နေပျဳတဝ် ၊ ဖေဖဝ်ဝါရဳ ၁၆
ပ္ဍဲအခိၚ်ကၠောန်ကဵုပေါဲရုဲမာဲအကြာမ္ဂး ညံင်ဂွံမင်လဝ်ဂွန်ဒတုဲ နူကဵုဗော်ပရေၚ်ကွာန်တံ သွက်ဂွံစုက်လုက်မံၚ်ကဵု တၠဆန္ဒမာဲ ညးဍုၚ်ကွာန်တံဂှ် ပၟိက်ဇၞော်ကွေံကွေံရောၚ် ကဝ်မယှေန်ပေါဲရုဲမာဲကၟိန်ဍုၚ် ဟီုရ။
ပ္ဍဲဖေဖဝ်ဝါရဳ ၁၃ ညးတာလျိုၚ် ကဝ်မယှေန်ပေါဲရုဲမာဲကၟိန်ဍုၚ်ကဵု ဥက္ကဌကေုာံ က္ဍိုပ်သ္ကိုပ်ဗော်ပရေၚ်ဍုၚ်ကွာန် ၅၀ ပြင်တံ ဆဵုဂဗလဝ်ပ္ဍဲနေပျဳတဝ်ဂှ် စပ်ကဵုပေါဲရုဲမာဲအကြာတုဲ ဥက္ကဌကဝ်မယှေန် ဥူသိုဝ်တိၚ် ဒၟာနူကဵုဟိုတ် နာနာသာ်တုဲ သွက်ဒၞာဲညးစၞးအမာတ် သၠးမံၚ်တံကေုာံ ဒၞာဲတိဍာ်ကၠောန်လဝ်ပေါဲရုဲမာဲ ဟွံမာန်ဏီတံဂှ် သွက်ဂွံကၠောန်အာကဵု ပေါဲရုဲမာဲအကြာနွံရောၚ် သ္ဂးလဝ်ရ။
ပ္ဍဲကဵုပေါဲရုဲမာဲ ဒပ်ပၞာန်ကၠောန်ကၠုၚ်လဝ်တံဂှ် အလုံဍုၚ်မွဲ ၂၆၃ ပွိုၚ်ဍုၚ်ရနွံတုဲ ပ္ဍဲ ၆၇ ပွိုၚ်ဍုၚ်ဂှ် ကၠောန်ပေါဲရုဲမာဲဟွံမာန်ဏီရ။
ဟိုတ်နူပရေၚ်ဂီုကၠီုဂှ်ရ ဒၞာဲကၠောန်ပေါဲရုဲမာဲဟွံမာန်ကီု အမာတ်တံနုက်တိတ်အာကီု ချိုတ်အာ၊ ဒးဒုၚ်ဗဒေါအ်ထောံနူကဵုတာလျိုၚ်တံ ကေုာံ အမာတ်ဒးဒုၚ်ခါန်ကၞက်ဒၞာဲဝန်ဇၞော်မ္ဂး ဒၞာဲညးစၞးဂှ် သၠးအာရောၚ် မဒှ်ရ။
ဟိုတ်ဂှ်ရ အတိုၚ်သ္ဇိုၚ်သၞောဝ်ဥပဒေ ၂၀၀၈ ဏံ ယဝ်ရတော်တၟော်အာကဵု ပေါဲရုဲမာဲအကြာတုဲတုဲတေံမ္ဂး စိုပ်သၞာံ ၂၀၂၈ တေံမှ ကၠောန်အာပေါဲရုဲမာဲအကြာမာန်ရောၚ်။
မွဲလပါ်ပၠန် ပ္ဍဲကဵုဒၞာဲ ၆၃ ပွိုၚ်ဍုၚ် ဒပ်ပၠန်ဂတးထိၚ်ချုက်ဂွံလဝ်တံဂှ် ကဝ်မယှေန်ပၞာန် ထပ်ထပဵုလဝ်အမိၚ် ပရေၚ်အုပ်ဓုပ်ပၞာန်ကာမံက်တိုန် ပွိုၚ် ၉၀ ပၠန် ပ္ဍဲဂျာန်နဝါရဳ ၂၉ တေံ လလောၚ်တြးလဝ်ရ။
