ဗြဝတဳ၊ အံက်တဝ်ဗာ (၂၇)
ဟိုတ်နူပေါဲဗ္တိုက် အပ္ဍဲဍုၚ်ကအ်ကြိက်တံတုဲ နကဵုညးဍုၚ်ကွာန် မအာကၠုၚ်ဒၟံၚ်တရဴ လ္တူဂၠံၚ်ဇၞော် ဗြဝတဳ−ကအ်ကြိက်တံ စွံသတိဗွဲတၟေၚ်တုဲ သွက်ဂွံအာကၠုၚ်အိုတ်ဂှ် သ္ကိုပ်က္ဍိုက်ပ်ပၞာန် ကဝ်တူလေဝ် သဝ်နေဝ်ဒါမျ ထ္ပက်စၟတ်တဲ ပ္ဍဲဂိတုအံက်တဝ်ဗာ (၂၆) တုဲ လလောၚ်ပ္တိတ်လဝ် တၚ်ကဵုသတိရ။
အပ္ဍဲဒေသကဝ်တူလေဝ်တံဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ကဝ်တူလေဝ်တံ က္တဵုဒှ်ဒၟံၚ် ပရေၚ်ပၞာန်ကြံၚ်မ္ၚိုဟ်တံတုဲ အသိၚ်အလိုန်ပေါဲဗ္တိုက်သၠုၚ်တိုန်ကၠုၚ်ဂှ်ရ ပွမသုၚ်စောဲအာကၠုၚ်ဒၟံၚ် လ္တူဂၠံၚ်အာယှ အပ္ဍဲကာလပေါဲဗ္တိုက် က္တဵုဒှ်ဒၟံၚ်တံဂှ် စွံသတိတုဲ သွက်ဂွံအာကၠုၚ်အိုတ်ညိဂှ် ကဵုသမ္တီရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲဂၠံၚ်အာယှဂှ် ဟွံဂွံအခေါၚ်နူဒပ်ပၞာန်ကဝ်တူလေဝ် (KTLA) မ္ဂး လ္ပအာကၠုၚ်အိုတ်ညိဂှ် ဒဒှ်ရဒပ်ပၞာန်ကဝ်တူလေဝ် ဒုၚ်လဝ်ဂုဏ် ညးဍုၚ်ကွာန်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲဂၠံၚ်အာယှ ဗြဝတဳ−ကအ်ကြိက်ဂှ် တ္ၚဲဏံလေဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ် ပရေၚ်ပၠန်ဂတးတံ ပွမပန်ပှော်ဒၟံၚ်တံ ဆက်နွံဒၟံၚ်တုဲ တ္ၚဲတုဲတုဲကၠုၚ်တေံမ္ဂး ကွဳစက်အာကၠုၚ်ဒၟံၚ်ၜါဖ္ဍိုက် ဒးဒုၚ်စံၚ်ပလီုလဝ် နွံရ။
တုဲကၠုၚ် အပ္ဍဲတ္ၚဲအကြာတံဏံ ဟိုတ်နူပေါဲဗ္တိုက် မက္တဵုဒှ်လဝ် ပ္ဍဲဍာ်လ္ဂေါဝ်တဝ်နဝ် ဗ္ဒါဲဂၠံၚ်ဇၞော်အာယှဂှ်တုဲ ကြဴနူဒးကၟာတ်ထောံလဝ် ဂၠံၚ်အာယှ တ္ၚဲဗွဲမလအ်လတုဲ ကလေၚ်ပံက်ကၠုၚ်ကီုလေဝ် အခိၚ်လၟုဟ် ပေါဲဗ္တိုက်တံ ဆက်က္တဵုဒှ်ဒၟံၚ်ဂှ်ရ နကဵုညးအာတရဴတံ ရံၚ်ကဵုအကာဲအရာတုဲ စွံသတိတုဲ ဒးအာကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)