ကျာ်ထဝ်၊ အံက်တဝ်ဗာ (၂၀)
ပ္ဍဲပွိုၚ်ဍုၚ်ကျာ်ထဝ် တိဍာ်ထိၚ်ဒဝ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် အပ္ဍဲတ္ၚဲအကြာဏံ ပေါဲဗ္တိုက် ကဵုဒပ်ကံၚ်ဇြဳပၞာန်တံ သာသ္ကာတ်မြဟ်ကၠုၚ်ရဂှ် လျိုၚ်ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုအံက်တဝ်ဗာ (၁၂) တေံ ဒပ်ပံၚ်ကောံ ဒပ်ပၞာန်ဗၠးၜး ကောန်ဂကူကရေၚ် KNLA တံ အာစိုပ်ဗ္တိုက် သၞေဟ်ကၚ်စၟဳစၟတ် ပရေၚ်ဂီုကၠီု ကံၚ်ဇြဳပၞာန် မၞုံအပ္ဍဲသၞေဟ်ကာတိုန်ဒဵု ကျာ်ဣသိယဵုဂှ်တုဲ လ္ပာ်ကံၚ်ဇြဳပၞာန် နကဵုဇြဟတ်ဒပ် (၃၀၀) ပြၚ် ထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်ကျာ်ထဝ်ရ။
လ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ စနူဂိတုအံက်တဝ်ဗာ (၁၄) တေံတုဲ လ္ပာ်ကွာန် မၞုံအကြာ (သိမ်ဇရပ်) ကေုာံ ကွာန်မုခ်ပြေၚ် (မုပ္ပလၚ်) ၊ ဂကောံကွာန် (ပျဉ်းကတိုးကုန်း) နူပ္ဍဲပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်ဒၟံၚ် ပေါဲဗ္တိုက်အရိုဟ်ဒဒှ်တ္ၚဲရ။
စပ်ကဵုအကာဲအရာ ပေါဲဗ္တိုက်က္တဵုဒှ်ဒၟံၚ်တုဲ ဥက္ကဌ ကမ္မတဳကောပ်ကာဲ ကေၚ်ကာမိတ်ခရိုၚ်သဓီု သ္ကိုပ်ဗိုလ်သဝ်ကျဝ်မျေတ် ဟီုလဝ် သာ်ဏံရ။
“ဒေသ ကျာ်ထဝ် ကေုာံ မုခ်ပြေၚ်တံရဒှ်၊ ကွာန်မစုက်ဒၟံၚ်ကဵု (သိမ်ဇရပ်)၊ ကွာန်မုခ်ပြေၚ် အကြာတံဏံဂှ် လၟုဟ်ထ္ပက်ဒၟံၚ်ကရောၚ်ပၞာန်၊ ပေါဲဗ္တိုက်ဂှ်လေဝ် က္တဵုဒှ်ဒၟံၚ် အရိုဟ်ဒဒှ်တ္ၚဲ” သာ်ဝွံ သ္ဂးရ။
ဟိုတ်နူလ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ကျာ်ထဝ်ဂှ်ရ တုဲကၠုၚ်နူဂိတုအံက်တဝ်ဗာ (၁၄) စဵုကဵု (၁၈) ဂှ် ပေါဲဗ္တိုက် ဟွံအောန်နူကဵု (၁၀) ဝါ က္တဵုဒှ်လဝ်ရ။
အပ္ဍဲပေါဲဗ္တိုက်ဏံဂှ် လ္ပာ်ကံၚ်ဇြဳပၞာန် အောန်အိုတ် (၁၄) တၠ ချိုတ်တုဲ (၂၀) တၠပြၚ် ကလိဂွံလဝ်ဝပ်တုဲ လ္ပာ်ဒပ်ပံၚ်ကောံ KNLA ဂှ် (၄) တၠ ပြဟ်လလုဲအာလဝ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ (၅၀၀၀) ပြၚ် နူကဵု ကွာန်(ပျဉ်းကတိုးကုန်း) မပါလုပ် သီုကဵုကွာန်ဗ္ဒါဲဗ္ဒါဲ (၁၀) ကွာန်တံဂှ် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒုၚ်တာလျိုၚ် ခရိုၚ်သဓီု PDF ကိုဝ်ဨမေန်ထောန် ဟီုရ။
“ညးပါဲဒဴဘဲပၞာန်ဂှ် ၜိုတ် မသုန်လ္ၚီ နွံဏောၚ်၊ လ္ၚဵုဂှ်တှ်ေ မံၚ်ဒၟံၚ် ပ္ဍဲသ္ၚိမသကလောကောဒေံ မိဿဟာဲတၞဟ်ဟ်တံရ၊ ဒးဟီုတပ်ပ်မ္ဂး မွဲဟူဏံ ဒးထ္ပက်ကရောၚ်ပၞာန်မ္ဂး ထ္ပက်ဏောၚ်၊ ပ္ဍဲဍေံတံ တၚ်စၞောန်ဂှ် နွံဒၟံၚ်ဒတုဲရ၊ လၟေၚ်ဒဒှ် ကွာန်ဂြိုပ်ကပေါဝ်ဂှ်တှ်ေ ဟွံထေၚ်ခယျမွဲသာ် ဒှ်အာလဝ်ဏောၚ်” ဂှ် ကိုဝ်ဨမေန်ထောန် ဟီုရ။
အခိၚ်လၟုဟ်လေဝ် ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံဝွံ ဟိုတ်နူစိုပ်ကၠုၚ် ရာသဳၜိုဟ်ဂံက် အခိၚ်မုဟ်ကျာဂှ်ရ ဂၠိက်ယာတ်၊ ဇွောံမစၞစ မပါလုပ် ဂဥုဲဇဗတံဂှ် နွံဒၟံၚ်ပၟိက်ကဵု အရီုဗၚ် ပရေၚ်ဗ္စာရဏာမၞိဟ်တံရောၚ် ဂွံတီကေတ်ရ။
ကြဴနူဒပ်ပၞာန်သီအဝဵုတုဲ အပ္ဍဲပေါဲဗ္တိုက်ကျာ်ထဝ်ဂှ် လ္ပာ်ကံၚ်ဇြဳပၞာန် ၜိုန်ရလုပ်စိုပ်ထ္ပက်ကၠုၚ်ကရောၚ်ပၞာန်ကီုလေဝ် ပေါဲဗ္တိုက်တံ က္တဵုဒှ်ဒၟံၚ် အရိုဟ်ဒဒှ်တ္ၚဲ ဗီုကဵုလၟုဟ်ဂှ် ဟွံမွဲကၠုၚ်လဝ်ပုဟ်၊ ညးတာလျိုၚ် ခရိုၚ်သဓီု KNU ဂှ် လ္ပာ်ကံၚ်ဇြဳပၞာန် ယဝ်ရထ္ပက်ကၠုၚ်ကရောၚ်ပၞာန်မ္ဂး ပေါဲဗ္တိုက်ၜါလ္ပာ်တံ သာသ္ကာတ်မြဟ်မာန်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)