ပ္ဍဲအခိၚ်ကာလ ထပ်ထပဵုလဝ်အမိၚ်ပရေၚ်အုပ်ဓုပ်ပၞာန် ကာမံက်တိုန်ဏံ ဒဵုကဵုဗော်ပျဳခိုၚ်ဖျိုဝ် ပံက်အာအလဵုအသဳတုဲ လမျီုဆက်လုပ်မံၚ်ရောၚ်။
ပ္ဍဲပေါဲရုဲမာဲဗော်ဇဳ သၠောတ်သ္ပစၞးပံၚ်နှဴလဝ် ညးစၞး MMP ဂှ် လၟိဟ်ဗော်ဒးဒုၚ်ရုဲစှ်တံ ဂၠိုၚ်တိုန်မံၚ်ရောၚ် ဥက္ကဌကဝ်မယှေန် ဟီုရ။
ပ္ဍဲကဵုပေါဲရုဲမာဲ ၂၀၁၀ ကဵု ၂၀၁၅ တေံ ဗော်ပရေၚ်ဍုၚ်ကွာန် နူကဵု ၂၂ ဗော်ရ ဂွံလဝ်အမာတ်ကီုလေဝ် ပ္ဍဲပေါဲရုဲမာဲဒပ်ပၞာန် ကၠောန်လဝ်လၟုဟ်ဏံဂှ် နူကဵု ၃၁ ဗော်တံ ဂွံလဝ်အမာတ်ညးစၞးတံ သ္ဂးရ။
အတိုၚ်ကဝ်မယှေန်ပေါဲရုဲမာဲကၟိန်ဍုၚ် လလောၚ်တြးလဝ်မ္ဂး သွက်ဒၞာဲစၠတ်ဓဝ် သီု ၃ တန်ဂှ် ဗော်ပျဳခိုၚ်ဖျိုဝ်ဂွံလဝ် ဒၞာဲပထမ၊ ဗော်တစည ကြပ်ကဵုဒပ်ပၞာန်ဂှ် ဂွံလဝ်ဒၞာဲအမာတ် ဒုတိယရ။
ဗော်ကောန်ဍုၚ်အရၚ်၊ ဗော်ဍောတ်တ်တံကဵု ဗော်ပရေၚ်ဍုၚ်ကွာန် သှ်ေမံၚ်တံဂှ် ဟိုတ်နူပံၚ်နှဴလဝ် သၠောတ်ရုဲမာဲ ဂွံမာဲဂၠိုၚ်အိုတ်ဇၞး FPTP ကေုာံ သၠောတ်သ္ပစၞး PR တံပံၚ်လဝ်တုဲ ဒၞာဲအမာတ်ဆကရိုက် ဂွံလဝ်ကီု မဒှ်ရ။
လ္တူဏံ ဗော်ကောန်ဍုၚ်အရၚ်ကဵု ဗော်ဍောတ်တ်တံ ဂွံတိုန်ဒၞာဲပ္ဍဲစၠတ်ထဝ်ဂၠိုၚ်တိုန်မံၚ်ရောၚ် ဥက္ကဌကဝ်မယှေန် ဟီုမံၚ်ကီုလေဝ် ဗော်ပျဳခိုၚ်ဖျိုဝ်ကဵု အမာတ်ဒပ်ပၞာန်တံဟေၚ် ဆက်ကေမ်ဇျှာပ်ထိၚ်ချုက်လဝ် အဝဵုဗဟဵုပၠန်ရောၚ် ညးလ္ၚတ်တံ ပါ်ပါဲဟီုဂးမံၚ်ရ။
ပရိုၚ်-သြၚ်လောန်တိုၚ်မ်
Photo – Social Media