ဇြပ်ဗု၊ အံက်တဝ်ဗာ (၂၇)
ပ္ဍဲပွိုၚ်ဍုၚ်ဇြပ်ဗု ကေုာံ ပ္ဍဲဗ္ဒါဲဍုၚ်ဒုၚ်ဇြယိတ် (သိမ်ဇရပ်) တွဵုရးဍုၚ်မန်ဂှ် တုဲကၠုၚ် ပ္ဍဲဂိတုအံက်တဝ်ဗာ (၂၅) မွဲတ္ၚဲဓဝ်ဂှ် ကွဳစက်ကံၚ်ဇြဳပၞာန်တံ ဒးဒုၚ်ဗ္တိုက်လဝ် (၂) ဝါရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုအံက်တဝ်ဗာ (၂၅) ၜိုတ်ပယျာံဂယး (၁၀) နာဍဳဂှ် ကွဳစက်ကံၚ်ဇြဳပၞာန် မကၠုၚ်နူလ္ပာ်ဇြပ်ဗု စှ်ေလ္ပာ်ရေဝ် (၁၉) ဖ္ဍိုက်ဂှ် ဂကောံဒပ်ဒမၠုက်တံၚ်ညဵု တွဵုရးဍုၚ်မန်တံ ဗ္တိုက်လဝ်အကြာဂၠံၚ် ပ္ဍဲအကြာကွာန်ဝါခမိ ကေုာံ ကွာန်ယဲတာဨရ။
ပ္ဍဲပရေၚ်ဗ္တိုက်ဏံဂှ် အကာဲအရာဇီုကပိုက်ချိုတ်ဂျိုၚ် လ္ပာ်ဂကောံဒပ်ကံၚ်ဇြဳပၞာန်တံ ဗွဲလစှ်ေဂှ် ဆက်ဂၠိုက်ဂၠါဲဒၟံၚ်ရောၚ် ဂကောံဒပ်ဒမၠုက်တံၚ်ညဵု တွဵုရးဍုၚ်မန်တံ လလောၚ်ပ္တိတ်လဝ်ရ။
ပ္ဍဲဂိတုအံက်တဝ်ဗာ (၂၅) လဒေါဝ်တ္ၚဲ ၜိုတ် (၃) နာဍဳဂှ်လေဝ် ကရပ်ရုပ်သ္ကိုပ်ဗိုလ်အံၚ်သာန် ဗ္ဒါဲရုၚ်စက်စက္ခူသက်တိုၚ် ဍုၚ် (သိမ်ဇရပ်) ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုဟ်မာၚ် ဗ္တိုက်လဝ်ကွဳစက်ကံၚ်ဇြဳပၞာန် (၃) ဖ္ဍိုက်ရ။
အပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန် (၃) တၠ ဟွံက ဇီုကပိုက်ချိုတ်မာန်တုဲ ကြဴနူဒးဒုၚ်ဗ္တိုဟ်မာၚ်တုဲဂှ် ဒပ်ကံၚ်ဇြဳပၞာန် ကၠောန်သ္ပပန်ပှော်လဝ် ပွဳပွူဗ္ဒါဲဗ္ဒါဲတံဂှ် ကြာန်န်ရ။
ပ္ဍဲတွဵုရးဍုၚ်မန်ဂှ် အပ္ဍဲအကြာတ္ၚဲတံဏံ စနူကဵုဗ္ဒိုပ်သၞေဟ်ကၚ် ကံၚ်ဇြဳပၞာန်တံ၊ ဒၞါဲဂၠိုက်ဂၠါဲစၟဳစၟတ်တံ ၊ ကောန်ဒပ်ကံၚ်ဇြဳပၞာန်တံ ကေုာံ ကွဳစက်ကံၚ်ဇြဳပၞာန်တံ ဒှ်တမ် ဒးဒုၚ်ဗ္တိုက်ဒၟံၚ်တုဲ အပ္ဍဲပရေၚ်ဗ္တိုက်တံဏံဂှ် လ္ပာ်ကံၚ်ဇြဳပၞာန် ဒးဂိဒၟံၚ်ရ။
ပရိုၚ်−သြၚ်လောန်တိုၚ်(မ်)