သွက်ဂွံစၟတ်သမ္တီ ကံၚ်ဇြဳပၞာန် နဒဒှ်ဂကောံပကီုပရာပ်ဂှ် SAC-M အာတ်မိက်

လ္ဂုၚ်၊ အံက်တဝ်ဗာ (၂၅)

သွက်ပြဝဓဇန်ကြမ်ကြ ကံၚ်ဇြဳပၞာန် မကလိလောန်လဝ် လ္တူကွးဘာ ကေုာံ အ္စာဘာဗ္တောန်လိက်တံဂှ် ညံၚ်ပရေၚ်ဒုၚ်လျိုၚ်ဂွံနွံ ကုလသမဂ္ဂ ကေုာံ ဂကောံအာဇြဳယာန်တံ သွက်ဂွံရေၚ်တၠုၚ်ကဵုဂှ်ကီု လ္ပာ်ကံၚ်ဇြဳပရေၚ်ဂီုကၠီု သွက်ဂွံစၟတ်သမ္တီကဵု ကံၚ်ဇြဳပၞာန် နဒဒှ်ဂကောံပကီုပရာပ်ဂှ် ကံၚ်ဇြဳကဵုကသပ် စပ်ကဵုကၟိန်ဍုၚ်ဗၟာ (SAC-M) အာတ်မိက်လဝ်ရ။

ကောန်ဒပ်ကံၚ်ဇြဳပၞာန်တံ ကုတ်က္ဍိုပ်ဂစိုတ်လဝ် အ္စာဘာဗ္တောန်လိက် အလဵုအသဳညဳသၟဟ်ဂကူ (NUG) မွဲတၠဂှ်ဝွံ ဟွံကိတ်ညဳကဵု သၞောဝ်ဥပဒေကၟိန်ဍုၚ်နာနာတံသၟးဟွံက ကဵုတၚ်စၞောန်ပျးသၞောဝ်ဥပဒေ မၞုံဍုၚ်ဗၟာတံဝွံလေဝ် ဟွံကိတ်ညဳတုဲ ဒှ်ဒၟံၚ်ပြဝပကီုပရာပ်ရောၚ်ဂှ် SAC-M သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန် မလုတ်လောန်ဗ္တိုက်လဝ် ဘာဗ္တောန်လိက်တံဂှ်ဝွံ ဒှ်အရာဝးပ္ကဝ်ဒၟံၚ် ကောန်ဝေန်ယှေန် အခေါၚ်အရာကောန်ၚာ်သၟတ် ကုလသမဂ္ဂတုဲ ဒပ်ပၞာန်ဗၟာဝွံ ညံၚ်ညးဍုၚ်ကွာန်မှာဇန်တံ ဂွံဖေက်လကိုတ်ဂှ် စကာကၠုၚ် နဲကဲတၞုၚ်တၞး အိုတ်ကၞောတ်တံရဂှ် SAC-M ဟီုရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပ္ဍဲကံၚ်ဇြဳပရေၚ်ဂီုကၠီုဂှ် ဟိုတ်နူဍုၚ်ကြုက် ကေုာံ ဍုၚ်ရုယှာ မရပ်စပ် အဝဵုဝဳဒိုဝ်မာန်တံ နွံဒၟံၚ်ဂှ်ရ သ္ဂုတ်သွာတ်အာ ကုကံၚ်ဇြဳပၞာန် နဒဒှ်ဂကောံပကီုပရာပ်မာန် ဟွံသေၚ်ပုဟ်ဂှ် သ္ၚဳဂၠိပ်လဝ်ရ။

နကဵုကံၚ်ဇြဳပရေၚ်ဂီုကၠီု ကုလသမဂ္ဂ သွက်ဂွံစဵုဒၞါ ကုညးဍုၚ်ကွာန် ကၟိန်ဍုၚ်ဗၟာတံကီု၊ သွက်ဂွံကၟာတ်တာဒၞါ ဒဒှ်မသွံတြးဒၟံၚ်လွဟ်လက်နက် ကုကံၚ်ဇြဳပၞာန်တံဂှ်ကီု၊ သွက်ဂွံကၟာတ်ဆိုအ်ကေတ်အရေဝ် တပ်ဒဏ် စပ်ကဵုသြန်သၠုဲ ကေုာံ ပရေၚ်ပိုန်ဒြပ်တံဂှ်ကီု သွက်ဂွံလှဲပြံၚ်ကဵု ပြသၞာကၟိန်ဍုၚ်ဗၟာ ကုရုၚ်သၞောဝ်ဓဝ်ကၟိန်ဍုၚ်နာနာ (ICC) တံဂှ် ကံၚ်ဇြဳကဵုကသပ် စပ်ကဵုကၟိန်ဍုၚ်ဗၟာ (SAC-M) ဖ္တိုက်ဖ္အောဝ်လဝ်ရ။

ဂကောံအာဇြဳယာန်ဂှ်လေဝ် သွက်ဂွံဆက်ဆောံကဵု အလဵုအသဳညဳသၟဟ်ဂကူ (NUG) ဗွဲမလုပ်သၞောဝ်ဂှ် နွံဒၟံၚ်ပၟိက်တုဲ ပ္ဍဲကဵုဂကောံကုလသမဂ္ဂတံဂှ် သွက်ဂွံသ္ပစၟတ်သမ္တီ ကုဥူကျဝ်မဵုထောန် နဒဒှ်ညးစၞးကၟိန်ဍုၚ်ဗၟာဂှ် SAC-Myanmar ဖ္တိုက်ဖ္အောဝ်လဝ် ကောံဓရီုကုလသမဂ္ဂရ။

ကံၚ်ဇြဳကဵုကသပ် စပ်ကဵုကၟိန်ဍုၚ်ဗၟာ (SAC-M) ဂှ် ဒက်ပ္တန်လဝ် ပ္ဍဲဍုၚ်မလေဝ်ယှာတုဲ ဒှ်ဂကောံ မဒက်ပ္တန်လဝ် သွက်ဂွံဖျေံသ္ဂုတ်သွာတ် ချိုတ်တ်ပၠိုတ်တ် သွက်ကၟိန်ဍုၚ်ဗၟာ၊ ပရေၚ်ချဳဒရာၚ် ဒဳမဝ်ကရေဇြဳတံ ကေုာံ အမှုရာဇာဝတ် မက္တဵုဒှ်လဝ် ကြဴနူဒပ်ပၞာန်သီအဝဵုတုဲတံ ဒှ်တမ်ရ။

ပရိုၚ်−သြၚ်လောန်တိုၚ်(မ်)