ဘာအင်၊ ဖေဖဝ်ဝါရဳ ၆
ဟိုတ်နူကဵု ညးဍုၚ်ကွာန်ကရေၚ် ထံက်ဂလာန်ကဵုဇြဟတ် ပံၚ်တောဲပါလုပ်မံၚ်တုဲ ဒဵုကဵုတ္ၚဲဏံ ဗော်သွးကောန်ဂကူကရေၚ် KNU တန်တဴမာန်ကၠုၚ်လဝ်ရောၚ် ဥက္ကဌ KNU ပဒိုသဝ်ဂွာထူဝေန် ဟီုရ။
ပ္ဍဲဖေဖဝ်ဝါရဳ ၅ တ္ၚဲဒက်ပတန် ဗော်သွးကောန်ဂကူကရေၚ် KNU ပေၚ် ၇၉ သၞာံ ပလံၚ်ဗစိုပ်လဝ်လိက်သဝဏ်ဂှ် ဟီုလဝ်ရ။
ပရေၚ်ပၠန်ဂတးကရေၚ် ပ္ဍဲကဵုချဳဒရာၚ်ကၠုၚ်လဝ် ပွိုၚ် ၇၉ သၞာံဏံဂှ် နကဵုကဏ္ဍပၠတရဴ အကြာဂကောံပံၚ်တောဲ ကၠောန်လဝ်ကီုဒှ် အကြာကောန်ဂကူကရေၚ်ကီုဒှ် သွက်ဗော်သွး ဂွံတန်ကြန်ခိုၚ်ၚ်မာန် ဂှ် အကာဲအရာတင်ကော်ဆောဗွဲမဂၠိုၚ် ဒးဆဵုဂဗကၠုၚ်လဝ်နွံ ရဂှ် ပဒိုသဝ်ဂွာထူဝေန် ဟီုရ။
ပ္ဍဲကာလမွဲမွဲဂှ် ပရေၚ်ကဏ္ဍပၠတရဴပရေၚ်ဍုၚ်ကွာန် ဗော်သွး ကောန်ဂကူကရေၚ် ဒးစွံလဝ်မွဲခဏလေဝ်နွံ အကြာက္ဍိုပ်သ္ကိုပ် ပၠတရဴတံ မူဝါဒပရေၚ်ဍုၚ်ကွာန်ကဵု လညာတ်တင်ဒတူလိုၚ် ဟွံကိတ်ညဳကဵု ဂၠံၚ်တရဴပၠန်ဂတးတံတုဲ လညာတ်ပါ်ခြာလေဝ် ကေၚ်ဒှ်လဝ် သ္ဂးရ။
တုဲပၠန် အပ္ဍဲကဵုက္ဍိုပ်သ္ကိုပ် ဒက်ပတန်လဝ် ဗော်သွးကောန်ဂကူ ကရေၚ်ဂှ်ရ ထောံပသှ်ေလဝ်ဗော်ကဵု ပၠန်ဂတးလေဝ်နွံ၊ အခိၚ်ကာလ ပၠန်ဂတးလံကၠုၚ်ဟဍၚ် ဟိုတ်နူအခက်အခုဲနာနာသာ်ဂှ် ရဲသဟာဲ ကၠောန်ကၠုၚ်လဝ်မွဲစွံတံ ကြဴထောံစး ဗော်ကဵုပၠန်ဂတးလေဝ် နွံကၠုၚ်လဝ် ပဒိုသဝ်ဂွာထူဝေန် ဟီုရ။
“ပရေအ်အိုတ်မွဲတၚ်ဂှ် သ္ပလဝ်ဒၞန်ကဵုပၠန်ဂတးတုဲ စကာအဝဵု သွက်ဂုဏ်ဖဵုပူဂဵု ဂၠံၚ်ဍာန်ဗၠေတ်တ်လေဝ် အကြာက္ဍိုပ်သ္ကိုပ်တံ နွံကၠုၚ်လဝ်ရောၚ်” ပ္ဍဲလိက်သဝဏ် ချူလဝ်ရ။
တုဲပၠန် ပၠန်ဂတးကောန်ဂကူကရေၚ်ဂှ် ဆေင်စပ်မံၚ်ကဵု ဂုဏ်ဖဵုအလုံ ကောန်ဂကူကရေၚ်ကီုလေဝ် ပ္ဍဲကဵုပရေၚ်ချဳဒရာၚ် ဗော်ပၠန်ဂတးဂှ် ဂကူကရေၚ်ဗွဲမဂၠိုၚ် ဟွံပါလုပ်လေဝ် ဂွံဆဵုမံၚ်ရောၚ် ဥက္ကဌ KNU သ္ဂးရ။
အကာဲအရာဗီုတံဏံ ၜိုန်ရဆဵုဂဗလဝ်ကီုလေဝ် အကြာက္ဍိုပ်သ္ကိုပ် ဗော်သွးကောန်ဂကူကရေၚ်ကဵု ရဲကၠောန်လဝ်မွဲစွံတံ ဒးထကးပြး ကၠုၚ်လဝ်၊ လညာတ်ဟွံတုပ် တၞဟ်ခြာမံၚ်တံဂှ် ကလေၚ်ပ္ညဳပ္ညပ်တုဲ အကြာဗော် ဂစာန်ဒက်ပတန်ကၠုၚ်လဝ် ပရေၚ်ညဳသၟဟ်ဂှ် သ္ဂးလဝ်ရ။
တန်တဴကဵု အကာဲအရာ ပရေၚ်ဍုၚ်ကွာန်အပြံၚ်လှာဲဂှ် နူကဵုဗော်သွး ကောန်ဂကူကရေၚ် သ္ကိုပ်သ္ကတုဲ ဖျေံအာမဟာဗျူဟာ နဲကဲဗျူဟာ ပရေၚ်ဍုၚ်ကွာန် မကိတ်မံၚ်ကဵုအခိၚ်ကာလတံတုဲ ထမံက်အာမံၚ် ရုပ်ရဴရောၚ် ပဒိုသဝ်ဂွာထူဝေန် ကဵုလဝ်သမ္တီရ။
ပရိုၚ်-သြၚ်လောန်တိုၚ်မ်
Photo – KNU