နေပျဳဒဝ်၊ ဂိတုအေဗရာ ၄
အပ္ဍဲကောံဓရီုစၠတ်ထဝ်ကၟိန်ဍုၚ် ကၠောန်ဗဒှ်လဝ် အခိၚ်နူဂယး ဂိတုအေဗရာ ၃ ဏံဂှ် က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်ဂှ် ဂွံဒုၚ်ရုဲစှ်ခါန်ကၞက်ပတိုန် နဒဒှ်သမ္မတကၟိန်ဍုၚ်ရ။
အပ္ဍဲကောံဓရီုဏံဂှ် ညးမဒှ် ဒုသမ္မတပိတၠ က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်၊ သ္ကိုပ်ဝန်ဇၞော် ကဝ်မယှေန်ပၞာန်လၟုဟ် ဥူညိုသဝ် ကေုာံ ဒဝ်နာန်နဳနဳဧတံဂှ် နဒဒှ် သမ္မတ၊ ဒုသမ္မတ ၁၊ ဒုသမ္မတ ၂ တံ ပါ်မာဲ ဖျေံလဝ်သ္ဂုတ်သွာတ်ရောၚ်။
အတိုၚ်ပါ်ဂွံမာဲဖျေံသ္ဂုတ်သွာတ်ဂှ်မ္ဂး က္ဍိုပ်သ္ကိုပ်ပၞာန် ကလိဂွံမာဲ ထံက်ဂလာန် ၄၂၉ မာဲတုဲ တန်ဒှ်အာ သမ္မတ၊ ဥူညိုသဝ် ကလိဂွံမာဲထံက်ဂလာန် ၁၂၆ မာဲဂှ် ဒှ်ဒုသမ္မတ ၁၊ ဒဝ်နာန်နဳနဳဧ ကလိဂွံမာဲထံက်ဂလာန် ၂၉ မာဲဂှ် ဂွံဒုၚ်ရုဲစှ် နကဵု ဒုသမ္မတ ၂ ရ။
တၠုၚ်လအာဏံမ္ဂး ဟိုတ်နူပၟိက်ဆန္ဒ ညးမိက်ဂွံဒှ်သမ္မတတုဲ က္ဍိုပ်သ္ကိုပ်ပၞာန် သီကေတ်လဝ်အဝဵုဍုၚ်ဂှ် နူကဵုစၠတ်ထဝ်ကၟိန်ဍုၚ် ဒပ်ပၞာန်ကဵုဗော်ပျဳခိုင်ဖျိုဝ်တံ အုပ်လဝ်ဂတာတဲဂှ် ပြံၚ်သၠာဲကဵုဏာ နဒဒှ်သမ္မတ ညးဍုၚ်ကွာန်မွဲရောၚ် ဒးဟီုရ။
ဥူညိုသဝ် ညးဒးဒုၚ်ရုဲစှ်လဝ် ဒုသမ္မတ ၁ ဂှ် ဒှ်မၞိဟ်ပတေဟ် က္ဍိုပ်သ္ကိုပ်ပၞာန်သီအဝဵုမွဲတၠတုဲ ကြဴနူပၞာန်သီအဝဵု ၂၀၂၁ တေံဂှ်ရ ဒှ်ကၠုၚ်လဝ် ညးကဵုကသပ်က္ဍိုပ်သ္ကိုပ်ပၞာန် မဒှ်ရ။
ကောန်ဂကူကရေၚ် ဒုသမ္မတ ၂ ဒဝ်နာန်နဳနဳဧဂှ် မဒှ် ဥက္ကဌ ဗော်ပျဳခိုင်ဖျိုဝ် တွဵုရးကရေၚ်တုဲ အပါညး ဥူသဝ်ဗိုဏဳဂှ်လေဝ် အပ္ဍဲခေတ် ဗော်သိုဲယှေဝ်လေတ်ဗၟာ တၠအဝဵုတြေံ ဥူနေဝေန် ပၠတရဴလဝ်တေံဂှ်ရ ကေၚ်ဒှ်ကၠုၚ်လဝ် ဥက္ကဌပါတဳယူနေတ် ဘာအၚ် ကီုရ။
ပရိုၚ် – သြၚ်လောန်တိုင်မ်
ရုပ် – MOI