မတ်မလီု၊ မေ (၉)
ကုကောန်သ္ဂံၚ် ကံၚ်ဇြဳပၞာန် မၞုံပ္ဍဲမုက်ပၞာန်တံဂှ် ပွမပ္တိတ်ကဵု သြန်ဂိတုတံ ဟွံမွဲရတုဲ လလောၚ်ပၟိၚ်လဝ် ဒးပကောံစွံလဝ် ပ္ဍဲအကံက်တိုက်သြန်ရဂှ် ဗိုလ်ဇၞော် CDM အံၚ်မျဵုထက် သ္ပဒတန်ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နကဵုတၚ်ထ္ၜးဟိုတ် ပိုန်ဒြပ်သြန်လှုဲ ကောန်သ္ဂံၚ်တံ ညံၚ်ဂွံဂၠိုၚ် ကဵုပကောံစွံလဝ် သြန်လှုဲ ပ္ဍဲတိုက်သြန်မျဝတဳ ဒပ်ပၞာန်ပိုၚ်ဂှ်တုဲ ကၠောန်ၜိုတ်ဒၟံၚ် နကဵုကိုန်အစဳဇန် ညံၚ်ဟွံဂွံကၠောန် ဇြဳဒဳအေမ်ရဂှ် ဂွံတီကေတ်ရ။
“ကုကောန်သ္ဂံၚ်ဗၠာဲဗၠာဲ အိန်ထံၚ်ဟွံမွဲ မစိုပ်ဒၟံၚ် မုက်ပၞာန်တေံဂှ် ဟွံပ္တိတ်ကဵုသြန်ဂိတုတုဲ ကဵုပံက်ကၠေံ အကံက်ဇကုအပိုၚ်မွဲတုဲ ကဵုစုတ်ဒၟံၚ် ပ္ဍဲတိုက်သြန်ရ၊ တုဲတှ်ေ လၟေၚ်ဂိတု ( ဦးပိုၚ်) ထပိုတ်ဒၟံၚ်ဂှ်လေဝ် ဒဵုကဵုလၟုဟ် နွံဒၟံၚ်ဖိုဟ် ပရဲဂှ် ဟွံကဵုပုဟ်၊ (၁၅) ကိုဋ်ဟွံပေၚ်တှ်ေ ညံၚ်ဂွံပေၚ် ဒးစုတ်၊ အခိၚ်လဵုကလေၚ်ဂွံရောဟီုဂှ် ဒှ်ဒၟံၚ်အကာဲအရာ ဟွံချိုတ်ပၠိုတ်၊ လ္ၚဵုဂှ်တှ်ေ ကရောတ်ဒၟံၚ်အိုတ်ယျ၊ ဂြိဒဴတိတ်ရဏောၚ် ဟီုဒၟံၚ်အိုတ်ရ၊ ကၠုၚ်သၟာန်ဒၟံၚ် အဲ နွံဒၟံၚ်” သာ်ဝွံ ဗိုလ်ဇၞော် ဇြဳဒဳအေမ် အံၚ်မျဵုထက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲပၠန် ကောန်သ္ဂံၚ်တံ ကလေၚ်စိုပ်ပၞောန်လက္ကရဴမ္ဂး မ္ၚးနူဟွံကဵုအခေါၚ် ပ္တိတ်သြန်ဂိတုဂှ် ပ္ဍဲကိစ္စ မိမ ကေုာံ ကောန်သ္ၚိကၟိန်တံ ဂိယဲတံဂှ် ဟွံကဵုအခေါၚ် တိတ်မ္ၚးဒပ်တုဲ ပ္ဍဲဒပ်ဂှ်ရ စွံလဝ်ဗီုပြၚ် ကြိုၚ်စွံလဝ် ပ္ဍဲသ္ၚိရဂှ် ညးထပ်သ္ဂးလဝ်ပၠန်ရ။
ကုကောန်သ္ဂံၚ် မၞုံကဵုအိန်ထံၚ် မံၚ်ဒၟံၚ် မ္ၚးဒပ်တံဂှ်လေဝ် နကဵုတၚ်ထ္ၜးဟိုတ် ပရေၚ်ဂီုကၠီု ကော်လဝ်ပ္ဍဲဒပ်ဂှ်တုဲ နူကဵုဒပ်ပၞာန် မဗ္စဖျူၚ်ကဵုဂှ် စသုၚ်တုဲ သဵုကဵုလဝ်ဒၞါဲဇွောံမံၚ်ဂးတုဲ ပွမတက်ပၠောပ်ဝါဒဓလီုတံ ကၠောန်ၜိုတ်ဒၟံၚ်ဂှ် ဂွံတီကေတ်ရ။
ကုအကာဲအရာ ဒးဒုၚ်ဝးပ္ကဝ်ဒၟံၚ် အခေါၚ်အရာမၞိဟ် ကေုာံ ပွဍဵုဍိုက်ဗွဲမဂၠိုၚ်ဂၠေၚ် နူဒပ်ပၞာန်တံ ကၠောန်ဒၟံၚ်တံဂှ် ဒးဒုၚ်ဂိဒၟံၚ် သွက်ဍုၚ်ဂးတုဲ ညံၚ်ကောန်သ္ဂံၚ်တံ သ္ဂောံစၟတ်သမ္တီလဝ် ပ္ဍဲစိုတ် တြးဝါဒဓလီုကၠေံတုဲ ဒးသၠးဒၟံၚ်လမျီု သွက်တၠအဝဵုပၞာန်ဂှ် ဒှ်ဒၟံၚ်အကာဲအရာ ခယျထေၚ်ကေတ်ဒၟံၚ် သၠးကဵုဒၟံၚ်သွက်ညးဍုၚ်ကွာန်တံရောၚ်ဂှ် ဗိုလ်ဇၞော် ဇြဳဒဳအေမ် အံၚ်မျဵုထက် ဟီုရ။
အခိၚ်လၟုဟ်ဂှ် ကောန်သ္ဂံၚ်ဒပ်ပၞာန် ထောံလသာဒပ်ပၞာန်တုဲ ကၠုၚ်စိုပ်စ္ၜုဲစ္ၜော်ဇရေၚ်ညးဍုၚ်ကွာန် (၃၀၀၀) ပြၚ် နွံဒၟံၚ်တုဲ ဂကောံဗၠာဲသၟိၚ်ဇြဳဒဳအေမ် (၇၀၀၀) ပြၚ် နွံဒၟံၚ်ရောၚ် ဂွံတီကေတ် နူတၚ်နၚ်လလောၚ်ပ္တိတ်လဝ်တံရ။
ပရိုၚ်−သြၚ်လောန်တိုၚ်(မ်)