ဗြဝတီ၊ အေဗရာ ၅
အပ္ဍဲဒၞာဲအလုံမွဲဂၠံၚ်ဇၞော် အာယှ ဗြဝတီ-ကအ်ကြိက် ကလေၚ်ပံက်လဝ်ဏံ ဒပ်ကဝ်မယှေန်ပၞာန်တံ အာတ်မံၚ်သြန် လ္တူရဲကွဳစက်အာတရဴတံ နကဵုအတေၚ်အဓမ္မရောၚ် ညးဒေသတံကဵု ရဲဒဳကွဳစက်တံ ဟီုကဵု ဌာန်ပရိုၚ်သြၚ်လောန်တိုင်မ် ရ။
အပ္ဍဲဂိတုအေဗရာ ၂ ဒၞာဲပယျဵုသေံ-ဗၟာ လတူဂၠံၚ်အာယှ ဗြဝတီ-ကအ်ကြိက် ပ္ဍဲကဵုဂၠံၚ်ဇၞော် ကူသာန်ဗၞိက်အဓိကဂှ် နူကဵုကဝ်မယှေန်ပၞာန် ကလေၚ်ပံက်ကဵုတုဲ ပ္ဍဲတ္ၚဲပံက်ကဵုဂှ်ရ ကွဳစက်ညးဍုၚ်ကွာန်ရဲအာတရဴတံ လၟိဟ်ကၠံပြၚ် သုၚ်စောဲအာကၠုၚ်မံၚ် လ္တူဂၠံၚ်အာယှဂှ်ရောၚ်။
ပ္ဍဲအလုံဂၠံၚ်ဇၞော်အာယှ ကေုာံ ဒၞာဲလုပ်ဍုၚ်ဗြဝတီ တေန်ဂါန်ညဳနံၚ်၊ ဒၞာဲလုပ်ဍုၚ်ကအ်ကြိက်တံဂှ် ဒပ်ကဝ်မယှေန်ပၞာန်ကေုာံ ဒပ်ကရေၚ် စဵုဒၞာပယျဵု BGF တံ ဖျေံစွံလဝ်ဒၞာဲ သၞေဟ်ကင်ဂိက်ဂီုကၠီု ဗွဲမဂၠိုၚ်တုဲ နူကဵုသၞေဟ်ကင်ဂိက်တံဂှ် အာတ်မံၚ်သြန် လ္တူကွဳစက်ညးဍုၚ်ကွာန် ရဲအာတရဴတံဂှ်ရောၚ် ညးဒေသတံ သ္ဂးရ။
ကောန်ပၞာန်ကဝ်မယှေန်ပၞာန် ကေုာံ ကောန်ဒပ် BGF ကေတ်လဝ် ပရေၚ်ဂီုကၠီုတံဝွံ လ္တူကွဳစက်ဖ္ဍိုက်နၚ်လဝ် ရဲအာတရဴတံဂှ် မၞိဟ်မွဲတၠ မ္ဂး သြန် ၁၀၀၀၀ ဒကေဝ် အာတ်ကေတ်မံၚ်အတေၚ်အဓမ္မတုဲ ယဝ်ရဟွံကဵုမ္ဂး ဟီုဂးဘပဠမံၚ်ရောၚ် ဂွံတီကေတ် နူရဲအာတရဴဒေသတံရ။
တုဲပၠန် ကွဳစက်ညးဍုၚ်ကွာန်အာတရဴ သုၚ်စောဲအာကၠုၚ်မံၚ် လ္တူဂၠံၚ်အာယှတံဝွံ ပ္ဍဲသၞေဟ်ကင်ဂိက်ကဝ်မယှေန်ပၞာန် ၃ ဒၞာဲဂှ် ဒးပတိုန်ထ္ၜးကာတ်စၟတ်သမ္တီကောန်ဍုၚ် ကေုာံ ကဵုစရၚ်ယၟုတံတုဲ ကောန်ပၞာန်ကဝ်မယှေန်ပၞာန် စၟဳစၟတ်သၟာန်သၟုက်မံၚ်ကဵုရောၚ် ညးအာကၠုၚ်တံ သ္ဂးရ။
ကဝ်မယှေန်ပၞာန်ဂှ်တှ်ေ ပ္ဍဲဂၠံၚ်အာယှ ကလေၚ်ပံက်ကဵုလဝ်ဂှ် ပရေၚ်အာတ်သြန်ကံက်သြန်တံ ဟၟဲပုဟ် ဟီုမံၚ်ကီုလေဝ် ပ္ဍဲဗလးတိဏံဂှ်တှ်ေ ဒပ်ပရေၚ်ဂီုကၠီုကဝ်မယှေန်ပၞာန်တံ အာတ်မံၚ်သြန် နူကဵုညးဍုၚ်ကွာန် ရဲအာတရဴတံရောၚ်။
အပ္ဍဲအရာ ကလေၚ်ပံက်ကဵုဂၠံၚ်အာယှဏံဂှ် ဆကွဳစက်ဍောတ်တ်တံဓဝ် ကဝ်မယှေန်ပၞာန်ကဵုအာကၠုၚ်တုဲ သွက်ကွဳစက် ဖ္ဍိုက်ကပေါတ်ဇၞော်ဇၞော်တံဂှ် အခိၚ်လၟုဟ် ဟွံကဵုအာကၠုၚ်ဏီတုဲ ကွဳစက်ဖ္ဍိုက်ကပေါတ်တံဂှ် ဒးပလံၚ်ဗစိုပ်မံၚ် နူကဵုဂၠံၚ်ဂြိုပ်လ္တူဒဵု ဗြဝတီ-ကအ်ကြိက် တံရ။
ပရိုၚ် – သြၚ်လောန်တိုင်မ်
Photo – CJ