တယိတ်ချံၚ်၊ မေ ၂၀
အပ္ဍဲကဵုရးတနၚ်သဳ ပွိုၚ်ဍုၚ်တယိတ်ချံၚ် ကွာန်ဇြုၚ်သေင်ဖျာဂှ် ကောန်င္ၚာ် ၂ တၠ အာယုက်ဟွံပေၚ်ဏီတံ လိုန်ဒးမါၚ်တပ်တိခတိုဟ်အာတုဲ ဒးဝပ်ဘဲဒဏ်ဇၞော်ကဵုဇြဟတ်ရောၚ် ညးဒေသတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုမေ ၁၇ တုဲကၠုၚ်ဏံ ကောန်ကွာန်ဇြုၚ်သေင်ဖျာ မောၚ်အံၚ်မျိုဝ်ထိုဲ အာယုက် ၁၃ သၞာံ ကဵု မောၚ်မျေတ်မျာတ် အာယုက် ၁၆ သၞာံတံ ဒၞာဲဥဒျာန်ကၠအ်သဝ် လပါ်လက်ကရဴသ္ၚိဂှ် လိုန်ဒးမါၚ်တပ်တိတုဲ ခတိုဟ်အာလဝ်ရောၚ်။
ဟိုတ်နူ မါၚ်တပ်တိခတိုဟ်အာတုဲ ကောန်င္ၚာ်ၜါတၠဏံ ဒးကဝေက်မါၚ် ပ္ဍဲတဲ၊ ပ္ဍဲဒဳ သီုကဵုအလုံမွဲခန္ဓဇကုတံတုဲ ပြဟ်ဟ်ဏံ ဒးလွဳမံၚ်ယဲကာတၟေၚ် အပ္ဍဲကဵုရုၚ်ဂဥုဲထဝါဲရ။
ကြဴနူ မါၚ်ခတိုဟ်အာတုဲ ညးဒေသတံ သွက်ဂွံအာကၠုၚ်ဒၞာဲဥဒျာန်ကၠအ်သဝ်ကဵု ဇိုၚ်ဂြိုပ်ဗ္ဒာဲကွာန်တံဂှ် ဒှ်မံၚ်ဂဝိၚ် ဖေက်မံၚ်အိုတ်စောန်ရောၚ် သ္ဂးရ။
စပ်ကဵုပရူ မါၚ်တပ်တိခတိုဟ်အာဏံတုဲ ဒပ်ပၞာန်သီအဝဵုကေုာံ ဒပ်ပၠန်ဂတးတံ လလောၚ်တြးပတိတ်လဝ်ပရိုၚ်ဂှ် ဟွံဂွံဆဵုဏီပုဟ်။
အပ္ဍဲကွာန်ဇြုၚ်သေင်ဖျာကဵု ပွဳဗွိုၚ်ကွာန်တံမ္ဂး အကြာဂိတုမာတ်ကဵု ဧပြဳ တုဲကၠုၚ်တေံဂှ် ပေါဲဗတိုက်ၜါလပါ် ဒှ်လဝ်ဇၞော်ကဵုဇြဟတ်တုဲ ကပေါတ်မကမ်လွဟ်မခတိုဟ်တံ သှ်ေၜက်ဂလုဲလဝ်နွံမံၚ်ရောၚ်။
ဂိတုဧပြဳ ၁၅ တုဲကၠုၚ်ဏံလေဝ် ပ္ဍဲပွိုၚ်ဍုၚ်တယိတ်ချံၚ် ကွာန်သၞေဟ်ဟနိဂှ် ဟိုတ်နူမါၚ်တပ်တိ ခတိုဟ်အာတုဲ ကောန်င္ၚာ် ၁ တၠ ချိုတ်အာ၊ ၁ တၠဂှ် ဒးအာဝပ်ဘဲဒဏ်တံ နွံရ။
ပရိုၚ် – သြၚ်လောန်တိုၚ်မ်
Photo – CJ