မတ်မလီု ၊ ဖေဖဝ်ဝါရဳ ၅
ပ္ဍဲဍုၚ်မတ်မလီု အရာပ်မုဟ်ပန်ဂှ် ထ္ၜးဟိုတ်ၜက်ၜေတ်ဒၞာဲဂးတုဲ ကဝ်မယှေန်ပၞာန် နကဵုဇြဟတ်ပေင်င် ကၠုၚ်ရိုဟ်ပလီုထောံ သ္ၚိ ၂၀ ပြင် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂျာန်နဝါရဳ ၃၁ ဂှ် သ္ၚိညးဍုၚ်ကွာန် ၂၀ မပြင် နွံမံၚ်ကရပ် သၞေဟ်ကွဳပၟတ်တြေံ အရာပ်မုဟ်ပန်ဂှ် စကာဇြဟတ်ပေင်င်တုဲ ကၠုၚ်ပလီုထောံလဝ် မဒှ်ရ။
ပ္ဍဲကဵုဒၞာဲကၠုၚ်ရိုဟ်ပလီုထောံမံၚ် သ္ၚိဌာန်ညးဒေသတံဂှ် အခေါၚ်တက်ဗီုဟၟဲ၊ စနူပတိတ်ဖုၚ်ဂှ် ရပ်ကေတ်အရေဝ်ရောၚ် ဘပဠတုဲ ကၠုၚ်ပလီုထောံလဝ် ဗွဲအတေၚ်အဓ္ဓမရ။
အပ္ဍဲကဵုရိုဟ်ပလီုလဝ် သ္ၚိဌာန်တံဏံဂှ် သ္ၚိတိုက်ၜါထပ်တံလေဝ် ပါမံၚ်ကီုတုဲ ဒၞာဲဂအာၚ်တိ သိုင်လဝ်သ္ၚိတံဂှ် ဂကောံရပ်လွဟ်ကြပ်ကဵုကဝ်မယှေန်ပၞာန်တံ သွံလဝ်ကဵုဒၞာဲတိဂအာၚ်တုဲ ညးဍုၚ်ကွာန်တံ ရာန်ကေတ်လဝ်ရောၚ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဒၞာဲသ္ၚိဌာန်ဒးရိုဟ်ပလီုထောံလဝ်တံဏံ သ္ၚိတိုက်ၜါထပ်လေဝ်ပါမံၚ်။ ဂကောံရပ်လွဟ်ကြပ်မံၚ်ကဵု ကဝ်မယှေန်ပၞာန်တံ သွံလဝ်ကဵုဂအာၚ်ဏောၚ်။ ဂကောံလဵုရော ဟွံတီပုဟ်” သာ်ဝွံ သ္ဂးရ။
ပြဟ်ဟ်ဏံ ထ္ၜးဟိုတ်ၜက်ၜေတ်ဒၞာဲဂးတုဲ ကၟိန်သ္ၚိဌာန် ရဲဒးဒုၚ်ရိုဟ်ပလီုထောံတံဂှ် ပြံၚ်ပဆုဲအာဒၞာဲမသကလောညးတံလေဝ်နွံ လ္ၚဵုပၠန် ဒၞာဲဒၟံၚ်ဟၟဲတုဲ ဒှ်မံၚ်အခက်အခုဲလေဝ်နွံ ညးဆက်ဟီုရ။
အတိုၚ်ညးကြပ်ကဵု ကဝ်မယှေန်ပၞာန်တံဟီုမ္ဂး ထ္ၜးဟိုတ်ပရေၚ်ၜက်ၜေတ်တိဂးတုဲ ဒၞာဲဒးဒုၚ်ပလီုလဝ်ဏံဂှ် ဒှ်မံၚ်ဒၞာဲဂအာၚ်တိ ဌာနဝန်ဇၞော်ပလံၚ်ဗစိုပ်ကေုာံပရေၚ်ဆက်စၠောံ ၉၀ ဧကပြၚ် မဒှ်ရ။
အပ္ဍဲကဵုတိ ၉၀ ပြၚ်ဏံ နူဌာနဝန်ဇၞော်ဂှ် သၠောဲပြံၚ်ပအပ်လဝ်ကဵု အလဵုအသဳတွဵုရးမန် ၃၀ ဧကပြၚ်တုဲ ပ္ဍဲကဵုတိဧကသှ်ေမံၚ် ၆၀ ဧကဂှ် သ္ၚိဌာန်တံဏံ ကၠုၚ်သိုၚ်ခၞံလဝ်ရောၚ် ဂွံတီရ။
ထ္ၜးဟိုတ်ၜက်ၜေတ်ဒၞာဲဂးတုဲ ဒၞာဲကဝ်မယှေန်ပၞာန် ကၠုၚ်ရိုဟ်ပလီုထောံလဝ်ဏံဂှ် ဂကောံရပ်လွဟ်ကြပ်မံၚ်ကဵု ကဝ်မယှေန်ပၞာန်မွဲဂကောံ ဟိုတ်နူသွံလဝ်ကဵုတုဲ သိုၚ်ခၞံလဝ်သ္ၚိဌာန်ညးတံ ခိုၚ်ၚ်ကၠိုက်က်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုသၞာံအာတုဲကၠုၚ်တေံလေဝ် သွက်ကိုန်အစဳဇန်သၠဲပတိတ် ဍုၚ်လှိုၚ်တၟိဂှ် အရာပ်ၜက်ၜေတ်လဝ်ဒၞာဲဂးတုဲ ကဝ်မယှေန်ပၞာန်သီပလီုထောံလဝ် သ္ၚိဌာန်၊ ဘာလကျာ်ကဵု ဆေင်ဖျာ စမြိုၚ်ဒၞာဲဒၟံၚ်ညးဍုၚ်ကွာန် လၟိဟ်ကဵုကၠံမ ဒးဆောံလေၚ်အာလဝ်ကီုရ။
ပရိုၚ်-သြၚ်လောန်တိုၚ်မ်
Photo – CJ