ဘာအၚ်၊ အေဗရာ ၄
အပ္ဍဲတွဵုရးကရေၚ် ဍုၚ်ဘာအၚ် သ္ဘၚ်အတးသၚ်္ကြန်ဏံမ္ဂး သ္ဘၚ်အတးသကြႅာန်ကွာ်ကီု သ္ဘၚ်အတးသကြႅာန်ပြင်ဗတဳ မကော်ခဴစ နာန်ဖအ်အွာဂှ်လေဝ် ကၠောန်ဗဒှ်အာဗွဲမဂဵုလဟဵုရောၚ် အတိုၚ်လိက်လလောၚ်တြး ကဝ်မယှေန်ပၞာန်တွဵုရးဂှ် ဂွံတီကေတ်ရ။
ကဝ်မယှေန်ပၞာန်တွဵုရးကရေၚ်တံဝွံ အပ္ဍဲဒၞာဲဗလးဝၚ်သၠာတ်သဳရိ ဍုၚ်ဘာအၚ်ဂှ် စွံလဝ်ကၞာထးဗဟဵု၊ အလုံမွဲဒမြိပ်ဂၠံၚ်ဇိုၚ်ၜဳဂှ် ကၞာထးဌာနနာနာတံကဵု ကွာ်ဂၠံၚ်အတးသကြႅာန်၊ ပ္ဍဲဂၠံၚ်ဇျှော် သ္ဍိုက်ဆာန်ဂှ်လေဝ် ကွာ်ဂၠံၚ်အတးသကြႅာန်၊ ဂတမုက်ရုၚ်စၠတ်ဓဝ်ဂှ်လေဝ် သွက်ဂွံကၠောန်ဗဒှ်အာ ပေါဲကွာ်ဂၠံၚ် အတးသကြႅာန်ဂှ် စဳဇန်လဝ်ရ။
တုဲပၠန် ပ္ဍဲဂိတုအေဗရာ ၇ ဏံမ္ဂး သွက်ဂွံကၠောန်ဗဒှ်အာ ပေါဲပံက်အသေအဟာန် သ္ဘၚ်အတးသကြႅာန်ပြင်ဗတဳ ကော်ခဴစ နာန်ဖအ်အွာတုဲ ဒၞာဲသွက်ဂွံကၠောန် သ္ဘၚ်အတးသကြႅာန်ပြင်ဗတဳဂှ်တှ်ေ မၞုံကရပ် “ကျာ်ယှိုဲယေန်မျှဝ်” ဍုၚ်ဘာအၚ်ကဵု ဇရေၚ်သၞေဟ်ပြၚ်ဗတဳ ဖျာဗ္တံဇိုၚ်ၜဳဂှ် မဒှ်ရ။
အပ္ဍဲသ္ဘၚ်အတးသကြႅာန်ပြင်ဗတဳဂှ်တှ်ေ ဒၞာဲဌာန်ဇၞူပရေလၟောၚ်တံကီု၊ ဒၞာဲဝေၚ်ဍာ်၊ သၠာတ်ဒၞာဲဝေၚ်နာနာ၊ ကၞာထးလဟိၚ်လှ်ေဒယှ်ေ၊ ကၞာထးစတုဒဳသာတံနွံမံၚ်တုဲ ညံၚ်ဂွံဂဵုလဟဵုကၠောန်ဗဒှ်အာရောၚ် ကဝ်မယှေန်ပၞာန် တွဵုရးကရေၚ် ကဵုလဝ်သမ္တီ လလောၚ်တြးလဝ်ရ။
နူကဵုသၞာံအာတုဲကၠုၚ်တေံ ကဝ်မယှေန်ပၞာန်တွဵုရးကရေၚ်ဖန်ဇန်လဝ် သွက်ဂွံကၠောန်သဘၚ် ပေါဲအတးသကြႅာန်ပြင်ဗတဳကီုလေဝ် ဟိုတ်နူတိချဳဇၞော်ကဵုဇြဟတ်တုဲ ပရေၚ်ပါ်ပါဲဟီုဂး နူမှာဇန်တံ သၠုၚ်တိုန်ကၠုၚ်တုဲ ဟွံဒှ်ကၠောန်ကၠုၚ် သ္ဘၚ်အတးသကြႅာန်ပြင်ဗတဳ ဒးပလီုထောံလဝ်ရ။
အပ္ဍဲကဵုသၞာံဏံ မွဲကရောံကဵု အခက်အခုဲကၠေၚ်စက်ဂှ် နူကဵုကဝ်မယှေန်ပၞာန် တွဵုရးကရေၚ် ဟိုတ်နူရပ်သီမံၚ် ကွဳစက်လာၚ်သေန်ဟၟဲ လၟိုန်န်နွံတုဲ ညးဒေသတံ သွက်ဂွံအာဖျာ ရာန်ကပေါတ်ကီု သီုကဵုသွက်ဂွံအာကြောဝ်ဝေၚ် ပ္ဍဲကာလအတးသကြႅာန်ဂှ်လေဝ် ဟွံဂံၚ်အာကၠုၚ်ပုဟ် ညးဒေသတံ သ္ဂးရ။
လၟုဟ်ပြဟ်ဟ်ဏံမ္ဂး သွက်သ္ဘၚ်အတးသကြႅာန်တံဂှ် သိုၚ်မံၚ်တာဲ ပရေလၟောၚ်တံကီု၊ သိုၚ်ကၞာထးဝေၚ်ဍာ်တံကဵု ပ္ဍဲရုၚ်အကြာအရာပ်တံဂှ် တေက်မံၚ်ဒွက် သွက်ဂွံလှ်ေဒယှ်ေလဟိၚ်အတးတံ ဂွံဆဵုညာတ်မံၚ်ရောၚ် အတိုၚ်ညးဒေသ ဘာအၚ်တံဟီုလဝ်ဂှ် ဂွံတီကေတ်ရ။
ပရိုၚ် – သြၚ်လောန်တိုင်မ်
Photo – CJ