နေပျဳဒဝ်၊ အေဗရာ ၅
လ္တူက္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဒှ်ကၠုၚ်သမ္မတဂှ် နကဵုဍုၚ်ကြုက်၊ ရတ်ယှာ ကေုာံ ဍုၚ်ဗေလာရုတံ ပလံၚ်ဗစိုပ်နၚ် လိက်သဝဏ် မိပ်စိုတ်အိုဟ်တိုဟ် မၞုံကဵုဂုဏ်စရာဲ ရောၚ် နူကဵုကဝ်မယှေန်ပၞာန် လလောၚ်တြးပရိုၚ်ရ။
သမ္မတကြုက် ယှဳကျေအ်ဖျေန်ဂှ် တူရဴက္ဍိုပ်သ္ကိုပ်ပၞာန် ဒှ်အာသမ္မတဂှ် မိပ်စိုတ်အိုဟ်တိုဟ်တုဲ သွက်ပရေၚ်ၜိုဟ်လလမ် ကေုာံ ပရေၚ်ဇၞော်မောဝ်တဴတက် အပ္ဍဲကဵုဒေသတံ သွက်ဂွံပါလုပ်ရီုဗၚ်အာ ဗွဲမဂၠိုၚ်မာန်ဂှ် မၚ်စၟဳစမံၚ်ရောၚ် ပလံၚ်ဗစိုပ်လဝ် လိက်သဝဏ်ရ။
အပ္ဍဲအခိၚ်က္ဍိုပ်သ္ကိုပ်ပၞာန် ကေတ်တာလျိုၚ်သမ္မတဏံ သွက်ဂုဏ်ဖဵု ပရေၚ်ပိုန်ဒြပ် ဍုၚ်ၜါလ္ပာ်ကီု ပရေၚ်ဂီုကၠီု ဒေသအာယှ-ပသိဖေတ်တံ နကဵုသဘဴလပါ်ခိုဟ် ပရေၚ်ပံၚ်တောဲဍုၚ်ၜါလပါ်တံ ဇၞော်မောဝ်တိုန်အာဂှ် ပတေဟ်ကေတ်လဝ်ရောၚ် သမ္မတရတ်ယှာ ပူတေန် ပလံၚ်ဗစိုပ်လဝ် လိက်သဝဏ်ကီုရောၚ်။
သွက်ပရေၚ်ဆက်ဆောံကဵုဍုၚ်ဗၟာ ပဵုတုဲ ဂွံသၠုၚ်ပတိုန်အာမာန် ညံၚ်ဂွံထမံက်ရုပ်ရဴ အရာမတုပ်လဝ်စိုတ်တံဂှ် အတိုၚ်ဂလာန်ကတိပါၚ် ဍုၚ်ဗေလာရုဂှ် ကလေၚ်သ္ပလဝ်ဒတန်ပၠန်ရောၚ် သမ္မတဗေလာရု လူကာယှေန်ကို သ္ဂးလဝ်ရ။
ဟိုတ်နူ မိက်ဂွံဒှ်သမ္မတတုဲ က္ဍိုပ်သ္ကိုပ်ပၞာန်သီအဝဵုဍုၚ်ဝွံ ပ္ဍဲစၠတ်ထဝ် ဂကောံဒပ်ပၞာန်တံ အုပ်ဓလီုလဝ်ဂှ် နကဵုမာဲထံက်ဂလာန် ၄၂၉ မာဲဂှ် ဒှ်ကၠုၚ်သမ္မတကၟိန်ဍုၚ် ဒးဒုၚ်ရုဲစှ်ခါန်ကၞက်လဝ် ပ္ဍဲဂိတုအေဗရာ ၃ ဏံရ။
နကဵုသ္ဇိုၚ်သၞောဝ်ဥပဒေ ၂၀၀၈ အကြာကၠောန်ဗဒှ်လဝ် ပေါဲရုဲမာဲ ရုဲစှ် ကၠုၚ်လဝ် သမ္မတ ၄ ဝါတံမ္ဂး က္ဍိုပ်သ္ကိုပ်ပၞာန်သီအဝဵု ၜးသၠာဲကယျိုၚ် ဏံဝွံ နူအဆံၚ်တာလျိုၚ်ဂဥုပ်ဒပ်ဂှ် ဒှ်ကၠုၚ်သမ္မတ အလန်ပထမ ကၠာ အိုတ် ပ္ဍဲကဵုအကာဲအရာ ဟၟဲကဵုညးဒစဵုဒစးတံ မဒှ်ရ။
ပရိုၚ် – သြၚ်လောန်တိုင်မ်
PHoto – MOI