ၜၚ်ကံက်၊ အံက်တဝ်ဗာ (၂၆)
အလဵုအသဳသေံ သွက်ဂွံကဵုအခေါၚ် ကုကောန်ဍုၚ်သ္အာၚ်တံ ရာန်တိသ္ၚိ ပ္ဍဲဍုၚ်သေံဂှ် ပ္ဍဲဂိတုအံက်တဝ်ဗာ (၂၆) ဂှ် ဖျေံလဝ်တၚ်သ္ဂုတ်သွာတ် အဓိကမွဲတၚ်ရ။
ပ္ဍဲဍုၚ်သေံဂှ် ကောန်ဍုၚ်သ္အာၚ်မွဲမွဲတၠ ဓလိုက်လဝ်တမ်ရိုဟ် အောန်အိုတ် သြန်ၝာတ်သေံ (၄၀) မဳလျာန်တုဲ အပ္ဍဲပွိုၚ်ပိသၞာံ ယဝ်ရဆက်ထိၚ်ဒဝ်အာ ပရေၚ်ဓလိုက်တမ်ရိုဟ်ဂှ်မာန်မ္ဂး ရာန်ကေတ် တိသ္ၚိမာန်တုဲ အတိုၚ်ၝောံပိုဒ် (၆၃) သၞောဝ်ဥပဒေ တိဝါဗ္ၚဂှ်မ္ဂး တိမရာန်ဂှ်ဝွံ ပဵုအာနူကဵု (၁၆၀၀ မဳတာပန်ကၠၚ်) ဟွံဂွံပုဟ်ဂှ် စၟတ်ထောံလဝ်ရ။
သၞောဝ်ဥပဒေတၟိဏံဂှ် ခြာဟွံလအ်ဏံ လလောၚ်တြးအာ ပ္ဍဲလိက်လလောၚ်ပၟိၚ် ဨကရာဇ်တုဲ လလအ်မွဲဂိတုတုဲမ္ဂး လမျီုလုပ်ရောၚ် သ္ဂးရ၊ ဟိုတ်ဂှ်ရ ဥပဒေဏံဝွံ အပ္ဍဲပွိုၚ် (၅) သၞာံ စိုပ်အာတရဴရောၚ်ဂှ် ဂကောံဝန်ဇၞော်တံ ဟီုရ။
ပ္ဍဲအခိၚ်တမ်သၞာံတေံဂှ် ဌာနဝန်ဇၞော် ကာအပ္ဍဲဍုၚ် ပ္တိုန်လဝ်ဂလာန် သွက်ဂွံတံၚ်ဂြဲ ပရေၚ်ဓလိုက်တမ်ရိုဟ် ကၟိန်ဍုၚ်သ္အာၚ် ပ္ဍဲဍုၚ်သေံရ။
ကောန်ဍုၚ်သ္အာၚ် မအာတ်ပ္တိုန်လဝ် သွက်ဂွံရာန်တိ ဟွံသေၚ်မ္ဂး သ္ၚိတံဂှ်ဝွံ သက်သဳစပ်ကဵု ပွမဓလိုက်တမ်ရိုဟ် ညးတံ မၞုံအပ္ဍဲဍုၚ်သေံတံဂှ် ဒးပ္တိတ်ကဵုရောၚ် သ္ဂးရ။
နကဵုညးဓလိုက်တမ်ရိုဟ် ကောန်ဍုၚ်သ္အာၚ်တံဂှ် ပ္ဍဲသၟဝ်ဥပဒေ ကိုန်အစဳဇန်ဍုၚ်ဇၞော် ကၟိန်ဍုၚ်သေံတံဂှ် ရာန်ကေတ် သ္ၚိ၊ တိ ပ္ဍဲကဵုၜၚ်ကံက်၊ ဖာတ္တာယျာ ဟွံသေၚ်မ္ဂး ဒၞါဲ “အရာပ်မၞိဟ်ဒၟံၚ်” တၞဟ်သ္အာၚ်တံမာန်တုဲ ပ္ဍဲတိဍာ် စပ်ကဵုလ္ပာ်ပၞာန်တံဂှ် ဂွံအာအခေါၚ်ရာန် ဟွံသေၚ်ပုဟ်ဂှ် သ္ဂးရ။
