မတ်မလီု၊ အံက်တဝ်ဗာ (၂၅)
ပ္ဍဲဒေသကၟိန်ဍုၚ်ဗၟာဗွဲမဂၠိုၚ် အခိၚ်ပေါဲဗ္တိုက် အကြာဒပ်ပံၚ်ကောံပၠန်ဂတးတံ ကဵု ဒပ်ကံၚ်ဇြဳပၞာန်တံ ဒှ်ကၠုၚ်ဒၟံၚ် ဟွံပိုတ်သ္ကုတ်ဂှ် ကံၚ်ဇြဳပၞာန် မူရဴဟိုတ်သာ်လဵုမှ ဟွံကဵုအခေါၚ် ကုသၞာဲဒဴ Non CDM တံ စဴဌာန်ဒၟံၚ်တုဲ ထိၚ်ဒက်လဝ်ဂှ် ဂွံတီကေတ်ရ။
ပြဟ်ဟ်ဏံ ကုသၞာဲဒဴအလဵုအသဳ မယိုက်ဂၠေၚ်ဒၟံၚ်တာလျိုၚ် ပ္ဍဲပွိုၚ်ဍုၚ် ကျာ်ထဝ်၊ ရေဝ်၊ ၜဳကလေၚ်၊ ပွိုၚ်ဍုၚ်သဓီု ဒၞါဲပေါဲဗ္တိုက် အကြာဒပ်ကံၚ်ဇြဳပၞာန်တံကဵု ဒပ်ပံၚ်ကောံ ဒပ်စဵုဒၞါညးဍုၚ်ကွာန်တံ က္တဵုဒှ်ဒၟံၚ်ဂှ် ဟိုတ်ဖဵုသာ်လဵုနွံနွံ ညံၚ်ဂွိုအ်ကဵုအခေါၚ်စဴဌာန်ဒၟံၚ်အိုတ်ဂှ် ကံၚ်ဇြဳပၞာန်စၞောန်ပ္ညုၚ်ကၠုၚ် ပ္ဍဲသတ္တာဟတတိယ ဂိတုဏံရ။
စၞောန်ပ္ညုၚ်ကၠုၚ် သာ်ဏံဂှ်ဝွံ ဂွိၚ်ဖေက် လ္ပာ်ဂကောံဇြဟတ်ပၠန်ဂတးတံ ထ္မံက်ကၠုၚ်ရုပ်ရဴ ပေါဲဗ္တိုက်သီဍုၚ်တံတုဲ ရပ်စပ်အာသၞာဲဒဴတံ နဒဒှ်ညးဒးဒုၚ်သ္ပဒၞန်တံရောၚ်ဂှ် သၞာဲဒဴ Non CDM နူပွိုၚ်ဍုၚ်ရေဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူအကာဲအရာတံဏံတုဲ ညးသၟိက်မိက်ဂွံနုက်တိတ်နူ နဒဒှ်သၞာဲဒဴအလဵုအသဳတံ နွံဒၟံၚ်တုဲ လ္ၚဵုဂှ်မ္ဂး ပ္တိုန်လဝ်လိက်နုက်တိတ်ကီုလေဝ် လ္ပာ်ကံၚ်ဇြဳပၞာန်တံ ထ္ၜးဟိုတ်နာနာသာ်တုဲ ဟွံကဵုအခေါၚ်နုက်တိတ်ပုဟ်ဂှ် သၞာဲဒဴ Non CDM နူပွိုၚ်ဍုၚ်ၜဳကလေၚ်မွဲတၠ သ္ဂးရ။
အခိၚ်လၟုဟ်ဂှ် ပ္ဍဲတွဵုရးဍုၚ်မန်ဂှ် ပ္ဍဲကျာ်ထဝ်၊ ရေဝ်၊ ၜဳကလေၚ်၊ သဓီု မပါလုပ် သီုကဵုတွဵုရးကရေၚ်တံလေဝ် ပေါဲဗ္တိုက်တံ က္တဵုဒှ်ဒၟံၚ် ဟွံပိုတ်သ္ကုတ်ရ။
တုဲကၠုၚ် ဂိတုအံက်တဝ်ဗာ (၂၁) တေံလေဝ် အပ္ဍဲဍုၚ်ကအ်ကြိက်ဂှ် အကြာဒပ်ပံၚ်ကောံ ဒပ်မဟာ (၆) KNLA တံကဵု ဒပ်ကံၚ်ဇြဳပၞာန်တံ က္တဵုဒှ်ဒၟံၚ်ပေါဲဗ္တိုက်တုဲ ဟိုတ်နူကံၚ်ဇြဳပၞာန် ပန်ပှော်လွဟ်လက်နက်ဇၞော်တံဂှ်ရ ကောန်အရာပ် (၄) တၠ ချိုတ်တုဲ (၂၁) တၠ ကလိဂွံလဝ်ဝပ်ရ။
ကြဴနူကံၚ်ဇြဳပၞာန် သီအဝဵုတုဲဂှ် သီုကဵုသၞာဲဒဴ နူဌာနဝန်ဇၞော် ပရေၚ်ပညာ၊ ပရေၚ်ထတ်ယုက်တံ မပါလုပ် သၞာဲဒဴဂၠိုၚ်ကဵုလ္ၚီ နူဌာနနာနာတံလေဝ် သ္ပကၠုၚ်လဝ် CDM ရ။
ဒပ်ပၞာန် နူသၟဝ်ဌာနဝန်ဇၞော်ကာစဵုဒၞါ ကဵု ဗၠာဲသၟိၚ် နူသၟဝ်ဌာနဝန်ဇၞော်ကာအပ္ဍဲဍုၚ်တံဝွံလေဝ် ပါလုပ်ကၠုၚ် အပ္ဍဲချဳဒရာၚ် CDM တံတုဲ ဗၠာဲသၟိၚ် ကေုာံ ကောန်ပၞာန် သ္ပ CDM လၟိဟ်အပံၚ် ၜိုတ် (၈၀၀၀) နွံဒၟံၚ်ဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)