ဍာ်ဗု၊ မေ ၁၆။
အပ္ဍဲကဵုရးတနၚ်သဳ ပွိုၚ်ဍုၚ်ဍာ်ဗု နူကဵုတမ်ဒပ် ခမရ ၄၀၉ ကောန်ပၞာန်ဂြိပ်တိတ်ကၠုၚ်လဝ် ၇ တၠတံဂှ် ရပ်ဂွံလဝ်ရောၚ် ဂွံတီကေတ်နူ ဒပ်စဵုဒၞာညးဍုၚ်ကွာန် တပေန်ယှိုဲထဳ ကိုကျိုက် ရ။
ပ္ဍဲဂိတုမေ ၁၂ လောန်ကၠုၚ်ဏံ ဒၞာဲသၞေဟ်ကၚ်ဂိက်စၟဳစၟတ် ဒပ်စဵုဒၞာညးဍုၚ်ကွာန် တပေန်ယှိုဲထဳကိုကျိုက်ဂှ် ရပ်ဂွံလဝ် ကောန်ဒပ် ၇ တၠဏံ မဒှ်ရ။
ကောန်ပၞာန် ရပ်ဂွံလဝ် ၇ တၠဏံ စှ်ေကၠုၚ်နူဘာယိုက်ဝန်ပၞာန် ညးဍုၚ်ကွာန် လၟေၚ် ၁၉ တုဲ ဒှ်သၟတ်အာယုက် အကြာ ၂၀ ကဵု ၃၀ သၞာံ ပြၚ်တံရောၚ် သ္ဂးရ။
အခိၚ်ဍေံတံ စတိတ်ကၠုၚ်ဂှ် မၞိဟ်နွံမံၚ် ၁၀ တၠကီုလေဝ် ဟိုတ်နူဒပ်ကၚ်ကဝ်မယှေန်ပၞာန်တံ ပန်လဝ် ပ္ဍဲကဵု အခိၚ်ဂြိပ်တိတ် နူတမ်ဒပ်ဂှ် မၞိဟ် ၃ တၠ ဒးဘဲမကမ်တုဲ ချိုတ်အာလဝ် မဒှ်ရ။
ကောန်ပၞာန်ဒးဒုၚ်ရပ်ဂွံလဝ်တံဏံဂှ် ဒှ်ရဲဇာတိ ရးဧရာဝတဳ၊ လ္ဂုၚ်ကဵု ရးဗဂေါတံတုဲ မွဲအခိၚ်တေံ ဟိုတ်နူဒပ်ကဝ်မယှေန်ပၞာန် တံၚ်ရပ်ပဝ်တာ ကဵုယိုက်ဝန်ပၞာန် ဟၟဲကဵုသၞောဝ်ဂှ် ဒှ်ကၠုၚ်လဝ်ကောန်ပၞာန်တံရောၚ် သ္ဂးရ။
ရပ်ဂွံလဝ် ကောန်ဒပ်ယိုက်ဝန်ပၞာန်တံဏံဂှ် ထိၚ်ဒဝ်မၚ်မွဲစွံလဝ် ခိုဟ်ဟ်ရောၚ် ညးတာလျိုၚ် ဒပ်စဵုဒၞာညးဍုၚ်ကွာန် တပေန်ယှိုဲထဳ ကိုကျိုက် မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုမေ ၁၃ လောန်ကၠုၚ်တေံ ပ္ဍဲတွဵုရးမန် ပွိုၚ်ဍုၚ်ရေဝ် နူဌာန်ဂအုပ်ပၞာန် စကခ ၁၉ ကောန်ဒပ် ယိုက်ဝန်ပၞာန်ညးဍုၚ်ကွာန် ၄ တၠတံ ကၠုၚ်ဖျေံလဝ်လွဟ် ဇရေၚ်ဂကောံလကိုဟ်ရေဝ်လေဝ် နွံမံၚ်ကီုရ။
ပရိုၚ် – သြၚ်လောန်တိုၚ်မ်
Photo – PDF