သ္အာၚ်နူဂှ်ပၠန် သ္ၚိ၊ တိ ပိုန်ဒြပ်တံဂှ် ဒးရပ်စပ်စကာ သွက်ပုဂ္ဂလိကရတုဲ သီုကဵုစၟတ်လဝ် “ဟွံဖံက်ပ္ကဝ် သၞောတ်ဗီုပြၚ် ပရေၚ်မၞိဟ်၊ ဒ္ဂေတ်ပဋိပတ်၊ အခိုက်အလိုက် အပ္ဍဲဗွိုၚ်ညးဒေသတံမွဲသာ် ဒးရှ်ေသှ်ေဒ္ဂေတ်ဗက်ရောၚ်” မဒှ်ရ။
ပ္ဍဲအရာအာတ်ပ္တိုန် သွက်ဂွံရာန်တိသ္ၚိတံဂှ် ကောန်ဍုၚ်သ္အာၚ်တံဝွံ ဒးကေတ်အခေါၚ် နူဌာနဝန်ဇၞော် အပ္ဍဲဍုၚ်တုဲ ဒးအာတ်ပ္တိုန် ဇရေၚ်သ္ကိုပ်စၞောန်ပ္ညုၚ် ဌာနက္ဍိုက်ပ်တိကၠအ်တံရောၚ်။
သ္ပဒတန် လိက်အာတ်ပ္တိုန် စပ်ကဵုပွမပိုၚ်ပြဳ တိသ္ၚိတံတုဲဗက် အပ္ဍဲဗွိုၚ် (၆၀) တ္ၚဲ ဒးကဵုပရိုၚ် ကုဌာနတိကၠအ် စပ်ကဵုဒေသတံရောၚ်ဂှ်လေဝ် ပါလုပ်ရ။
နကဵုညးမရာန်တိသ္ၚိတံ ယဝ်ရမိက်ဂွံကလေၚ်ရုပ်သီ ပရေၚ်ဓလိုက်တမ်ရိုဟ် ညးတံဂှ်မ္ဂး အပ္ဍဲပွိုၚ် (၆၀) တ္ၚဲ ဒးကဵုပရိုၚ်ကဵု ညးတာလျိုၚ်တံရောၚ်ဂှ် သ္ဂးရ။
နကဵုကောန်ဍုၚ်သ္အာၚ်တံ တိမွဲဨကဂှ် မွဲဝါဟေၚ် အခေါၚ်ရာန်မၞုံတုဲ မိက်ဂွံကလေၚ် ကရေက်သွံတိကီု ဟွံသေၚ်မ္ဂး မိက်ဂွံကလေၚ်သွံ သီုဖအိုတ်မ္ဂး တၚ်ပိုၚ်ကၞာတ်လ္ၚဵု နွံဒၟံၚ်ဂှ်လေဝ် ထ္မံက်ထ္ၜးလဝ်ရ။
အခိၚ်လၟုဟ်ဂှ် နကဵုလဂါံဇိုၚ်ပဏာမ သွက်ဂွံတံၚ်ဂြဲ ကွပ်မၞိဟ် မပ္တံကဵု ညးမဒေါအ်ဇူလဝ်တံ၊ တၠပညာနဲကွတ်ပညာဒေတ်ဂျေတ်ဒဴတံ ကေုာံ မၞိဟ်လေပ်ပညာ နူကဵုဍုၚ်သ္အာၚ်တံဂှ် စၟဳစဒၟံၚ်ရ။
Ref: The Thaiger