မြဝတဳ၊ အံက်တဝ်ဗာ (၂၁)
ပ္ဍဲတိဍာ်ထိၚ်ဒဝ် ဒပ်မဟာ (၆) ခရိုၚ်ဒူပလာယာ ဗော်သွးကောန်ဂကူကရေၚ် KNU ဂှ် လ္ပာ်ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ချဳဒရာၚ်ပရေၚ်ပၞာန်တုဲ ဝးပ္ကဝ်ဒၟံၚ် အခေါၚ်အရာမၞိဟ်တံဂှ်ရ အပ္ဍဲအလုံခရိုၚ်မွဲ လၟိဟ်မၞိဟ် ဒးဂြိပ်ဒဴပါဲဒလေတ်ဒၟံၚ်တံ မၞုံကၠုၚ် စဵုကဵု ဗ္ဒါဲမွဲကိုဋ်ပြၚ်ယျဂှ် ညးမၞုံအခေါၚ်ဟီုဂး KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲအကြာတ္ၚဲတံဏံ ပ္ဍဲဂၠံၚ်ဇၞော်အာယှ မြဝတဳ−ကအ်ကြိက်၊ ဒေသလေဝ်ကေကဝ် ဖလူ ဒံၚ်နဳ လ္ပာ်သၠုၚ်ကျာ ပွိုၚ်ဍုၚ်မြဝတဳ၊ ပွိုၚ်ဍုၚ်လှာဒကှ် မဒှ်တိဍာ်ဒပ်မဟာ (၆) KNU ဂှ် ဒပ်ကံၚ်ဇြဳပၞာန် သၠဲပ္တိုန်ဇြဟတ်ဒပ်တုဲ လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ ဆက်က္တဵုဒှ်လဝ် ပေါဲဗ္တိုက်ဆေၚ်မုက် ကဵုဂကောံပံၚ်ကောံမဟာမိတ် ဒပ်ပၞာန်ဗၠးၜးကောန်ဂကူကရေၚ် KNLA တံရ။
တုဲကၠုၚ် ဂိတုအံက်တဝ်ဗာ (၁၉) တေံ ပ္ဍဲလ္ပာ်ကွာန်ညံၚ်ချံၚ် တိဍာ်ဒပ်မဟာ (၆) ဂှ် အကြာဒပ်ကံၚ်ဇြဳပၞာန် မလုပ်စိုပ်ချဳဒရာၚ်ဒၟံၚ် ပရေၚ်ပၞာန် ကေုာံ ဒပ်ပံၚ်ကောံ ကရောၚ်ပၞာန် ကဝ်ဗရာ KNLA တံဂှ် ဒှ်လဝ်ပေါဲဗ္တိုက်တုဲ ပ္ဍဲလ္တူဂၠံၚ်ဇၞော်အာယှ မြဝတဳ−ကအ်ကြိက်ဂှ်လေဝ် က္တဵုဒှ်လဝ် ပေါဲဗ္တိုက်တံတုဲ ပ္ဍဲလ္ပာ်ကွာန် (ဘဳးစကပ်) ပွိုၚ်ဍုၚ်လှာဒကှ်ဂှ်လေဝ် က္တဵုဒှ်လဝ် ပေါဲဗ္တိုက်ဆေၚ်မုက်တံရောၚ်ဂှ် ဂကောံဒပ်ပံၚ်ကောံတံ လလောၚ်ပ္တိတ်လဝ်ရ။
ပ္ဍဲပေါဲဗ္တိုက် မက္တဵုဒှ်လဝ် အပ္ဍဲကွာန် (ဘီးစကပ်) ပွိုၚ်ဍုၚ်လှာဒကှ်ဂှ် လ္ပာ်ကံၚ်ဇြဳပၞာန် ပန်ပှော်လဝ် လွဟ်လက်နက်ဇၞော်ကြာန်န် အပ္ဍဲကွာန်ဂှ် ဟွံပိုတ်သ္ကုတ်တုဲ ထောံဏာလဝ်မခတိုဟ် ကဵုက္ၜၚ်ကျာ ပွဳပွူကွာန် (ဘီးစကပ်) ဂှ်တုဲ အရာမဇီုကပိုက်တံဂှ် ဂၠိုက်ဂၠါဲဒၟံၚ် ဗွဲလစှ်ေဖိုဟ်ရောၚ် ကရောၚ်ပၞာန် (နဂါးနီ) လလောၚ်ပ္တိတ်လဝ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်လက်နက်ဇၞော် လ္တူကွာန်တံ ကေုာံ ဗ္တိုက်ပန်ပှော် နကဵုဂၠံၚ်ကျာတံဂှ်ရ လၟိဟ်မၞိဟ် ဒးဂြိပ်ဒဴပါဲဒလေတ်ဒၟံၚ် အပ္ဍဲတိဍာ် ဒပ်မဟာ (၆) ဂှ်ဝွံ သာဂၠိုၚ်နူ ကၠာတေံရဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုရ။
အတိုၚ်လိက်ဒုၚ်စဳရေၚ် ဂကောံအခေါၚ်အရာမၞိဟ်ကရေၚ် (KHRG) ဂှ်မ္ဂး ကြဴနူပၞာန်သီအဝဵုတုဲ ဟိုတ်နူပွပကီုပရာပ် ကေုာံ ပွမထ္ပက်ကရောၚ်ပၞာန် ကံၚ်ဇြဳပၞာန်တံဂှ်တုဲ လၟိဟ်ဂၞန်ညးဒးပါဲဒလေတ်ဂြိပ်ဒဴဒၟံၚ် အပ္ဍဲတွဵုရးကရေၚ်ဂှ် မၞုံကၠုၚ် (၃၅၀၀၀၀) ပြၚ်တုဲ ညးဒးဂြိပ်ဒဴပါဲဒလေတ်ဒၟံၚ်တံဝွံ ဒးဆေၚ်ဒၟံၚ်မုက်ကဵု အန္တရာယ်လွဟ်လက်နက်ဇၞော်ကီု၊ ပွမဗ္တိုက်ကဵုက္ၜၚ်ကျာတံကီု၊ မာၚ်တိုပ်တိ ဗ္တိုဟ်ထ္ကးတံကီု၊ အရာမကလိဂွံဘဲဝပ်တံ မဒှ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)