သဓီု၊ မေ ၁၇။
အပ္ဍဲတွဵုရးမန် လတူဍုၚ်သဓီု က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါ နွံသၟဝ်တဲသြဇာဒပ်ပၞာန်ဂှ် ထ္ၜးဟိုတ်နာနာတုဲ ကၠောန်မံၚ် ပရေၚ်ရပ်ဓရတ်အာတ်သြန်ကဵု ပရေၚ်ပကီုပရာတ်တံ ဆက်က်နွံမံၚ်ရောၚ် ညးဍုၚ်ကွာန်လတူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါတံဂှ် ထ္ၜးဟိုတ်ကဵုပရေၚ်ယိုက်ဝန်ပၞာန်တုဲ ဗက်ရပ်ဓရတ် အာတ်ကေတ်မံၚ်သြန် လတူသၟတ်ပ္ဍဲဒေသတံဂၠိုၚ်မံၚ်ဂှ်ကီု ထ္ၜးလွဟ်တုဲ သ္ပမာန်လတူညးဍုၚ်ကွာန် ဗက်ကေတ်မံၚ်ဇၞးဇၟာပ်ဒၞာဲ အတိုၚ်ပၟိက်စိုတ်ဍေံတံ ဗီုဒးစိုတ်ဖန်ဖက်မံၚ်ရောၚ် သ္ဂးရ။ အပ္ဍဲဂိတုမေ ၁၂ လောန်ကၠုၚ်တေံလေဝ် က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါတံ ရပ်ကၠေၚ်ဏာကောန်ကဵုအပါၜါတၠ အာတ်ကေတ်သြန် ၁၂၀ ကိုတ်ရဂှ် ရဲမံၚ်မွဲအရာပ် အပ္ဍဲအရာပ် တုၚ်ကုန် ဍုၚ်သဓီု အတိုၚ်ညးဒေသတံဟီုဂှ် ဂွံတီကေတ်ရ။
ပရေၚ်ဏံ အတိုၚ်ညးတံအာတ်လဝ်သြန်ဂှ် ဟွံကဵုမ္ဂး ယဝ်ရစိုပ်အာ အဆံၚ်လတူတှ်ေ ဒးထပ်ကဵုသြန် လၟိဟ်ကဵုကၠံကိုတ်ဏီတုဲ ကောန်ဗၠာဲလုပ်မံၚ်အဝေါၚ် ယိုက်ဝန်ပၞာန်ဂှ်လေဝ် မွဲအလန်ဓဝ်ဒးဒုၚ်ပလံၚ်ဏာ ဘာပၞာန်ရောၚ် က္ဍိုပ်ဂကောံပျူသဝ်ထဳ ဖိုဝ်ထူ ရပ်ဓရတ်ဘပဠလဝ် မဒှ်ရ။
အတိုၚ်ညးဍုၚ်ကွာန်လတူဍုၚ်တံ ဟီုမ္ဂး က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါဂှ် ကေတ်လဝ်ဓယံက်ကဵု ညးပါလုပ်ဂကောံ စဳရေၚ်အုပ်ဓုပ် ပွိုၚ်ဍုၚ်သဓီု သ္ကိုပ်ဗိုလ် သာန်ဝေန်နိုၚ်ကေုာံ သ္ကိုပ်ဒပ်ဗၠာဲသၟိၚ် ခရိုၚ်သဓီု ဒု-သ္ကိုပ်ဗၠာဲသၟိၚ်ဇၞော် မျေအ်နိုၚ်တံတုဲ လတူညးဍုၚ်ကွာန်တံဂှ် ဗက်ရပ်ဓရတ်အာတ်သြန်မံၚ်ရ။
အတိုၚ် ရိုဟ်ကၞက်ပရိုၚ်လ္ၚဵုတံဟီုလဝ်မ္ဂး က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါဂှ် ဝန်ဇၞော်ပရေၚ်ဂီုကၠီုဒေသပယျဵု တွဵုရးမန် သ္ကိုပ်ပၞာန်ဇၞော် ကျဝ်စွာမျေတ် အလဵုညးတံခါန်ကၞက် ကဵုလဝ်တာလျိုၚ်ရောၚ် ဟီုဂးမံၚ်ကီုလေဝ် နူကဵုဌာန်ပရိုၚ် သြၚ်လောန်တိုၚ်မ် သ္ပဒတန်တၞဟ်ခြာ ဟွံမာန်ဏီပုဟ်။
က္ဍိုပ်ဂကောံပျူသဝ်ထဳ ဖိုဝ်ထူ ကောန်ကဵုအပါ ဒယှ်တှ်မံၚ်ကဵု ယၟုပရေအ်ပရေအ်ဏံဂှ် နူလပါ်အလဵုအသဳပၞာန် ပရေၚ်ကဵုသတိ၊ ကေတ်အရေဝ်မွဲမွဲသာ် ဟၟဲမံၚ်ဂှ်တှ်ေ ညးဍုၚ်ကွာန်လတူဍုၚ်တံ ပါ်ပါဲမံၚ်ဇၞော်ကဵုဇြဟတ်ရ။
က္ဍိုပ်ဂကောံပျူသဝ်ထဳ ဖိုဝ်ထူဂှ် နူအခိၚ်ကၠာတေံ ကေၚ်ဒှ်လဝ်က္ဍိုပ်အရာပ်ကီု၊ ကြဴနူပၞာန်သီအဝဵုတုဲ လတူညးဍုၚ်ကွာန်တံဂှ် ထ္ၜးလွဟ် ဘပဠရပ်ဓရတ်အာတ်မံၚ်သြန်တံကၠောန်ကၠုၚ်မံၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media