မတ်မလီု၊ မေ ၂၀
အပ္ဍဲတွဵုရးမန် ယဝ်ရ သၞာဲဒါနူဌာနဝန်ဇၞော်လဝကတံ အာတ်သြန်မ္ဂး တေၚ်စပ်မာန်တုဲ ရပ်စပ်ကေတ်အာအရေဝ် ချိုတ်တ်ရောၚ် နူရုၚ် သ္ကိုပ်ညးတာလျိုၚ် လဝကတွဵုရး လလောၚ်တြးကဵုလဝ်သမ္တီနွံရ။
အလဵုအသဳပၞာန်သီအဝဵုတၟိ တိုန်ကၠုၚ်လဝ် အပ္ဍဲ ၁၀၀ တ္ၚဲဏံ သွက်ဂွံကၠောန်ကဵု ကာတ်စၟတ်သမ္တီကောန်ဍုၚ် ကေုာံ စရၚ်သ္ၚိဌာန်တံ နကဵုကိုန်အစဳဇန် “သၟိၚ်ဂိတု”တုဲ နူဌာနဝန်ဇၞော်လဝက စှ်ေရေၚ်တၠုၚ်ကၠောန်ကဵုမံၚ် အကြာဗလးတိတံရောၚ် လလောၚ်တြးလဝ်ရ။
အပ္ဍဲကၠောန်ကဵုမံၚ်တံဂှ် ညးဍုၚ်ကွာန်လ္ၚဵုတံ အလဵုဇကုညးတံဂှ် ဟွံကၠုၚ်ကၠောန်၊ ဆက်စၠောံချိက်ကၠောန်မံၚ်ကဵု ရဲကၠောန်စအကြာတံ နွံမံၚ်မ္ဂး ပရူပရာဒှ်ဟွံထေက်တံမံက်တိုန်မံၚ်တုဲ သၞာဲဒါ ပါလုပ်ဆက်စပ်မံၚ်တံကီု ရဲကၠောန်စအကြာတံဂှ် ရပ်စပ်ကေတ်အာမံၚ်အရေဝ်ရောၚ် သ္ဂးလဝ်ရ။
ဟိုတ်ဂှ်ရ ရုၚ်လဝက အပ္ဍဲတွဵုရးမန်တံ ယဝ်ရ အာတ်သြန်မ္ဂး ဆက်စၠောံတေၚ်စပ်အာ ဖုၚ်ဂဏန် ရုၚ်သ္ကိုပ်ညးတာလျိုၚ် လဝက တွဵုရးမန် 09-692276358 ဂွံမာန်ရောၚ် လလောၚ်တြးလဝ်ရ။
အပ္ဍဲကာလ အလဵုအသဳပၞာန်သီလဝ်အဝဵုဏံ သၞာဲဒါလဝကတံ စလာဘ်ဗဇဴ ဒဂေတ်လီု ကၠောန်လဝ်အဂတိ ဂၠိုၚ်အိုတ်တုဲ ရပ်စပ်ကေတ်အာအရေဝ်ဍေံတံရောၚ် ဟီုမံၚ်ဂှ်တှ်ေ ဒှ်အရေဝ်ဟရိုၚ်မွဲရောၚ် ညးဍုၚ်ကွာန် ၜါတၠ ပါ်ပါဲလဝ်ရ။
ဟိုတ်ဂှ်ရ ပရေၚ်စလာဘ်ဗဇဴ သၞာဲဒါလဝကတံဂှ် နူကဵုဌာနဝန်ဇၞော်တံ ညံၚ်ဂွံရပ်စပ်ကေတ်အရေဝ် ချိုတ်တ်ပၠိုတ်တ်တုဲ ပရေၚ်ရပ်စပ်ကေတ်လဝ်အရေဝ်တံဂှ် နကဵုယၟု ဒးပတိတ်ပရိုၚ်လလောၚ်တြးကဵု ထေက်ရောၚ် အာတ်မိက်လဝ်ရ။
မွဲလပါ်ပၠန်လေဝ် ဒဒှ်သၞာဲဒါ ဌာနဝန်ဇၞော်လဝကတံ အဂတိဒဂေတ်လီုမံၚ်ဂှ် ဟီုပတိတ်လ္တူအန်လာၚ် ယဝ်ရ သက်သဳဟွံခိုၚ်ကၠိုက်မ္ဂး ရပ်စပ်ကေတ်အာအရေဝ် နကဵုဥပဒေရောၚ် ပ္ဍဲဂိတုမေ ၁၈ ဂှ် ကလေၚ်ဘပဠလဝ် ညးဍုၚ်ကွာန်တံပၠန်ရ။
ပရိုၚ် – သြၚ်လောန်တိုၚ်မ်
Photo – Social Media