိုပ်ပၞာန်တံ ကၠောန်လဝ်ဂှ် အာသဳယာန် သ္ပစၟတ်သမ္တီဟွံသေင်ပုဟ် ကလေၚ်သှ်လဝ်ကဵု ရ။
ပေါဲရုဲမာဲဍုၚ်ဗမာဂှ် ပရေၚ်သၠးပွးဓရ်ယာဟွံမွဲတုဲ နကဵုအလဵုအသဳဍုၚ်ဂၠးကဝ်တံ ညံၚ်ဟွံဂွံသ္ပစၟတ်သမ္တီဂှ် သ္ကိုပ်စၟဳစၟတ်ဗွဲတၟေၚ်ကုလသမဂ္ဂ ဗတိုက်ဖအောဝ်လဝ်ရ။
အလုံဍုၚ်မွဲဒှ်မံၚ်ပၞာန်တုဲ ဒၞာဲကဝက်ဍုၚ်ဂှ် ထိၚ်လဝ်ဟွံမာန် အကာဲအရာဒှ်မံၚ်ဏံ ကၠောန်လဝ်ပေါဲရုဲမာဲဂှ် အတိုင်ညးဂမၠိုၚ်တံ ဒစးဒုၚ်တော်တၟော်လဝ် စၞးဒပ်ပၞာန် ဗော်ပျဳခိုၚ်ဖျိုဝ်သၟး ဂွံလဝ်ဇၞး မဒှ်ရ။
Ref:Thestraittimes